~~~~~~~~⊰❂ unicode ❂⊱~~~~~~~~

မယ်ဆိုင် ထမ့်လွမ်ဂူအတွင်း ရှာဖွေကယ်ဆယ်ရေးလုပ်ငန်းစဉ် အခြေအနေ
::::::::::::::::::::::::::::::::::::::::::::
ထိုင်း - မြန်မာနယ်စပ် ထိုင်းနိုင်ငံ(မြောက်ပိုင်း)၊ ချင်းရိုင်းခရိုင်၊ မယ်ဆိုင်မြို့၊ ပုံဖာရပ်ကွက်ရှိ ဒွိုင်းနန်းနွန်းတောင်ခြေအနီး ထမ့်လွမ်ဂူအတွင်း ပိတ်မိနေသည့် လူငယ်(၁၃)ဦးကို ထိုင်းနိုင်ငံတာဝန်ရှိသူများနှင့် နိုင်ငံပေါင်း (၇)နိုင်ငံက ရှာဖွေကယ်ဆယ်ရေးလုပ်ငန်း အချိန်နှင့်တပြေးညီဆောင်ရွက်နေမှုအကျဉ်းချုပ်ကို တင်ပြထားခြင်းဖြစ်ပါသည်။ နောက်ဆက်တွဲ အခြေအနေအကျဉ်းချုပ်များကို ရှာဖွေရေးပြီးဆုံးသည်အထိ ယခုသတင်းတွင် ဆက်လက် ဖေါ်ပြသွားမည်ဖြစ်ပါသည်။

Update: 3:06PM ၊ 30/6/2018
မယ်ဆိုင်ဂူအတွင်း ကယ်ဆယ်ရှာဖွေရေး (၈)ရက်မြောက်နေ့ဖြစ်သည့်၂၀၁၈ ခုနှစ် ဇွန်လ(၃၀)ရက်နေ့ နေ့လယ်ပိုင်းတွင် မယ်ဆိုင်ဂူသို့ တောဝက်ဘောလုံးအသင်းအဖွဲ့ဝင်များနှင့် နည်းပြများ ရောက်ရှိလာပြီး  ဂူထဲပိတ်မိနေသည့်အဖွဲ့ဝင်များ၏ မိဘများကို အားပေးရန်နှင့် အဖွဲ့ဝင်များ ပြန်ထွက်လာမည်ကို စောင့်မျှော်ရန် လာရောက်ကြခြင်းဖြစ်ကြောင်း သိရသည်။

Update: 2:17PM ၊ 30/6/2018
မယ်ဆိုင်ဂူအတွင်း ကယ်ဆယ်ရှာဖွေရေးလုပ်ဆောင်ရာသို့ မြန်မာစံတော်ချိန် နေ့လယ်(၁)နာရီ (၅၉)မိနစ်တွင် မိုင်းဖုန်းဆရာတော် ဒုတိယအကြိမ်ကြွရောက်လာပြီး နေ့လယ် (၂း၁၅) နာရီအချိန်အထိ ဆုတောင်းမေတ္တာပို့ပေးခဲ့သည်ကို တွေ့ရသည်။ ဆရာတော်သည် ကယ်ဆယ်ရှာဖွေရေးလုပ်ဆောင်နေရာ မယ်ဆိုင် ထမ့်လုံခွန်နမ့်ဂူသို့ ဇွန်လ(၂၉)ရက်နေ့ ညပိုင်းက ပထမအကြိမ် ကြွရောက်ခဲ့ခြင်းဖြစ်သည်။

Update: 1:57PM ၊ 30/6/2018
မယ်ဆိုင်ဂူအတွင်း ကယ်ဆယ်ရှာဖွေရေး (၈)ရက်မြောက်နေ့ နေ့လယ်ပိုင်းတွင် ပြင်းအားကောင်းသည့် ရေစုပ်စက်နှစ်လုံးကို ထပ်မံတပ်ဆင်လိုက်ပြီး အရှည်(၃၆)ပေ နှင့် အကျယ်(၅)လက်မရှိသည့် ရေပိုက် (၈၅)ချောင်းကို ထပ်တိုးတပ်ဆင်ပြီး ရေစုပ်ထုတ်နေသည်ကို တွေ့ရသည်။

Update: 12:00PM ၊ 30/6/2018
ဂူအတွင်းမှ လူငယ်(၁၃)ဦးကို ကယ်ဆယ်ခေါ်ဆောင်လာနိုင်သည့်အခါ သယ်ယူပိ့ုဆောင်ရေး၊ လူနာတင်ယာဉ် အသင့်ရှိစေရေးတို့အတွက် ဂူအပြင် တောင်ပေါ်ရှိ ဂူပေါက်များမှ တွေ့ရှိ ကယ်ဆယ်လာပါက ရဟတ်ယာဉ်ဖြင့် ခေါ်ဆောင်ပြီး လူနာတင်ယာဉ်သို့ ပို့ဆောင်ပေးရေးတို့အတွက် ကြိုတင်ဇာတ်တိုက် လေ့ကျင့်ခဲ့ကြသည်။

Update: 11:36AM ၊ 30/6/2018
