~~~~~~~~⊰❂ unicode ❂⊱~~~~~~~~

ရခိုင်ပြည်သူများအားကူညီရေး တာလေမြို့မှ ၄ ရက်အတွင်း လှူဒါန်းငွေ ကျပ် (၂၃၄၀၀၀)နှင့် ထိုင်းဘတ်(၇၀၉၀)ရရှိထားပြီး စက်တင်ဘာလ (၁၅)ရက်နေ့အထိ အလှူခံမည်
*******
ရခိုင်ပြည်နယ်ဒုက္ခသည်များအား ကူညီထောက်ပံ့ရန်အတွက် ရှမ်းပြည်နယ်အရှေ့ပိုင်း တာလေမြို့တွင် စက်တင်ဘာလ (၆) ရက်နေ့မှ (၉)ရက်နေ့အထိ (၄) ရက်တာကာလအတွင်း လာရောက်လှူဒါန်းမှုမှာ မြန်မာ ကျပ် (၂၃၄၀၀၀) နှင့် ထိုင်းဘတ်(၇၀၉၀) ရရှိထားပြီဖြစ်ပြီး စက်တင်ဘာလ (၁၅) ရက်နေ့အထိ ဆက်လက် အလှူခံသွားမည်ဖြစ်ကြောင်း သိရှိရသည်။

“စက်တင်ဘာလ (၁၆) ရက်နေ့ပြီးရင်တော့ အလှူခံထားလို့ရထားသမျှတွေကို တာချီလိတ်မြို့(ရခိုင်ပြည်နယ် ကူညီထောက်ပံ့ရေးကော်မတီ -တာချီလိတ်မြို့)  ကိုသွားပြီး အပ်နှံပေးမှာဖြစ်ပါတယ်။ သွားအပ်နှံတဲ့ အခါကျရင်တော့ တာလေက အုပ်ချုပ်ရေးဌာနတွေနဲ့ မြို့မိမြို့ဖတွေ၊ ဌာနဆိုင်ရာတွေ ပါဝင်မှာဖြစ်ပါတယ်။ တာချီလိတ်ကနေတစ်ဆင့် ရခိုင်ဒေသဒုက္ခသည်တွေကို အကုန်စုပေါင်းပြီး လှူမယ်လို့စီစဉ်ထားပါတယ်”ဟု ရခိုင်ပြည်နယ်ကူညီထောက်ပံ့ရေး အလှူခံဌာန (တာလေမြို့)မှ ဦးငြိမ်းသောင်က တာချီလိတ်သတင်းအေဂျင်စီသို့ ပြောသည်။

ရခိုင်ဒုက္ခသည်များအတွက် ရှမ်းပြည်နယ်အရှေ့ပိုင်း တာလေမြို့ အခြေခံပညာအထက်တန်းကျောင်းရှေ့တွင် တွင် စက်တင်ဘာလ(၆)ရက်နေ့မှစတင်၍ အလှူခံဌာနဖွင့်လှစ်ခဲ့ခြင်းဖြစ်ပြီး တာလေမြို့ခံများနှင့်အတူ ဌာနဆိုင်ရာများမှလည်း ကူညီပူးပေါင်း ပံ့ပိုးပေးလျှက်ရှိကြောင်း သိရှိရသည်။

ရခိုင်ပြည်နယ်မြောက်ပိုင်းတွင် သြဂုတ်လ(၂၅)ရက်နေ့မှစ၍ Arakan Rohingya Salvation Army (ARSA) အစွန်းရောက်ဘင်္ဂါလီအကြမ်းဖက်သမားများ ဝင်ရောက်တိုက်ခိုက်နေသဖြင့် ဒေသခံများမှာ နေရပ်စွန့်ခွာ ထွက်ပြေးနေကြရာ စက်တင်ဘာလ(၅)ရက်နေ့အထိ အကြမ်းဖက်မှုကြောင့် ပြည်တွင်း နေရပ်စွန့်ခွာရသူ တိုင်းရင်းသား (၂၆၇၄၇) ဦး ရှိနေပြီဖြစ်ကြောင်း သတင်းထုတ်ပြန်ရေးကော်မတီ၏ သတင်းထုတ်ပြန်ချက်အရ သိရသည်။