~~~~~~~~⊰❂ unicode ❂⊱~~~~~~~~

တာချီလိတ်တွင် ပထမဆုံးအကြိမ်အဖြစ် (၃)ရက်ကြာ ကျင်းပပြုလုပ်သည့် မြန်မာ့သိုင်းပြိုင်ပွဲ၏ ဗိုလ်လုပွဲ နှင့် ဆုပေးပွဲအား ဧပြီလ(၈)ရက်နေ့တွင် ကျင်းပပြုလုပ်ခဲ့ကြသည်။

တာချီလိတ်မြို့နယ်အားကစားနှင့် ကာယပညာဦးစီးဌာန နှင့် အင်းသားလူမှုကူညီရေးအသင်းတို့ ပူးပေါင်း ကျင်းပသည့် ၂၀၁၈ခုနှစ်၊ မြို့နယ်စီမံခန့်ခွဲမှု ကော်မတီ ဥက္ကဌ(ဖလား)၊ ပထမအကြိမ် မြန်မာ့ သိုင်းပြိုင်ပွဲအား ဧပြီလ(၇)ရက်နေ့က တာချီလိတ်မြို့ရှိ တာလော့ကျောင်းအတွင်း၌ ကျင်းပခဲ့ခြင်းဖြစ်ပြီး ဧပြီလ(၇)ရက် နှင့် (၈)ရက်နေ့တို့တွင် တာချီလိတ်ခရိုင်အားကစားခန်းမတွင် ကျင်းပပြုလုပ်ခြင်း ဖြစ်သည်။

နောက်ဆုံးဗိုလ်လုပွဲ နှင့် ဆုပေးပွဲသို့ အမျိုးသားလွှတ်တော်ကိုယ်စားလှယ် ဦးစိုင်းလုံစံခတ် နှင့် ဇနီး၊ တာချီလိတ်မြို့နယ် စီမံခန့်ခွဲမှုကော်မတီ အတွင်းရေးမှူး၊ မြို့နယ်လဝကဦးစီးအရာရှိ ဦးစိုင်းဆိုင်တစ်နှင့် မြို့နယ်စီမံခန့်ခွဲမှုကော်မတီဝင်များ၊ တာချီလိတ်ခရိုင်/မြို့နယ် အားကစားနှင့် ကာယပညာဦးစီးဌာနမှ တာဝန်ရှိသူများ၊ တာချီလိတ်မြို့နယ် အင်းသားလူမှုကူညီရေးအသင်း နာယကများနှင့် ဥက္ကဌ အပါအဝင် အမှုဆောင်အဖွဲ့ဝင်များ၊ ပြိုင်ပွဲဝင်များ တက်ရောက်ခဲ့ကြသည်။

ပြိုင်ပွဲတွင် ကျန်စစ်သားအသင်း၊ ဗန္ဓုလအသင်း၊ ဘုရင့်နောင်အသင်း၊ အလောင်းဘုရားအသင်း ဟူ၍ အုပ်စု(၄)စု ဖွဲ့၍ ယှဉ်ပြိုင်စပြေီး ဗန်တိုလက်အတိုက် နှင့် ဓားတစ်လက်အတိုက် အမျိုးအစားများဖြင့် ယှဉ်ပြိုင်ကြခြင်း ဖြစ်ကြောင်း နှင့် ပြိုင်ပွဲများမှ ပထမ နှင့် ဒုတိယအပြင် အထူးဆု ရရှိသူများအား တာဝန်ရှိသူများက ပေးအပ်ချီးမြှင့်ခဲ့ကြကြောင်း သိရသည်။

ပြိုင်ပွဲဝင်များအား ပြိုင်ပွဲမစတင်မီ နွေရာသီသင်တန်းအဖြစ် သင်ကြားပေးခဲ့သည်မှာ အခြေခံသာဖြစ်ပြီး တိုင်းနှင့်ပြည်နယ်များသို့ သွားရောက်ယှဉ်ပြိုင်နိုင်ရန်အတွက် ထပ်မံသင်ကြားပေးသွားမည်ဖြစ်ကြောင်း ရှမ်းပြည်နယ်သိုင်းဆပ်ကော်မတီမှ သိရသည်။

"အခြေခံ ဗန်တို(၆၃) နည်းပညာကျင့်စဉ်အနေနဲ့ ကလေးသူငယ်တွေကို စပြီးတော့မှ လေ့ကျင့်ပေးတာဟာ ကျွန်တော်တို့ မြန်မာ့သိုင်း အနေနဲ့ဆိုရင် အခြေခံအဆင့် လောက်ပဲရှိပါတယ်၊ ကလေးသူငယ်တွေ စိတ်ကျန်းမာ ခန္ဓာကိုယ် ကြံ့ခိုင်သန်စွမ်းမှုအတွက် အဓိကထားပြီးတော့မှ လေ့ကျင့်သင်ကြားပေးခဲ့ခြင်း ဖြစ်ပါတယ်၊ အခုလက်ရှိ အဆင့်က အခြေခံပညာရပ်ကိုသာ သင်ကြားပေးခြင်း ဖြစ်ပါတယ်၊ မြန်မာ့သိုင်း ပညာမှာ ဒီ့ထက် အဆင့်မြင့်တာတွေ အများကြီး ကျန်ပါသေးတယ်၊ တိုင်းနဲ့ပြည်နယ်တွေမှာ ဝင်ရောက် ယှဉ်ပြိုင်နိုင်ရန် အတွက် ကျွန်တော်တို့ နောက်တစ်ကြိမ် သင်ကြားပေးမှာ ဖြစ်ပါတယ်"ဟု ရှမ်းပြည်နယ် သိုင်းဆပ်ကော်မတီ ဥက္ကဌ ဦးမောင်မောင်မြင့် က တာချီလိတ်သတင်းအေဂျင်စီသို့ ပြောသည်။

တာချီလိတ်တွင် ကျင်းပသည့် မြန်မာ့သိုင်းပြိုင်ပွဲမှာ ပထမဆုံးအကြိမ်ဖြစ်ပြီး ဆက်လက်၍ ယခုလို နှစ်စဉ် ကျင်းပသွားရန် အစီအစဉ်ရှိကြောင်း သိရှိရသည်။

ဓာတ်ပုံ - #ဇောင်းညီ