တာချီလိတ်ခရိုင်၊ မိုင်းယောင်းမြို့နယ်တွင် မြို့နယ်စီမံခန့်ခွဲမှု ဥက္ကဌ ဖလား ဘောလုံးပြိုင်ပွဲကို၂၀၁၄ခုနှစ် ဒီဇင်ဘာလ (၁)ရက်နေ့မှ ၂၀၁၅ခုနှစ် ဇန်န၀ါရီလ(၃)ရက်နေ့အထိ မိုင်းယောင်းမြို့နယ် အားကစားကွင်းတွင် ကျင်းပပြုလုပ်ရာ ရပ်ကွက်(၈)ကိုယ်စားပြု လွယ်ပန်နောင်အသင်းက ပထမဆုရရှိသွားကြောင်း သိရသည်။
အဆိုပါ ပြိုင်ပွဲတွင် ရပ်ကွက်/ကျေးရွာ အသင်းများ နှင့် ဌာနဆိုင်ရာကိုယ်စားပြု အသင်းများ စုစုပေါင်း (၁၄)သင်း ပါဝင်ယှဉ်ပြိုင်ခဲ့ကြပြီး ဇန်န၀ါရီလ(၃)ရက်နေ့က ကျင်းပပြုလုပ်သည့် နောက်ဆုံး ဗိုလ်လုပွဲတွင် ရပ်ကွက်(၈)ကိုယ်စားပြု လွယ်ပန်နောင်အသင်းက စစ်မှုထမ်းဟောင်းအဖွဲ့ ကိုယ်စားပြု အားမာန်စစ်အသင်းကို ၁-၀ဂိုးဖြင့် အနိုင်ရရှိကာ ပထမဆု ရရှိသွားတာဖြစ်ကြောင်း မိုင်းယောင်းမြို့နယ် အုပ်ချုပ်ရေးမှူး ဦးကျော်ဇေယျာလင်းက ပြောကြားသည်။
ယင်းဆုပေးပွဲအခမ်းအနားသို့ တပ်နယ်မှ နည်းဗျူဟာမှူး ဗိုလ်မှူးကြီး ဝေလင်းအောင်နှင့် တပ်ရင်းမှူးများ၊ မြို့နယ်စီမံခန့်ခွဲမှုကော်မတီ ဥက္ကဌ၊ မိုင်းယောင်းမြို့နယ် အုပ်ချုပ်ရေးမှူး ဦးကျော်ဇေယျာလင်း နှင့် ကော်မတီအဖွဲ့ဝင်များ၊ လွှတ်တော်ကိုယ်စားလှယ်များ၊ အထောက်အကူပြုအဖွဲ့အစည်းများ၊ လူမှုရေးအသင်း အဖွဲ့များ နှင့် ပရိသတ်များ တက်ရောက်၍ အားပေးခဲ့ကြောင်း သိရသည်။
မိုင်းယောင်းမြို့နယ်အုပ်ချုပ်ရေးမှူး ဦးကျော်ဇေယျာလင်းက "ဒီလိုပွဲ မကျင်းပဖြစ်တာ၊ အဆတ်ပြတ်သွားတာဆိုရင် (၃)နှစ်လောက်ရှိပါပြီ၊ အခုက လူငယ်တွေလည်း အားပါကြတာရယ်၊ တောင်းဆိုကြတာနဲ့ပဲ ပြိုင်ပွဲကို ကျင်းပဖြစ်တာပါ.."ဟု တာချီလိတ်အွန်လိုင်းသို့ ပြောသည်။
ပထမဆုရရှိသည့် ဘောလုံးအသင်းနှင့် ဆုများရရှိသည့် အားကစားသမားများအား မြို့နယ်စီမံခန့်ခွဲမှု ကော်မတီ ဥက္ကဌ၊ မိုင်းယောင်းမြို့နယ် အုပ်ချုပ်ရေးမှူး ဦးကျော်ဇေယျာလင်း နှင့် တာဝန်ရှိသူများက ဆုများအသီးသီး ပေးအပ်ချီးမြှင့်ခဲ့ကြကြောင်း သိရသည်။