လူငယ်(၁၃)ဦး ကယ်ဆယ်ရှာဖွေရေး (၈)ရက်မြောက်နေ့ ဖြစ်ရာ ဝိုင်းဝန်းပံ့ပိုးသူများလည်း များလာခဲ့သဖြင့် ကယ်ဆယ်ရေးစခန်းအနီးတွင် သောက်သုံးရေစက်လာရောက်ချထားပြီး လိုအပ်သည့်သောက်သုံးရေများကို ထုတ်လုပ်ပေးနေသည်ကို တွေ့ရသည်။

Update: 10:40AM ၊ 30/6/2018
ဂူအတွင်းရှာဖွေရေးများ လုပ်ဆောင်နေသည့် ထိုင်းတော်ဝင်ရေတပ်အထူးအဖွဲ့များ သတ်မှတ်နေရာများသို့ ထိုးဖေါက်ဝင်ရောက်နေပြီဖြစ်ကြောင်း ထိုင်းတော်ဝင်ရေတပ်က သတင်းထုတ်ပြန်သည်။

Update: 10:04AM ၊ 30/6/2018
လူငယ်များကို ရှာဖွေတွေ့ရေး နီးစပ်လာပြီလို့ ယူဆကြသည့်အတွက် ထိုင်းစံတော်ချိန် နံနက်(၉)နာရီဝန်းကျင်ကစတင်ပြီး နံနက်(၁၀)နာရီကျော်အထိ ဂူထဲမှကလေးများကို သယ်ဆောင်လာချိန် အထိအခိုက်မရှိစေရေး၊ စနစ်တကျဖြစ်စေရေးအတွက် ကြိုတင်ဇာတ်တိုက်မှုများ ပြုလုပ်နေပြီး ဂူအပြင်ဘက် လမ်းတစ်လျှောက်တွင်လည်း လမ်းပိတ်ဆို့မှုမဖြစ်စေရေး ဆောင်ရွက်နေကြကာ ဆေးတပ်နှင့် ကျန်းမာရေးအဖွဲ့က အသင့်ပြင်ဆင်မှုများ ဆောင်ရွက်ကြသည်ကို တွေ့ရသည်။

Update: 9:45AM ၊ 30/6/2018
ဂူထဲမှ လူငယ်(၁၃)ဦးကိုရှာဖွေတွေ့ရှိပါက အရေးပေါ် ကယ်ဆယ်ရေးအတွက် ကျန်းမာရေးအဖွဲ့များက ကြိုတင်ပြင်ဆင်မှုများ အဆင်သင့်ဖြစ်ရေး၊ သတင်းယူနေသည့် နိုင်ငံတကာမှ မီဒီယာများ စနစ်တကျ ဖြစ်စေရေး၊ ပိတ်ဆို့မှုများ မဖြစ်စေရေးအတွက် ကြိုတင်ပြင်ဆင်မှုများကို  နံနက်(၉)နာရီခွဲက စတင်ပြီး ဆောင်ရွက်နေကြသည်ကို တွေ့ရသည်။

Update: 8:51AM ၊ 30/6/2018
မယ်ဆိုင်ဂူအပြင် တောင်ပေါ်တွင်တွေ့ရှိထားသည့် ဂူပေါက်အား စစ်ဆေးကြည့်ရှုရန်နှင့် အခြားဂူပေါက်များဆက်လက်ရှာဖွေရန် ဇွန်လ(၃၀)ရက်နေ့ နံနက်(၇:၃၀)နာရီအချိန်တွင် ရှာဖွေရေးအဖွဲ့များ ဒွိုင်ဖါမီတောင်ကုန်းသို့ ဆက်လက်ထွက်ခွာသွားသည်။

Update: 7:10AM ၊ 30/6/2018
ဇွန်လ(၂၉)ရက်နေ့ ညပိုင်းနှင့် ဇွန်လ (၃၀)ရက်နေ့ နံနက်ပိုင်းတွင် မိုးမရွာသည့်အတွက် ဂူအတွင်းရေဝင်ရောက်မှုမရှိတော့ဘဲ တစ်ညလုံးရေစုပ်ထုတ်မှုကြောင့် နံနက်ပိုင်းတွင် ဂူအတွင်းရေလျော့နည်းသွားသည်ကို တွေ့ရပြီး ရှာဖွေရေးလုပ်ငန်းများကို ဆက်လက်လုပ်ဆောင်နေကြသည်ကို တွေ့ရသည်။

 Update: 2:17AM ၊ 30/6/2018
ဂူအတွင်းမှ ရေများကို စုပ်ထုတ်နေလျှက်ရှိသည်ကိုတွေ့ရပြီး အုပ်စုအဖွဲ့ခွဲထားကာ အလှည့်ကျဖြင့် (၂၄)နာရီလုံး ဂူအတွင်းမှ ရေစုပ်ထုတ်ခြင်းလုပ်ဆောင်နေကြောင်း သိရသည်။