~~~~~~~~⊰❂ unicode ❂⊱~~~~~~~~

မြန်မာ - ထိုင်းနယ်စပ် ရှမ်းပြည်နယ်(အရှေ့ပိုင်း) တာချီလိတ်မြို့ရှိ မြန်မာ - ထိုင်းအမှတ်(၁) ချစ်ကြည်ရေးတံတားတွင် သာယာလှပရေးလုပ်ငန်းများ ဆောင်ရွက်နိုင်ရေးအတွက် ၂၀၁၈ ခုနှစ်၊ ဇွန်လ (၂၀)ရက်နေ့တွင် တာချီလိတ်ခရိုင်စီမံခန့်ခွဲမှုကော်မတီဥက္ကဌနှင့် အဖွဲ့က ကွင်းဆင်း စစ်ဆေးကြောင်းသိရသည်။

“တံတားသာယာလှပရေးအတွက် လုပ်ဆောင်ရမှာတွေ ကြည့်ရှုစစ်ဆေးတာပါ။ တံတားက ဟိုဘက် အခြမ်းနဲ့ ဒီဘက်အခြမ်းက နည်းနည်းလေးကွာနေတော့ ပန်းအလှပင်လေးတွေ စိုက်တာကအစ သန့်ရှင်းသာယာ လှပအောင်လုပ်ဖို့ ခရိုင်စီခန့်က အသေးစိတ်ညွှန်ကြားတာတွေ ရှိပါတယ်။”ဟု တာချီလိတ်ခရိုင်စီမံခန့်ခွဲမှုကော်မတီ အတွင်းရေးမှူး၊ အလုပ်သမားလူဝင်မှုကြီးကြပ်ရေးနှင့် ပြည်သူ့အင်အားဦးစီးဌာန ခရိုင်ဦးစီးဌာနမှူး ဒုတိယညွှန်ကြားရေးမှူး ဦးကျော်မော်ထွန်းက တာချီလိတ်သတင်းအေဂျင်စီသို့ ပြောသည်။

တာချီလိတ်ခရိုင်စီမံခန့်ခွဲမှုကော်မတီ ဥက္ကဌ၊ ခရိုင်အုပ်ချုပ်ရေးမှူးဦးမြင့်နိုင်နှင့် ခရိုင်စီမံခန့်ခွဲမှုကော်မတီ အတွင်းရေးမှူး၊ အလုပ်သမားလူဝင်မှုကြီးကြပ်ရေးနှင့် ပြည်သူ့အင်အားဦးစီးဌာန ခရိုင်ဦးစီးဌာနမှူး ဒုတိယညွှန်ကြားရေးမှူး ဦးကျော်မော်ထွန်း၊ ခရိုင်ရဲတပ်ဖွဲ့မှူး ဒုတိယရဲမှူးကြီးပေါ်ထွန်းနှင့် အဖွဲ့သည် မြို့နယ်စီမံခန့်ခွဲမှုကော်မတီဥက္ကဌ မြို့နယ်အုပ်ချုပ်ရေးမှူး ဦးထွန်းဝင်းအောင်နှင့် ဌာနဆိုင်ရာ အကြီးအကဲများ ပါဝင်သောအဖွဲ့က ချစ်ကြည်ရေးတံတားပေါ်မှ ဌာနဆိုင်ရာများ၏ လုပ်ငန်း ဆောင်ရွက်မှုအခြေအနေများကို ကွင်းဆင်းစစ်ဆေးပြီး လိုအပ်ချက်များကို မှာကြားခဲ့ကြောင်း သိရသည်။

ခရိုင်အုပ်ချုပ်ရေးမှူးက မြန်မာ-ထိုင်း နှစ်နိုင်ငံနယ်စပ်ဒေသဖြစ်သဖြင့် သန့်ရှင်းသာယာ လှပရေး လုပ်ငန်းများကို ဦးစားပေး ဆောင်ရွက်ရေး၊ ဌာနဆိုင်ရာများ လုပ်ငန်းဆောင်ရွက်ရာတွင် ဥပဒေ၊ နည်းဥပဒေ ပြဌာန်းချက်များနှင့်အညီ လိုက်နာကျင့်သုံးဆောင်ရွက်ရေး၊ တရားမဝင် ကန့်သတ်ပစ္စည်းများ ဖြတ်သန်းသယ်ဆောင်ခွင့် မပြုရေး၊ အများပြည်သူနှင့် ထိတွေ့ဆောင်ရွက်ရသဖြင့် ယဉ်ကျေးသိမ်မွေ့စွာပြောဆိုဆက်ဆံရေးတို့ကို မှာကြားခဲ့ကြောင်း သိရသည်။

ဓာတ်ပုံ - ခရိုင်ထွေ/အုပ်