မြန်မာနိုင်ငံမှ လိုင်စင်ရှိ မော်တော်ဆိုင်ကယ်များအား ထိုင်းနိုင်ငံအတွင်း ၀င်ရောက်ခွင့် လက်မှတ်များကို တစ်စီးလျှင် ဘတ်(၅၀)ဖြင့် ပြုလုပ်ပေးနေပြီဖြစ်ကြောင်း ဒေသခံများမှသိရသည်။
ထိုင်းနိုင်ငံတွင်း ၀င်ခွင့် ကဒ်ပြားများအား ထိုင်းနိုင်ငံ၊ မယ်ဆိုင်မြို့ရှိ အကောက်ခွန်ရုံးတွင် ပြုလုပ်ပေးခြင်းဖြစ်ရာ မြန်မာနိုင်ငံမှ သွားရောက် စာရင်းပေးသွင်းသူ များပြားလျှက်ရှိကြောင်း သိရသည်။
"မယ်ဆိုင်သွားမယ်ဆို သူတို့နိုင်ငံတွင်းဝင်ဖို့ ဆိုင်ကယ်မှာကပ်တဲ့ လေဆာပြားတွေ မပါရင် မရဘူး ဒီလေဆာပြားတွေကို Scan ဖတ်ပြီး ကွန်ပျူတာမှာ မှတ်တမ်းတင်တာ အ၀င်မှတ်တမ်းရှိတဲ့ ဆိုင်ကယ်မှ ပြန်ထွက်လို့ရတာ"ဟု ထိုင်းနိုင်ငံတွင်း ဆိုင်ကယ်ဖြင့် ၀င်ရောက်ခွင့် ကဒ်ပြားသွားရောက် ပြုလုပ်သူ ကိုသားကြီးမှပြောသည်။
ဝင်ရောက်ခွင့်ကဒ်ပြားများ ပြုလုပ်မည့်သူများမှာ ဆိုင်ကယ်လိုင်စင်ပါ အမည်မဟုတ်ပါက Owner Book ပါ သူထံမှ လွှဲပြောင်းပြီးကြောင်း ထောက်ခံစာ လိုအပ်ကြောင်းသိရပြီး ပြုလုပ်ပေးသည့်ရက်မှာ အကန့်အသတ် မရှိသေးကြောင်း သိရသည်။
ယခင်က ဆိုင်ကယ်တစ်စီးဘတ်(၃,၀၀၀)နှုန်း ဖြင့် ပြုလုပ်ပေးခြင်းဖြစ်ပြီး လစဉ်ကြေး ဘတ်(၅၀)ကောက်ခံကြောင်း၊ သတ်မှတ်ထားသော ရက် ကျော်လွန်သွားပါက ဘတ်(၁,၀၀၀)ဒဏ်ငွေ ပေးဆောင်ရကြောင်းနှင့် ရှေ့ဆက်လက်၍လည်း သတ်မှတ်ရက် ကျော်လွန်ပါက တစ်ရက်လျှင် (၁,၀၀၀)ဘတ်အဖြစ် ဒဏ်ငွေကောက်ခံသွားမှာ ဖြစ်ကြောင်း သိရသည်။
သတင်း/ဓါတ်ပုံ။ ။ ဒက်ကြီး
