~~~~~~~~⊰❂ unicode ❂⊱~~~~~~~~

“ဒီနေ့ရှာတဲ့ ဂူမှာလည်း ထွက်ပေါက်က ပိတ်နေတယ်။ သီရိရတနာဂူမှာ ဒီနေ့ ရှာကြတာပါ။ ကျွန်တော်တို့ကို ညွှန်ကြားလာတဲ့ အပိုင်းတွေမှာ ထပ်ရှာပေးသွားမှာပါ။ နောက်ထပ်တော့ လွယ်တော်ခမ်းဘက်မှာ ဆက်ရှာပေးဖို့လည်း ရှိပါတယ်”ဟု တာချီလိတ်မြို့ ပုန်းထွန်ရပ်ကွက်အုပ်ချုပ်ရေးမှူး ဦးစိုင်းဖတ်က တာချီလိတ်သတင်းအေဂျင်စီသို့ ပြောသည်။

လူငယ်(၁၃)ဦး ပိတ်မိနေသည့် ထိုင်းနိုင်ငံ၊ မယ်ဆိုင်မြို့ရှိ ဂူ၏ ထွက်ပေါက်မှာ အိမ်နီးချင်းမြန်မာနိုင်ငံ တာချီလိတ်ခရိုင်အတွင်းရှိသည်ဟု ယူဆသဖြင့် ထိုင်းနိုင်ငံက မြန်မာနိုင်ငံဘက်ခြမ်းမှ ကူညီရှာဖွေပေးရန် ၂၀၁၈ ခုနှစ်၊ ဇွန်လ (၂၈)ရက်နေ့တွင် အကူအညီတောင်းခံလာသဖြင့် ခရိုင်နှင့်မြို့နယ် စီမံခန့်ခွဲမှုကော်မတီ၏ ညွှန်ကြားချက်ဖြင့် ဒေသတွင်းတာဝန်ရှိသူများ၊ လူမှုရေးအဖွဲ့များ ပူးပေါင်းအဖွဲ့ဖြင့် ရှာဖွေမှု လုပ်ဆောင်နခြေင်း ဖြစ်ကြောင်း သိရသည်။

“ဒီနေ့ ရှာဖွေရေးကို မီးသတ်တပ်ဖွဲ့က ဦးဆောင်ပြီး ဆက်ပြီးလုပ်ဆောင်နေပါတယ်။ နောက်ထပ် လိုအပ်တယ် ဆိုရင် ဆက်လက် ရှာဖွေမှုတွေ ကျွန်တော်တို့ဘက်က လုပ်ဆောင်ပေးသွားဖို့ရှိပါတယ်”ဟု တာချီလိတ်မြို့နယ်အုပ်ချုပ်ရေးမှူး ဦးထွန်းဝင်းအောင်က ပြောသည်။

တာချီလိတ်မြို့နယ်အတွင်းရှိ မီးသတ်တပ်ဖွဲ့၊ ကြက်ခြေနီတပ်ဖွဲ့၊ ကယ်ဆယ်ရေးအဖွဲ့၊ ရဲတပ်ဖွဲ့၊ လူမှုကူညီရေးအဖွဲ့၊ သက်ဆိုင်ရာ ရပ်ကွက်အုပ်ချုပ်ရေးတို့ ပါဝင်သည့်အဖွဲ့ဖြင့် ရှာဖွေမှုများကို လုပ်ဆောင်နခြေင်းဖြစ်ပြီး ဇွန်လ (၂၈)ရက်နေ့တွင် ငွေတောင်ဦး ငွေစေတီကုန်းတွင် စတင် ရှာဖွေခဲ့ခြင်းဖြစ်သည်။

ထိုင်းနိုင်ငံဘက်မှ ကူညီကယ်ဆယ်ရေးလုပ်ငန်းများအတွက် တာချီလိတ်ခရိုင်အတွင်းရှိ ဒေသ တာဝန်ရှိသူများက ကြီးကြပ်၍ လိုအပ်သည့် ပူးပေါင်းဆောင်ရွက်မှုများကို ပြည်နယ်အစိုးရ ပံ့ပိုးမှုဖြင့် ဆက်လက် ဆောင်ရွက်သွားမည်ဖြစ်ကြောင်း သိရသည်။

