လမ်းနယ်နိမိတ်နှင့် မလွတ်ကင်းသည့် အဆောက်အဦများ စာရင်းကို စစ်ဆေးကောက်ယူထားပြီး လက်ရှိ အခြေအနေထက် တိုးမလာစေရန် ဆောင်ရွက်နေကြောင်း တနင်္သာရီတိုင်းဒေသကြီး ဆောက်လုပ်ရေး ဝန်ကြီးဌာန၊ လမ်းဦးစီးဌာနမှ သိရသည်။

“ကွင်းဆင်းကြည့်တယ်ဆိုတာက နပြေည်တော် ဆောက်လုပ်ရေးဝန်ကြီးဌာနက စာရင်းပြုစုခိုင်းပြီး တင်ခိုင်းတာကြောင့်ပါ။ မြို့တွင်း၊ ရွာတွင်းမှာ နယ်နိမိတ်မလွတ်တဲ့ အဆောက်အဦ၊ သစ်ပင်၊ ဓာတ်တိုင်၊ ဖုန်းတာဝါတိုင်၊ ကေဘယ်လ်ကြိုးတွေစာရင်းကို ပြုစုတဲ့သဘောပါ။ ရှိပြီးသား အဆောက်အဦတွေကို မဖျက်ပါဘူး”ဟု လမ်းဦးစီးဌာနဦးစီးအရာရှိ ဦးအောင်ကျော်ညွန့်က ပြောသည်။

လမ်းနယ်နိမိတ်နှင့် မလွတ်ကင်းသည့် စာရင်းကိုကောက်ယူနပြေီး လက်ရှိအခြေအနေထက် တိုးမလာစေရန် ထိန်းသိမ်းဆောင်ရွက်သွားမည် ဖြစ်သော်လည်း လက်ရှိအဆောက်အဦများကို ဖြိုဖျက်သွားမည် မဟုတ်ကြောင်း သိရသည်။

မြို့ရွာနှင့် အလှမ်းေဝးသည့် လမ်းမကြီးများအနီးရှိ ပလပ်မြေများတွင် နေအိမ်၊ဆိုင်ခန်းများ မဆောက်လုပ် ကြရန်ကိုလည်း သတိပေးလိုက်ပြီး မလိုက်နာပါက လမ်းမကြီးများ ဥပဒေအတိုင်း အရေးယူ ဆောင်ရွက်သွားမည်ဖြစ်ကြောင်း သိရသည်။

“ ဒီလိုလုပ်တာ ကောင်းတယ်။ မြို့ထဲက တချို့ဆိုင်တွေဆိုရင် ဆိုင်းဘုတ်တွေက လမ်းပေါ် ရောက်နပြေီလေ။ လူသွားလမ်းမှာလည်း ဆိုင်ခန်းကိုချဲ့ပြီး ဆောက်ထားတာတွေရှိတယ်။ အခုလို စိစစ်လိုက်တော့ လုပ်ချင်တဲ့သူတောင် မလုပ်ရဲတော့ဘူးပေါ့”ဟု ကုန်စုံဆိုင်ဖွင့်လှစ်ထားသူ ဒေသခံတစ်ဦးက ပြောသည်။

လမ်းဦးစီးဌာန၏ ခွင့်ပြုချက်မယူဘဲ လမ်းမကြီးများ၏ နယ်နိမိတ်အတွင်း အဆောက်အဦဆောက်လုပ်ခြင်း ပြုလုပ်ကြောင်း ပြစ်မှုထင်ရှား တရားစီရင်ခြင်းခံရလျှင် ပုဒ်မ( ၇-က )အရ ဒဏ်ငွေ အနည်းဆုံးကျပ်(၁)သိန်းမှ အများဆုံးကျပ်(၅)သိန်းထိသော်လည်းကောင်း၊ ပုဒ်မ (၇-ခ)အရ မည်သူမဆို ပုဒ်မ (၇-က)ပါပြစ်မှုကိုထပ်မံ ကျူးလွန်ပါက ထောင်ဒဏ်(၁)နှစ်အပြင် ဒဏ်ငွေ ကျပ်(၁)သိန်းမှ ကျပ်(၁၀)သိန်းအထိ သော်လည်းကောင်းချမှတ်ခြင်းခံ ရမည်ဖြစ်ကြောင်း သိရသည်။

လမ်းမကြီးများဥပဒေကို ၂၀၀၀ ခုနှစ် နိုဝင်ဘာလ (၁၇ ) ရက်နေ့တွင်ပြဌာန်းခဲ့ခြင်းဖြစ်ပြီး၂၀၁၄ ခုနှစ်တွင် ပြင်ဆင်ခဲ့ကာ ၂၀၁၅ ခုနှစ် နိုဝင်ဘာလ (၁၇) ရက်နေ့တွင် ပြည်ထောင်စုလွှတ်တော် ဥပဒေအမှတ် (၃၃) ဖြင့် နိုင်ငံတော်သမ္မတက လက်မှတ်ရေးထိုးထုတ်ပြန်ခဲ့ခြင်း ဖြစ်သည်။

သတင်း - #ရွှေဇော်