~~~~~~~~⊰❂ unicode ❂⊱~~~~~~~~

KNPP ကိုယ်စားလှယ်များနှင့် ပြည်နယ်အစိုးရ ကိုယ်စားလှယ်တို့ လစဉ်ပုံမှန်တွေ့ဆုံမည်
***************
ပြည်နယ်တွင်းရှိ တည်ငြိမ်အေးချမ်းရေးအား ပိုမိုထိရောက်စွာ ဆောင်ရွက်နိုင်ရန် KNPP (ကရင်နီတိုးတက်ရေးပါတီ) ကိုယ်စားလှယ်များနှင့် အစိုးရအဖွဲ့ကိုယ်စားလှယ်များ လစဉ်ပုံမှန်တွေ့ဆုံမှုများ ပြုလုပ်သွားမည်ဖြစ်ကြောင်း သိရသည်။

ယခင်လက်မှတ်ရေးထိုးခဲ့သော သဘောတူညီချက်များကို ဆက်လက်ထိန်းသိမ်းနိုင်ရန် မလိုအပ်သော ထိတွေ့မှုများ မဖြစ်စေဘဲ ပြည်နယ်၏ တည်ငြိမ်အေးချမ်းရေးကို ဆက်လက်ထိန်းသိမ်းရန် လက်ရှိအစိုးရသစ်နှင့် KNPP ကိုယ်စားလှယ်တို့ လစဉ်တွေ့ဆုံသွားမည်ဖြစ်ကြောင်း ကရင်နီအမျိုးသားတိုးတက်ရေးပါတီ အထွေထွေအတွင်းရေးမှူး ဦးရွှေမျိုးသန့်ထံမှ သိရသည်။

" ပြည်နယ်အစိုးရနဲ့ ကျွန်တော် ပြည်ထောင်စုက ကမကထ လုပ်ပေးရတဲ့အပိုင်းတွေရှိတယ်။ ခုပြည်ထောင်စုက ကမကထ လုပ်ပေးတဲ့အတွက် ဒီပြည်နယ်မှာ အဓိက အုပ်ချုပ်ရေးပိုင်းမှာ အရေးကြီးတဲ့ တပ်ဖက်ကရယ်၊ ပြည်သူ့ရဲ့ဖက်ကရယ်၊ အစိုးရအဖွဲ့အတွင်းရေးမှူးဆိုတာမျိုးရယ်၊ ဒါတွေ စုဖွဲ့ပြီးမှ ကျွန်တော်တို့ဖက်က စုဖွဲ့မှုနဲ့ လစဉ်ပုံမှန်တွေ့ဆုံမှုတွေ လုပ်သွားဖို့ရှိတယ်။ ဒီလိုလုပ်သွားမယ်ဆို ပိုပြီးတော့ အရင်ကထက်စာလို့ရှိရင် ကျွန်တော်တို့ အချင်း ချင်းကြားမှာ ပုံမှန်တွေ့ဆုံမှုတွေ ဖြစ်လာပြီးတော့မှ ပြည်နယ်ရဲ့တည်ငြိမ်အေးချမ်းရေးကိုအထောက်ကူပြုမယ့် သဘောမျိုးပါ " ဟု KNPP အထွေထွေအတွင်းရေးမှူး ဦးရွှေမျိုးသန့်က ပြောသည်။

NCA လက်မှတ်ရေးထိုးနိုင်ရေးအတွက် ငြိမ်းချမ်းရေးကော်မရှင်နှင့် ကရင်နီအမျိုးသားတိုးတက်ရေးပါတီ (KNPP) တို့ ဧပြီလ (၂၆) ရက်နေ့မှ (၂၇) ရက်နေ့ထိ လွိုင်ကော်မြို့ ပြည်နယ်ခန်းမတွင် တွေ့ဆုံဆွေးနွေးခဲ့ကြခြင်းဖြစ်သည်။

သတင်း၊ဓါတ်ပုံ #ဆန်းဖြိုးထွန်း