“ကယ်ဆယ်ရေးနဲ့ ပတ်သက်ပြီး လိုအပ်တာများ ဆောင်ရွက်ပေးရန်ဆိုပြီး ပြည်နယ်မီးသတ်နဲ့ တာချီလိတ်ခရိုင် စီမံခန့်ခွဲမှုကော်မတီကို ညွှန်ကြားထားပါတယ်။ ကယ်ဆယ်ရေးနဲ့ပတ်သက်ပြီးတော့ လိုအပ်သမျှ ဆောင်ရွက်ပေးဖို့ဆိုပြီး အကြောင်းကြားထားပါတယ်။ သူတို့အတွက် လိုအပ်တာတွေကို ပြည်နယ်အစိုးရက ပံပိုးပေးသွားမှာပါ”ဟု ရှမ်းပြည်နယ်အစိုးရအဖွဲ့ဝင် လူမှုရေးဝန်ကြီး ဒေါက်တာမျိုးထွန်းက တာချီလိတ်သတင်းအေဂျင်စီသို့ ပြောသည်။

တာချီလိတ်ခရိုင်စီမံခန့်ခွဲမှုကော်မတီက ဦးဆောင်၍ ဒေသတွင်း တာဝန်ရှိသူများ၊ မီးသတ်တပ်ဖွဲ့၊ ကြက်ခြေနီတပ်ဖွဲ့နှင့် လူမှုကူညီရေးအဖွဲ့များက ဒေသတွင်းမှ နယ်မြေကျွမ်းကျင်သူများ အကူအညီဖြင့် ဖြစ်နိုင်ချေရှိသည့် နေရာများကို ထပ်မံရှာဖွေပေးသွားမည်ဖြစ်ပြီး ထိုင်းနိုင်ငံဘက်မှ ကယ်ဆယ်ရေး လုပ်ငန်းများတွင် ပူးပေါင်းဆောင်ရွက်ပေးသွားရန် အသင့်ပြင်ဆင်ထားကြောင်း သိရသည်။

မြန်မာနိုင်ငံအနဖြေင့် ပူးပေါင်းကူညီဆောင်ရွက်နိုင်ရေးအတွက် ပြည်ထောင်စုအစိုးရက နိုင်ငံခြားရေးဝန်ကြီးဌာနနှင့် ရှမ်းပြည်နယ်အစိုးရအဖွဲ့တို့သို့ ၂၀၁၈ ခုနှစ်၊ ဇွန်လ (၂၈)ရက်နေ့တွင် ညွှန်ကြားလိုက်ပြီးနောက် မြန်မာ - ထိုင်းနယ်စပ် တာချီလိတ်ခရိုင်တာဝန်ရှိသူများက မြန်မာ - ထိုင်းနှစ်နိုင်ငံ နယ်ခြားကော်မတီချင်း ချိတ်ဆက်၍ ပူးပေါင်းဆောင်ရွက်ခြင်းဖြစ်ကြောင်း သိရသည်။

မယ်ဆိုင်မြို့ရှိ ထမ့်လုံခွန်နမ့်လိုဏ်ဂူအတွင်း ဇွန်လ (၂၃)ရက်နေ့ကတည်းက ဝင်သွားသည့် ကျောင်းသားလူငယ် (၁၃)ဦးကို ထိုင်းနိုင်ငံမှ တာဝန်ရှိသူများ၊ လူမှုကူညီရေးအဖွဲ့များ၊ နိုင်ငံတကာက ပူးပေါင်းကူညီသူများဖြင့် နည်းလမ်းမျိုးစုံသုံး၍ ရှာဖွေနေဆဲဖြစ်ပြီး ဇွန်လ (၂၉)ရက်နေ့ ညနေပိုင်းအထိ ရှာဖွေမှုများ ဆက်လက်လုပ်ဆောင်နခြေင်းဖြစ်သည်။

သတင်း - ချယ်ရီထိုက်
ဓာတ်ပုံ - ပုန်းထွန်ရပ်ကွက်ရုံး