~~~~~~~~⊰❂ unicode ❂⊱~~~~~~~~

ထိုင်းနိုင်ငံတွင် သေဆုံးသွားသည့် မြန်မာလုပ်သား၏ အာမခံကြေးထုတ်ပေးရန် မိသားစုဝင်များကို ရှာဖွေနေ
***********
ထိုင်းနိုင်ငံ၊ ပထုံဌာနီတွင် အလုပ်လုပ်ကိုင်နေသည့် မြန်မာရွှေ့ပြောင်းအလုပ်သမားတစ်ဦး ယာဉ်တိုက်မှုကြောင့် ကွယ်လွန်သွားသဖြင့် အာမခံကြေးငွေထုတ်ယူပေးရန်အတွက် မိသားစုနှင့် ဆွေမျိုးတော်စပ်သူများ ထိုင်းနိုင်ငံ အလုပ်သမား သံအရာရှိရုံးသို့ အမြန်ဆုံးဆက်သွယ်ပေးရန် ဧပြီလ (၂၅)ရက်နေ့တွင် ကြေညာထားသည်။

PON KHAM အမည်ဖြင့် နိုင်ငံကူးလက်မှတ်ကိုင်ဆောင်ထားသူသည် ထိုင်းနိုင်ငံသို့ ၂၀၁၃ ခုနှစ် မေလ (၁၈)ရက်နေ့ကတည်းက ဝင်ရောက်လာပြီး Mr.Chariyawut Srijan ထံတွင် အလုပ်လုပ်ကိုင်နေကြောင်း မှတ်တမ်းများအရသိရပြီး ၎င်းမှာ ပထုံဌာနီမြို့တွင် တစ်ဦးတည်း ဆိုင်ကယ်ဖြင့်သွားရောက်စဉ် ကားတစ်စီးက ဝင်ရောက်တိုက်မိခဲ့သဖြင့် အပြင်းအထန်ဒဏ်ရာရရှိခဲ့ပြီးနောက် ပထုံဌာနီဆေးရုံတွင် ကွယ်လွန်ခဲ့ခြင်းဖြစ်ကြောင်း သိရသည်။

၎င်းနှင့်ပတ်သက်၍ ရရှိရန်ရှိသည့် အာမခံကြေးငွေများထုတ်ယူပေးရန်အတွက်  မိဘမောင်နှစ်မ ဆွေမျိုးတော်စပ်သူများနှင့် အမြန်ဆုံးအဆက်အသွယ်ရရှိရန်လိုအပ်နေပြီး အလုပ်သမားသံအရာရှိရုံးအနေဖြင့် သက်ဆိုင်ရာနိုင်ငံ၏ဥပဒေ နှင့်အညီ ဆက်လက်ဆောင်ရွက်ပေးသွားမည်ဖြစ်ကြောင်း အသိပေးထားသည်။
PON KHAM ၏ မိသားစုဝင်များအနေဖြင့် ဦးစန်းမောင်ဦး  ၀၉၄၈၈၄၅၄၈၄၊ ဦးဦးခင်မောင် ၀၉၉၀၅၉၂၃၅၂၊ ဦးမျိုးထက်သူ (ရနောင်း) ၀၆၅၂၂၀၆၉၅၁၊ ဦးနိုင်မင်းသူ (ချင်းမိုင်) ၀၆၅၂၂၀၆၉၅၂နှင့် ဦးအောင်ခင်မြင့် (မဲဆောက်) - ၀၆၅၂၂၀၆၉၅၃ တို့သို့ ဆက်သွယ်နိုင်ကြောင်း သိရသည်။