~~~~~~~~⊰❂ unicode ❂⊱~~~~~~~~

တာချီလိတ်မြို့ ဆန်ဆိုင်း(ခ)ရပ်ကွက်အပိုင်းရှိ ပြည်တော်သာဈေးအတွင်း၌ ဖွင့်လှစ်ရောင်းချနေသည့် ထမင်းဆိုင်တွင် ၂၀၁၈ခုနှစ် ဇွန်လ(၁၈)ရက်နေ့ ည(၈)နာရီကျော်က မီးလောင်မှုဖြစ်ပွားရာ အနီးအနားရှိ ပြည်သူများ၊ တာချီလိတ်ခရိုင်မီးသတ်ဦးစီးဌာနမှ ဦးစီးဌာနမှူး ဦးကျော်ကိုကို၊ မြို့နယ်မီးသတ်ဦးစီးဌာနမှူး ဦးအောင်ဇော်လင်း နှင့် မီးသတ်တပ်ဖွဲ့ဝင်များ၊ ဆန်ဆိုင်း(ခ)ရပ်ကွက်အုပ်ချုပ်ရေးမှူး ဦးစိုင်းကျောက်နှင့် အဖွဲ့ဝင်များ၊ မြန်မာနိုင်ငံရဲတပ်ဖွဲ့ဝင်များမှ စုပေါင်း၍ ငြှိမ်းသတ်ခဲ့ကြကြောင်း သိရသည်။

မီးလောင်မှုဖြစ်ပွားရခြင်း နှင့် ပတ်သက်၍ မီးသတ်တပ်ဖွဲ့၊ မြို့မီးလင်းရေးအဖွဲ့ နှင့် ရဲတပ်ဖွဲ့တို့ စစ်ဆေးမှုများပြုလုပ်ရာတွင် ရေခဲသေတ္တာမှာ အပူလွန်ရာမှ မော်တာဝါယာရှော့ဖြစ်ကာ စတင်ပြီး အနီးရှိ ဂွမ်းကပ်စောင်များအထိ လောင်ကျွမ်းခြင်းဖြစ်သည်ကို စစ်ဆေးတွေ့ရှိရကြောင်း မီးသတ်တပ်ဖွဲ့ထဲက သိရသည်။

အဆိုပါ မီးလောင်မှုကြောင့် ဆိုင်ရှင်အမျိုးသမီးဖြစ်သူ ဒေါ်အေးမြင့်ကြူ နှင့် မဇင်မာဦးတို့သည် ခြေထောက်နှစ်ဖက်မှာ မစိုးရိမ်ရသည့် မီးအပူလောင်ဒဏ်ရာရရှိခဲ့၍ တာချီလိတ်ပြည်သူ့ဆေးရုံတွင် ဆေးဝါးကုသမှု ခံယူထားကြောင်း သိရသည်။

အဆိုပါမီးလောင်မှုနှင့်ပတ်သက်၍ မီးစတင်လောင်ကျွမ်းသည့်ဆိုင်ခန်းပိုင်ရှင် ဒေါ်အေးမြင့်ကြူအား တာချီလိတ်မြို့မရဲစခန်းတွင် (ပ)၁၉၉/၂၀၁၈၊ ပုဒ်မ ၂၈၅/၃၃၇တို့ဖြင့် အမှုဖွင့်စစ်ဆေးနေကြောင်း သိရသည်။