~~~~~~~~⊰❂ unicode ❂⊱~~~~~~~~

ရှမ်း၊ ကယားနှင့် မကွေးတို့မှ ဆိုင်ကယ်အစီးရေ ၃၀ ခိုးယူခံရမှုအား စစ်ဆေးဖေါ်ထုတ်သည့် ကယားပြည်နယ်မှ ရဲတပ်ဖွဲ့ဝင်များနှင့် အရပ်သားသက်သေများကို ပြည်နယ်ဝန်ကြီးချုပ် ဂုဏ်ပြု
**********
ရှမ်းပြည်နယ်၊ မကွေးတိုင်းဒေသကြီးနှင့် ကယားပြည်နယ်တို့မှ ခိုးယူခံထားရသည့် ဆိုင်ကယ်အစီးရေ (၃၀)အား စစ်ဆေးဖေါ်ထုတ်နိုင်ခဲ့သည့် ရဲတပ်ဖွဲ့ဝင်(၉)ဦးနှင့် အရပ်သားသက်သေ(၂)ဦးတို့အား ဒီဇင်ဘာလ (၁၁)ရက်နေ့ တွင် ကယားပြည်နယ်ရဲတပ်ဖွဲ့မှူးရုံး ကန္ဒရဝတီခန်းမ၌ ပြည်နယ်ဝန်ကြီးချုပ်က ဂုဏ်ပြုမှတ်တမ်းလွှာ ချီးမြှင့်ကြောင်း သိရသည်။

ရှမ်းပြည်နယ် ညောင်ရွှေမြို့မရဲစခန်းတွင် မိတ္ထီလာမှ ဆိုင်ကယ်ခိုးသည့်အဖွဲ့များအား ဖမ်းဆီးရမိထားကြောင်း သတင်းအရ ကယားပြည်နယ်အတွင်း ပျောက်ဆုံးနေသည့် ဆိုင်ကယ်များ စုံစမ်းဖော်ထုတ်ရန် လွိုင်ကော်ခရိုင် မှုခင်း နှိမ်နှင်းရေးဌာနမှ ရဲအုပ်မြသန်းဦးစီးအဖွဲ့အား သွားရောက် စစ်ဆေးရန် တာဝန်ပေးအပ်ခဲ့သောကြောင့် နိုုဝင်ဘာလ (၂၂) ရက်နေ့တွင် ညောင်ရွှေမြို့မရဲစခန်းသို့ သွားရောက်ခဲ့ပြီး စစ်ဆေးခဲ့ရာမှ ဆိုင်ကယ်ခိုးယူသည့် အဖွဲ့မှ လူများအား ထပ်မံဖမ်းဆီးရမိပြီး ၎င်းတို့ခိုးယူထားသည့် ဆိုင်ကယ် အစီးရေ (၃၀)အား ဖေါ်ထုတ်နိုင်ခဲ့ခြင်းဖြစ်ကြောင်း သိရသည်။

စစ်ဆေးဖော်ထုတ်ရရှိသော သက်သေခံဆိုင်ကယ်များအား ဆိုင်ကယ်များရောင်းချထားသည့်နေရာများမှ သိမ်းဆည်းနိုင်ခဲ့ရာ သိမ်းဆည်းရမိသည့် HONDA CLICK (၉) စီး ၊ HONDA WAVE (၇) စီး၊ HONDA DREAM (၅) စီး ၊ HONDA CBR-150 (၃) စီး ၊ LUOJIA (၃) စီး၊ YAMAHA DT (၂) စီးနှင့် YAMAHA FZ (၁)စီးတို့အား သက်ဆိုင်ရာရဲစခန်းများသို့လွှဲပြောင်း၍ အမှုဖွင့်လှစ်ဆောင်ရွက်သွားမည် ဖြစ်ကြောင်း သိရသည်။

သတင်း #ဆန်းဖြိုးထွန်း
ဓါတ်ပုံ #ကယားပြည်နယ်ရဲတပ်ဖွဲ့မှူးရုံး