~~~~~~~~⊰❂ unicode ❂⊱~~~~~~~~

“ရဲတပ်ဖွဲ့က ရောက်လာတာ သိတာနဲ့ သူတို့က မီးပိတ်ပစ်လိုက်တယ်။ အမှောင်ချပစ်လိုက်တဲ့ အတွက် ရဲတပ်ဖွဲ့က သူတို့ နေအိမ်ခြံဝင်းကို ချက်ချင်းနေရာယူ အကာအကွယ်ယူပြီး ဝင်ဖမ်းရတယ်။ အိမ်ရဲ့ မြေအောက်ခန်းက တစ်ယောက် ဖမ်းမိတယ်။ ကျန်တဲ့သူတွေကို အိမ်ထဲမှာပဲ ဖမ်းဆီးရမိတယ်။ သူတို့ဘက်က ပစ်ခတ်တဲ့အတွက် ဖမ်းဆီးရေးအဖွဲ့ထဲက ပြည်သူ့စစ်တပ်ဖွဲ့ဝင်တစ်ဦး ဒဏ်ရာ ရသွားပါတယ်။ စိုးရိမ်စရာ အခြေအနေတော့ မဟုတ်ပါဘူး”ဟု တာချီလိတ်မြို့မရဲစခန်းမှ စခန်းမှူး ဒုရဲမှူး မျိုးခိုင်က တာချီလိတ်သတင်းအေဂျင်စီသို့ ပြောသည်။

တာချီလိတ်မြို့တွင် ဇူလိုင်လ (၂)ရက်နေ့ ည (၇)နာရီ (၁၅)မိနစ်ဝန်းကျင်က အာခါဈေးလမ်းတွင် လူနှစ်ဦး လိုက်ပါလာသည့် မော်တော်ယာဉ်တစ်စီးကို ကားလမ်းဘေးတွင် ရပ်နေသူတစ်ဦးက သေနတ်ဖြင့် ပစ်ခတ်သဖြင့် ယာဉ်မောင်းနှင်သူမှာ သေနတ်ဒဏ်ရာသုံးချက်ရရှိ သေဆုံးသွားသဖြင့် ရဲတပ်ဖွဲ့က စုံစမ်း စစ်ဆေးနေစဉ် ပါဆတ်ရပ်ကွက်မှ ကားအရောင်းပြခန်းတစ်ခုကိုလည်း လမ်းပေါ်မှ ပစ်ခတ်သွားကြောင်း သတင်းထပ်မံ ရရှိခြင်းဖြစ်ကြောင်း သိရသည်။

ကားအရောင်းပြခန်းအား ရဲတပ်ဖွဲ့က စစ်ဆေးနေစဉ် ဗိုလ်ချုပ်လမ်းမပေါ်တွင် ဆိုင်ကယ်တစ်စီးဖြင့် လူနှစ်ဦးရောက်လာပြီး မိုးပေါ်ထောင်၍ သေနတ်(၃)ချက် ပစ်ခတ် ထွက်ပြေးရာ ရဲတပ်ဖွဲ့က လိုက်လံ ဖမ်းဆီးစဉ် ဟောင်လိတ်လမ်းဆုံမီးပွိုင့်တွင်လည်း သေနတ်ကို မိုးပေါ်ထောင်၍ သုံးချက်ထပ်မံ ပစ်ခတ်ခဲ့ကြောင်း သိရသည်။

အဆိုပါ သေနတ်ပစ်ခတ်မှုများမှ ကျူးလွန်သူများအား တာချီလိတ်ခရိုင်ရဲရုံးမှ ဒုရဲမှူးစံသိန်း၊ တာချီလိတ်မြို့မရဲစခန်းမှ စခန်းမှူး ဒုရဲမှူးမျိုးခိုင်၊ ခရိုင်မှုကူမှ ရဲအုပ် သောင်းရွှေ၊ ပြည်နယ်မှုကူမှ ရဲအုပ်အေးထွန်းသိန်း၊ မြို့မရဲစခန်းမှ နယ်ထိန်းခေါင်းဆောင် ရဲအုပ်အေးလွင်၊ ပြည်သူ့စစ်တပ်ဖွဲ့ဝင်များ ပါဝင်သော ပူးပေါင်းအဖွဲ့က စုံစမ်းဖမ်းဆီးရာ ဇူလိုင်လ (၃)ရက်နေ့ နံနက်တွင် ပဏ္ဏိတဆိုသူကို စတင် ဖမ်းဆီးရမိခြင်းဖြစ်ပြီး ကျန်အဖွဲ့ဝင်များကို ဖန်မင်ကျေးရွာအုပ်စု၊ ဧဒင်ကျေးရွာမှ စိုင်းသိန်းကျော်(ခ)နှုတ်ခမ်းမွှေး၏ နေအိမ်အတွင်းမှ ထပ်မံ ဖမ်းဆီးရမိခြင်းဖြစ်ကြောင်း သိရသည်။

