~~~~~~~~⊰❂ unicode ❂⊱~~~~~~~~

ရှမ်းပြည်နယ်အရှေ့ပိုင်း၊ တာချီလိတ်ခရိုင်၊ တာလေနှင့် ကျိုင်းလပ်သွားလမ်းတွင် ဇူလိုင်လ (၉)ရက်နေ့ နံနက်ပိုင်းက မိုးသည်းထန်၍ တောင်ကျရေတိုက်စားသွားသည့် ပေ(၂၀)အရှည် လက်ရန်းပါကွန်ကရစ်တံတားအား နေ့ချင်းပြီးပြင်ဆင်နေရာ ညနေ (၄)နာရီတွင် ကား၊ဆိုင်ကယ်များ ဖြတ်သန်းသွားနိုင်ပြီဖြစ်ကြောင်း  သိရသည်။

မိုးသည်းထန်စွာ ရွာသွန်း၍ တောင်ကျရေတိုက်စားမှုကြောင့် ဇူလိုင်လ(၉)ရက်နေ့ နံနက်(၅)နာရီခွဲဝန်းကျင်အချိန်က ပြိုကျပျက်စီးသွားသည့် ဝမ်လန်းရွာအဝင် ကွန်ကရစ်တံတား နှစ်ဘက်ကမ်းကပ်ခုံများနေရာတွင် သဲ၊ကျောက်ဖြည့်ခြင်းအား လုပ်ဆောင်ရာ မြေသားလမ်းပြီးစီးသွား၍ လမ်းဦးစီးဌာနက ဘေလီတံတားထိုးနိုင်ရေး ဆောင်ရွက်နေကြောင်း သိရသည်။

အဆိုပါ လမ်းပိုင်းတွင် ဆက်သွယ်ရေးမပြတ်တောက်ရန် လမ်းဦးစီးဌာနမှ ဘက်ဟိုး (၃)စီး၊ ကျိုင်းလပ်မြို့ မီးလင်းရေးမှ ဘက်ဟိုး(၁)စီးဖြင့် လုပ်ငန်းများဆောင်ရွက်ခဲ့ပြီး မြို့နယ်လမ်းဦးစီးဌာန၊ ကျိုင်းလပ်မြို့အုပ်ချုပ်ရေးမှူးရုံးနှင့် ရုံးအဖွဲ့များ၊ ရတခမရ(၃၂၉)နှင့် ခမရ (၃၁၆)တို့မှ တပ်မတော်သားများ၊ တာလေပြည်သူ့စစ်အဖွဲ့၊ မိုင်းပါလျှိုးကျေးရွာအုပ်စုအုပ်ချုပ်ရေးမှူးနှင့် ကျေးရွာသားများ ဝိုင်းဝန်းကူညီဆောင်ရွက်ခဲ့ကြခြင်းဖြစ်ကြောင်း သိရသည်။