~~~~~~~~⊰❂ unicode ❂⊱~~~~~~~~

ပြည်ထောင်စုငြိမ်းချမ်းရေးညီလာခံ (၂၁)ရာစု ပင်လုံ၊ တတိယအစည်းအဝေးတွင် ပြည်ထောင်စု သဘောတူ စာချုပ်၏ အစိတ်အပိုင်း(၂)မှ နိုင်ငံရေးကဏ္ဍ (၄)ချက်၊ စီးပွားရေးကဏ္ဍ(၁)ချက်၊ လူမှုရေးကဏ္ဍ (၇)ချက်နှင့် မြေယာကဏ္ဍ(၂)ချက် စုစုပေါင်း အခြေခံမူ(၁၄)ချက်ကို လက်မှတ်ရေးထိုးနိုင်ခဲ့ကြောင်း သိရသည်။

ဇူလိုင်လ (၁၀)ရက်နေ့မှ (၁၆)ရက်နေ့အထိ ကျင်းပခဲ့သည့် ၂၁ ရာစုပင်လုံ တတိယအစည်းအဝေးတွင် တက်ရောက်ခဲ့သည့် အစုအဖွဲ့အားလုံးမှ ညီလာခံကိုယ်စားလှယ် (၇၀၀)ဦး၊ အထူးဖိတ်ကြား၍ တက်ရောက်သူ (၂၉)ဦး၊ လေ့လာသူ (၂၀၄)ဦး၊ အကျိုးဆောင်(၂၇)ဦးနှင့် အထောက်အကူပြု(၁၅၂)ဦးတို့က ကဏ္ဍအလိုက်၊ အစုအဖွဲ့အလိုက် ဆွေးနွေးမှုများမှ သဘောတူညီချက်များရရှိခဲ့ကြပြီး သဘောတူလက်မှတ် ရေးထိုးနိုင်ခဲ့ခြင်းဖြစ်ကြောင်း သိရသည်။

“ဒီအချက်တွေကို ကြည့်လိုက်ရင် နှစ်မျိုးတွေ့ရှိနိုင်ပါတယ်။ တစ်မျိုးက တိုင်းရင်းသားတွေ လိုချင်တဲ့ အရာတွေ၊ စိုးရိမ်နေတဲ့အချက်တွေကို လက်ရှိ ဖွဲ့စည်းပုံအခြေခံဥပဒေမှာ ပါရှိပေမဲ့လည်း ပိုမိုသေချာတဲ့ စကားလုံး အသုံးအနူန်းတွေနဲ့ ထည့်သွင်းခဲ့တဲ့အချက်တွေ ဖြစ်ပါတယ်။ နောက်တစ်မျိုးကတော့ ဖွဲ့စည်းပုံ အခြေခံဥပဒေမှာ မပါရှိသေးတဲ့ အချက်တွေကို ပြည်ထောင်စု သဘောတူညီမှုတစ်ရပ်အနေနဲ့ ထည့်သွင်း ခဲ့ကြတာ ဖြစ်ပါတယ်။ အခု သဘောတူညီလိုက်တဲ့ အချက်တွေက ပြည်ထောင်စု သဘောတူ စာချုပ်ရဲ့ အစိတ်အပိုင်းတွေပဲ ဖြစ်ပါတယ်။ နောင်တစ်ချိန်မှာ ပြီးပြည့်စုံတဲ့ ပြည်ထောင်စု သဘောတူ စာချုပ်ကြီး ချုပ်ဆိုနိုင်ဖို့အတွက် နောက်ထပ် တက်လှမ်းလိုက်တဲ့ ခြေလှမ်းသစ်တွေလည်း ဖြစ်ပါတယ်” ဟု အမျိုးသားပြန်လည်သင့်မြတ်ရေးနှင့် ငြိမ်းချမ်းရေး ဗဟိုဌာန ဥက္ကဋ္ဌ၊ နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြည်ထောင်စု ငြိမ်းချမ်းရေးညီလာခံ-(၂၁)ရာစုပင်လုံ၊ တတိယအစည်းအဝေး ဆဋ္ဌမနေ့ အခမ်းအနားတွင် ပြောကြားသည့် ကျေးဇူးတင်စကားတွင် ထည့်သွင်းပြောကြားသွားသည်။

ညီလာခံတွင် သဘောတူလက်မှတ်ရေးထိုးနိုင်သည့် အခြေခံမူ(၁၄)ချက်တွင် လုံခြုံရေးကဏ္ဍပါဝင်ခြင်း မရှိသေးကြောင်းနှင့် ပြည်ထောင်စုငြိမ်းချမ်းရေးသဘောတူညီမှုအတွက် လုံခြုံရေးကဏ္ဍဆိုင်ရာ သဘောတူညီချက်မှ အရေးကြီးကြောင်း ဒေါ်အောင်ဆန်းစုကြည်က ထည့်သွင်းပြောကြားသွားသည်။

