~~~~~~~~⊰❂ unicode ❂⊱~~~~~~~~

ရှမ်းပြည်နယ်(မြောက်ပိုင်း) ကျောက်မဲမြို့ အမှတ်(၂)ရပ်ကွက်၊ သစ်တောလမ်းရှိ ပုဂ္ဂလိက တာဝန်ယူ ဖွင့်လှစ်ထားသည့် M II K ရေကူးကန်တွင် ဇူလိုင်လ (၁၆) ရက် နံနက် (၁၀)နာရီ မိနစ် (၄၀)ဝန်းကျင်က အမျိုးသားတစ်ဦး ရေဆင်းကူးရာမှ ရေနစ်သေဆုံးမှုဖြစ်ပွားကြောင်း သိရသဖြင့် သက်ဆိုင်ရာက စစ်ဆေး လျက်ရှိကြောင်း သိရသည်။

“သူက ကျွန်တော့်ထက် ရေကူးကျွမ်းတယ်။ ဝုန်းဆိုခုန်ဆင်းသွားတာ ရေငုတ်နေတယ်မှတ်လို့ ခဏစောင့်ကြည့်သေးတယ်။ တော်တော်ကြာလို့ ပေါ်မလာတော့မှ ကျွန်တော်လိုက်ရှာတာ မတွေ့ဘူး။ အဲဒါနဲ့ရေကူးကန်က တာဝန်ရှိသူတွေကိုအကြောင်းကြားလိုက်တာ။ အဲဒီကတစ်ဆင့် မီးသတ်အဖွဲ့ ရောက်လာပြီး လာရှာပေးတော့မှ တွေ့တာ။ တွေ့တဲ့အချိန်မှာ သေနပြေီ”ဟု ရေကူးကန်တွင် အတူရေလာကူးသူ ကိုသိန်းသန်းထွေးက တာချီလိတ် သတင်းအေဂျင်စီသို့ ပြောသည်။

ကျောက်မဲမြို့ အမှတ်(၇) ရပ်ကွက်မှ အသက်(၂၅)နှစ်ဝန်းကျင် တွတ်ပီဆိုသူသည် သူငယ်ချင်းဖြစ်သူနှင့်အတူ ရေလာကူးချိန်တွင် ရေကူးကန်၌ အစောင့်ဝန်ထမ်းမရှိကြောင်း သိရပြီး ရေနစ်သွားချိန်တွင် သူငယ်ချင်းဖြစ်သူက ရေငုပ်ရှာရာမတွေ့သဖြင့် ရေကူးကန်အနီးရှိ M II Kဘီယာဆိုင်မှ ဝန်ထမ်းအား အကူအညီတောင်းခဲ့ခြင်းဖြစ်ကြောင်း သိရသည်။

ရေနစ်သည့်သတင်းကြောင့် မီးသတ်အဖွဲ့၊ မြို့နယ်စည်ပင်၊ ရဲတပ်ဖွဲ့ဝင်များ ရောက်ရှိလာပြီး မီးသတ်ရဲဘော်(၅)ဦး ဆင်းရှာရာမှ အလောင်းအား တွေ့ရခြင်းဖြစ်ကြောင်း သိရသည်။

“အဖြူရောင်နှလုံးသား ပရဟိတအသင်းက လာပြီးသယ်လာခဲ့ပေးတယ်လို့ သိရတယ်။ ခန္ဓာကိုယ်ကတော့ ပြည်သူ့ ဆေးရုံ ရင်ခွဲရုံမှာပို့ထားတယ်။ သေဆုံးသူရဲ့ မိသားစုဝင်တွေကို ဆက်သွယ်ထားပါတယ်။ မိသားစုဝင်တွေရောက်လာမှ ထပ်ပြီးမေးမြန်းရဦးမှာပါ။ စစ်ဆေးနေဆဲပဲရှိပါသေးတယ်”ဟု ရေနစ်သေဆုံးမှုဖြစ်စဉ်အား လာရောက်စစ်ဆေး နေသူကျောက်မဲမြို့မရဲတပ်ဖွဲ့မှ ရဲအရာရှိက တာချီလိတ်သတင်းအေဂျင်စီသို့ ပြောသည်။

အဆိုပါ ရေကူးကန်တွင် ယခုနှစ်အတွင်း ကလေးငယ် တစ်ဦးရေနစ်မှုဖြစ်ပွားခဲ့သော်လည်း အချိန်မီကယ်ဆယ်နိုင်ခဲ့ကြောင်း သိရသည်။

ရေကူးကန်သို့ကလေးငယ်များ လာရောက်ရေကစားချိန်များတွင် အသက်ကယ်ဘောကွင်းနှင့် ရေနစ်သူအား ကယ်ဆယ်ရေးအစောင့်ထားရှိသော်လည်း ယခုဖြစ်စဉ်ဖြစ်ပွားသည့်အချိန်တွင် အသက်ကယ်ဘောကွင်း နှင့် ကယ်ဆယ်ရေးအစောင့်ရှိမနေကြောင်း သိရသည်။

သတင်း၊ဓာတ်ပုံ - #နဖြေိုးမြင့်