မြို့နယ်အုပ်ချုပ်ရေးမှူး ဦးတင်နိုင်စိုးအား ရာဇဝတ်ကြီးမှုအမှတ်၊ ၂/၂၀၁၆ အတွက် အလုပ်နှင့် ထောင်ဒဏ်(၅)နှစ်၊ ရာဇဝတ်ကြီးမှု အမှတ်၊ ၄/၂၀၁၆ အတွက် အလုပ်နှင့်ထောင်ဒဏ်(၅)နှစ်၊ ဒုတိယဦးစီးမှူး ဦးကျော်ကျော်နိုင်အား ရာဇဝတ်ကြီးမှု အမှတ်၊ ၃/၂၀၁၆ အတွက် အလုပ်နှင့် ထောင်ဒဏ်(၅)နှစ်၊ ရာဇဝတ်ကြီးမှုအမှတ်၊ ၅/၂၀၁၆ အတွက် အလုပ်နှင့်ထောင်ဒဏ်(၅)နှစ်၊ အကြီးတန်း စာရေး ဦးအောင်စိုးမိုးအား ရာဇဝတ်ကြီးမှု အမှတ် ၃၄၈၇/၂၀၁၆ အတွက် အလုပ်နှင့် ထောင်ဒဏ် (၃)နှစ်၊ ရာဇဝတ်ကြီးမှု အမှတ် ၃၄၈၈/၂၀၁၆ အတွက် အလုပ်နှင့်ထောင်ဒဏ်(၃)နှစ် တို့ကို အသီးသီးကျခံစေရန် အမိန့်ချမှတ်လိုက်ခြင်းဖြစ်ကြောင်း သိရသည်။

ပြင်ဦးလွင်မြို့နယ် အုပ်ချုပ်ရေးမှူး ဦးတင်နိုင်စိုးနှင့် ဒုတိယဦးစီးမှူး ဦးကျော်ကျော်နိုင်တို့အား ၂၀၁၃ ခုနှစ်၊ အဂတိလိုက်စားမှု တိုက်ဖျက်ရေးဥပဒေပုဒ်မ ၅၆ ဖြင့် ၂၀၁၆ ခုနှစ် အောက်တိုဘာလ (၂၈) ရက်နေ့တွင် မန္တလေးတိုင်းဒေသကြီး တရားလွှတ်တော်သို့ တရားစွဲဆိုတင်ပို့ခဲ့ရာ တရားရုံးမှ ရာဇဝတ်ကြီးမှုအမှတ် ၂/၂၀၁၆၊ ၃/၂၀၁၆၊ ၄/၂၀၁၆၊ ၅/၂၀၁၆၊ အကြီးတန်းစာရေး ဦးအောင်စိုးမိုးအား ၂၀၁၃ ခုနှစ်၊ အဂတိလိုက်စားမှုတိုက်ဖျက် ရေးဥပဒေပုဒ်မ ၅၇ ဖြင့် ၂၀၁၆ ခုနှစ် အောက်တိုဘာလ (၂၇) ရက်နေ့တွင် ပြင်ဦးလွင်မြို့နယ်တရားရုံးသို့ တရားစွဲဆိုတင်ပို့ခဲ့ရာ တရားရုံးမှ ရာဇဝတ်ကြီးမှု အမှတ် ၃၄၈၇/၂၀၁၆၊ ၃၄၈၈/၂၀၁၆ တို့ဖြင့် လက်ခံစစ်ဆေးခဲ့ပြီးနောက် ယင်းကဲ့သို့ ပြစ်ဒဏ်အသီးသီးချလိုက်ခြင်းဖြစ်သည်။

မန္တလေးတိုင်း၊ ပြင်ဦးလွင်မြို့နယ်၊ လွန်ကောင်းကျေးရွာအုပ်စု၊ မန်ကျည်းအင်းရွာသစ်အား ပြည်ထဲရေး အမည်ပေါက် သတ်မှတ်နိုင်ရေး ဆောင်ရွက်ရာတွင် ငွေပေးခဲ့ရသော်လည်း ဆောင်ရွက်ပေးခြင်း မရှိသည့် အပြင် ရွာရှိနေအိမ်များအား နို့တစ်စာထုတ်၍ ဖျက်ဆီးခြင်း၊ ရွာဆိုင်းဘုတ်အား ဖျက်ဆီးခြင်း စသည်များ ဆောင်ရွက်လာသဖြင့် စစ်ဆေးဖော်ထုတ် အရေးယူပေးပါရန် နစ်နာသူမှ အဂတိလိုက်စားမှု တိုက်ဖျက်ရေး ကော်မရှင်သို့ တိုင်ကြားခဲ့ခြင်းဖြစ်ကြောင်း သိရသည်။

အဂတိလိုက်စားမှု တိုက်ဖျက်ရေးကော်မရှင်က စုံစမ်းစစ်ဆေးရေးအဖွဲ့ ဖွဲ့စည်းစစ်ဆေးခဲ့ရာ ပြင်ဦးလွင်မြို့နယ် အုပ်ချူပ်ရေးမှူး ဦးတင်နိုင်စိုး၊ ဒုတိယဦးစီးမှူး ဦးကျော်ကျော်နိုင်၊ အကြီးတန်းစာရေး ဦးအောင်စိုးမိုးတို့သည် မန်ကျည်းအင်းရွာသစ်တွင် ရွာမြေတိုးချဲ့ပေးရန်ကိစ္စ၌ ကျေးရွာနပြေည်သူများထံမှ ငွေကြေးများ ရယူခဲ့ကြောင်း စစ်ဆေးပေါ်ပေါက်ခဲ့ခြင်းဖြစ်ကြောင်း သိရသည်။

ဓာတ်ပုံ - ဦးရာဇ