“လုံခြုံရေး ကဏ္ဍကို ညှိနိူင်းကြရာမှာ အဖက်ဖက်ကသတိကြီးစွာနဲ့ ဆောင်ရွက်နေတာကို တွေ့ရှိရပါတယ်။ လုံခြုံရေးကဏ္ဍမှာ ရလဒ်ထွက်နိုင်ဖို့က ငြိမ်းချမ်းရေး ဖြစ်စဉ်အတွက် အများကြီးအရေးကြီးပါတယ်။ ပြီးပြည့်စုံတဲ့ ပြည်ထောင်စုငြိမ်းချမ်းရေး သဘောတူညီမှုဖြစ်ဖို့ဆိုတာ လုံခြုံရေးကဏ္ဍဆိုင်ရာ သဘော တူညီချက်တွေ ပါဝင်မှ ဖြစ်မှာပါ။ ဒီအခက်အခဲတွေ ပြေလည်အောင် ဖြေရှင်းနိုင်ဖို့ဆိုရင် ကျွန်မတို့ရဲ့ နိုင်ငံရေး ဆွေးနွေးမှုမူဘောင်၊ ဖွဲ့စည်းတည်ဆောက်မှုနဲ့ ဒီဇိုင်းတွေကို အရှိအတိုင်း ရဲရဲတင်းတင်း ပြန်လည်သုံးသပ်ပြီး ပိုမိုကောင်းမွန်တဲ့လုပ်ငန်းစဉ် ဖြစ်ပေါ်လာအောင် ကျွန်မတို့ ဆက်လက်ပြီး ကြိုးပမ်း ကြရဦးမှာဖြစ်ပါတယ်”ဟု အမျိုးသားပြန်လည်သင့်မြတ်ရေးနှင့် ငြိမ်းချမ်းရေး ဗဟိုဌာန ဥက္ကဋ္ဌ၊ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားသည်။

ဆက်လက် ဆွေးနွေးရမည့် ကိစ္စများနှင့် ပတ်သက်၍ UPDJC ပူးတွဲကော်မတီကဖွဲ့စည်းပေးထားသည့် အလုပ်အဖွဲ့များအနဖြေင့် အမြန်ဆုံးစတင် ဆောင်ရွက် သွားကြရန်နှင့် ခေါင်းဆောင်များကြား အလွတ် သဘော သီးသန့်ဆွေးနွေးပွဲ အမြန်ဆုံးစတင်နိုင်ရန်ကိုလည်း အစိုးရဘက်က အလေးအနက်ထား ဦးစားပေးဆောင်ရွက်သွားမည်ဖြစ်ကြောင်း ဒေါ်အောင်ဆန်းစုကြည်က ပြောကြားသွားသည်။

ညီလာခံအပြီးတွင် သဘောထားထုတ်ပြန်ချက်တစ်စောင်ကိုလည်း ထုတ်ပြန်လိုက်ပြီး ၂၀၁၈ ခုနှစ်အတွင်း ညီလာခံ(၁)ကြိမ်၊ ၂၀၁၉ ခုနှစ် အတွင်း ညီလာခံ (၂)ကြိမ် ဆက်လက်ကျင်းပသွားရန်၊ ဆက်လက် ကျင်းပသည့် ညီလာခံများတွင် ဒီမိုကရေစီနှင့် ဖက်ဒရယ်ဆိုင်ရာ အခြေခံမူများချမှတ်နိုင်ရေး၊ ၂၀၂၀ ပြည့်နှစ်တွင် ညီလာခံကို လိုအပ်သလိုကျင်းပနိုင်ရေးတို့ကို ဆောင်ရွက်မည်ဖြစ်ကြောင်း ဖော်ပြထားသည်။

ယခုကျင်းပသည့် ပြည်ထောင်စုငြိမ်းချမ်းရေးညီလာခံ-(၂၁) ရာစုပင်လုံ တတိယအစည်းအဝေးတွင် NCA လက်မှတ်ရေးထိုးထားသည့်အဖွဲ့များအပြင် လက်မှတ်မထိုးထားသည့်အဖွဲ့များလည်း တက်ရောက် ဆွေးနွေးခဲ့ကြခြင်း ဖြစ်သည်။

လက်ရှိအစိုးရလက်ထက်တွင် ပင်လုံညီလာခံအစည်းအဝေးကို (၂)ကြိမ်ကျင်းပခဲ့ပြီး ပြည်ထောင်စု သဘောတူစာချုပ်၏ အစိတ်အပိုင်း (၁)ကို (၂၁)ရာစု ပင်လုံ၊ ဒုတိယအစည်းအဝေး၌ လက်မှတ်ရေးထိုးခဲ့ပြီး ယခုတတိယအစည်းအဝေးတွင် ပြည်ထောင်စု သဘောတူ စာချုပ်၏ အစိတ်အပိုင်း(၂)မှ အခြေခံမူ(၁၄)ချက်ကို လက်မှတ်ရေးထိုးနိုင်ခဲ့ခြင်းဖြစ်ကြောင်း သိရသည်။

ပြည်ထောင်စုငြိမ်းချမ်းရေးညီလာခံ-(၂၁) ရာစုပင်လုံ ပထမအစည်းအဝေးကို ၂၀၁၆ ခုနှစ် သြဂုတ်လတွင် လည်းကောင်း၊ ဒုတိယအစည်းအဝေးကို ၂၀၁၇ ခုနှစ် မေလတွင်လည်းကောင်း ကျင်းပခဲ့ပြီး ညီလာခံ အစည်းအဝေးများမကျင်းပသည့် အချိန်များတွင်လည်း အလွတ်သဘောအစည်းအဝေးများ၊ NCA လက်မှတ်မထိုးရသေးသည့်အဖွဲ့များဖြင့် ဆွေးနွေးမှုများလည်းရှိကြောင်း သိရသည်။

ညီလာခံအစည်းအဝေးများအပြင် အဖွဲ့အစည်းကိုယ်စားလှယ်များသည် အစိုးရပိုင်း၊ တပ်မတော်ပိုင်းနဲ့ သီးခြားတွေ့ဆုံမှုများ ပြုလုပ်ခဲ့ကြကြောင်း သိရသည်။

Tachileik News Agency
ဓာတ်ပုံ - Myanmar State Counsellor Office