~~~~~~~~⊰❂ unicode ❂⊱~~~~~~~~

ဘော်ဆိုင်းတွင်ကျင်းပမည့် ဓနုအကပဒေသာပြိုင်ပွဲတွင် ဓနုအမျိုးသားညီလာခံက သတ်မှတ်လိုက်သည့် အမျိုးသားဝတ်စုံများဖြင့် ယှဉ်ပြိုင်မည်
****************
ရှမ်းပြည်နယ်(တောင်ပိုင်း) ကလောမြို့နယ် ဘော်ဆိုင်းမြို့တွင် ဖေဖေါ်ဝါရီလ (၁၂)ရက်နေ့ ပြည်ထောင်စုနေ့ အထိမ်းအမှတ် ဓနုအကပဒေသာပြိုင်ပွဲတွင် ပထမအကြိမ် ဓနုအမျိုးသားညီလာခံ၌ သဘောတူသတ်မှတ်ပြီးသော ဓနုအမျိုးသား၊အမျိုးသမီးဝတ်စုံများဖြင့် ယှဉ်ပြိုင်မည်ဖြစ်ကြောင်း သိရသည်။

ရှမ်းပြည်နယ်(တောင်ပိုင်း) ကလောမြို့နယ် ဘော်ဆိုင်းမြို့တွင် ဖေဖေါ်ဝါရီလ (၁၂)ရက်နေ့ ပြည်ထောင်စုနေ့အထိမ်းအမှတ်အဖြစ် တတိယအကြိမ်မြောက် ဓနုလက်ဖက်ရည်ကြမ်းဝိုင်း မိတ်ဆုံစားပွဲတွင် ဓနုအကပဒေသာပြိုင်ပွဲ ထည့်သွင်းကျင်းပခြင်းဖြစ်သည်။

ဓနုတိုင်းရင်းသား သံဃာတော်များအဖွဲ့နှင့် ဓနုတိုင်းရင်းသားရေးရာအဖွဲ့တို့က ကြီးမှူးကျင်းပသည့် အဆိုပါပွဲအား ဘော်ဆိုင်းမြို့ ရွှေမြစည်းကျောင်းတိုက်တွင် နံနက် (၈)နာရီမှ နေ့လယ် (၂)နာရီအထိ ကျင်းပမည်ဖြစ်ပြီး ဓနုတိုင်းရင်းသားသံဃာတော်များအဖွဲ့ အစည်းအဝေးကျင်းပခြင်း၊ ဓနုလက်ဖက်ရည်ကြမ်းဝိုင်း အခမ်းအနား ကျင်းပခြင်း၊ ဓနုအကပြိုင်ပွဲ၊ ပိုက်ကျော်ခြင်းပြိုင်ပွဲ၊ ဘောလီဘောပြိုင်ပွဲများ ကျင်းပခြင်းနှင့် ဆုပေးပွဲအခမ်းအနားကျင်းပခြင်းတို့ ပါဝင်မည်ဖြစ်ကြောင်းသိရသည်။

ဓနုလက်ဖက်ရည်ကြမ်းဝိုင်း မိတ်ဆုံစားပွဲ၏ ပထမအကြိမ်ကို ၂၀၁၆ ခုနှစ်က ကလောမြို့တွင် ကျင်းပခဲ့ပြီး ဒုတိယအကြိမ်ကို ၂၀၁၇ ခုနှစ်က ဟဲဟိုးတွင် ကျင်းပခဲ့ခြင်းဖြစ်ကြောင်း သိရသည်။

ပထမဆုံးအကြိမ် ဓနုအမျိုးသားညီလာခံကို ၂၀၁၇ ခုနှစ် နိုဝင်ဘာလ (၂၆)ရက်နှင့် (၂၇)ရက်နေ့များတွင် ရှမ်းပြည်နယ်(တောင်ပိုင်း) ပင်းတယမြို့၌ ကျင်းပခဲ့ပြီး အဆိုပါညီလာခံတွင် ဓနုအမျိုးသား၊အမျိုးသမီးဝတ်စုံများကို အများသဘောတူ ရွေးချယ်သတ်မှတ်ခဲ့ကြခြင်းဖြစ်သည်။

သတင်း #ဇာနှင်း
ဓါတ်ပုံ #Myo Tun