သေနတ်ပစ်ခတ်သူများဖြစ်သည့် အသက် (၄၀)အရွယ် စိုင်းသိန်းကျော်(ခ) နှုတ်ခမ်းမွှေး၊ အသက်(၁၈)နှစ်အရွယ် စိုင်းလှဝင်း၊ အသက်(၃၄)နှစ်အရွယ် စိုင်းရှဲန်မိန်း၊ အသက်(၂၀)အရွယ် စိုင်းအောင်(ခ) စိုင်းဆန်းအောင်၊ အသက်(၄၅)နှစ်အရွယ် စို်င်းအောင်ထူးနှင့် အသက်(၃၁)နှစ်အရွယ် ပဏ္ဏိတဆိုသူတို့ကို ဖမ်းဆီးရမိခဲ့ခြင်းဖြစ်ကြောင်း သိရသည်။

ကနဦး စစ်ဆေးမှုတွင် ထွက်ဆိုချက်အရ၎င်းတို့က အဆိုပါ ကားအရောင်းပြခန်းတွင် ကားတစ်စီး ရောင်းထားသည့် အတွက် ကားဖိုးငွေတောင်းခံတိုင်း ဖုန်းစက်ပိတ်ပစ်သဖြင့် ဆိုင်ပိတ်ချိန်တွင် သေနတ်ဖြင့် ပစ်ခတ်ခဲ့ခြင်းဖြစ်ပြီး၎င်းတို့ ပစ်ခတ်ထွက်ပြေးချိန်တွင် နောက်မှ ကားတစ်စီးပါလာရာ ကားပြခန်းပိုင်ရှင်၏ တပည့်များ လိုက်လာသည်ဟု ယူဆသဖြင့် လမ်းဘေးအမှောင်ရိပ်တွင် သေနတ်ဖြင့် စောင့်နပြေီး ကားဖြတ်သွားချိန်တွင် ပစ်ခတ်လိုက်ခြင်းဖြစ်သည်ဟု ထွက်ဆိုထားကြောင်း သိရသည်။

အဆိုပါ နေအိမ်တွင် ဝင်ရောက် ဖမ်းဆီးချိန်တွင် ကျည် (၁၆)တောင့်ပါ ကျည်အိမ်တပ်လျက် K 1205549 နံပါတ်ပါ M 22 မောင်းပြန်ရိုင်ဖယ် တစ်လက်၊ ကျည် (၅)တောင့်ပါ ကျည်အိမ်တပ်လျက် CZ 6.35 အမျိုးအစား ပွိုင့် ၂၂ ပစ္စတိုသေနတ်တစ်လက်၊ 5.56 ကျည် (၂၆)တောင့်၊ အရိုးအသွား(၁၀)လက်မခန့် ခေါက်ဓား (၁)ချောင်း၊ ဆိုင်ကယ်တစ်စီး၊ အခင်းဖြစ်နေရာတွင် ကျည်ခွံ (၄)ခု၊ ကားအရောင်းပြခန်းရှေ့မှ ကျည်ခွံ(၃)ခု၊ ဟောင်လိတ်မီးပွိုင့်လမ်းဆုံမှ ကျည်ခွံ(၃)ခု စုစုပေါင်း ကျည်ခွံ(၁၀)ခုတို့ကို သိမ်းဆည်းရမိကြောင်း သိရသည်။

သေနတ်ဖြင့် ပစ်ခတ်ထွက်ပြေးသည့် ဆိုင်ကယ်မောင်းနှင်သူမှာ စိုင်းအောင်(ခ) စိုင်းဆန်းအောင်ဖြစ်ပြီး သေနတ်ပစ်သူမှာ စိုင်းကျော်သိန်း(ခ) နှုတ်ခမ်းမွှေးဖြစ်ကြောင်း သိရသည်။

၎င်းတို့အဖွဲ့အား ရန်ကျားချိန် သေဆုံးသည့် သေနတ်ပစ်ခတ်မှုနှင့် ပတ်သက်၍ တာချီလိတ်မြို့မရဲစခန်းတွင် အမှုဖွင့်အရေးယူထားပြီး ဆက်လက် စစ်ဆေးမှုများဆောင်ရွက်နေကြောင်း သိရသည်။

သတင်း - ငြိမ်းချမ်း(ပြည်)
ဓာတ်ပုံ - ရဲတပ်ဖွဲ့