ရှမ်းပြည်နယ်(အရှေ့ပိုင်း)၊ တာချီလိတ်ခရိုင်၊ တာချီလိတ်မြို့နယ်အတွင်း နှင့် တာလေမြို့နယ်ခွဲရှိ တပ်မြေအဖြစ် အသုံးပြုရန် သိမ်းဆည်းခဲ့သည့် မြေဧရိယာများအနက်မှ မဖြစ်မနေ အသုံးပြုရန်လိုအပ်သည့် မြေဧရိယာမှလွဲ၍ ကျန်မြေများအား မူလပိုင်ရှင်များထံသို့ လုပ်ထုံးလုပ်နည်းနှင့်အညီ လွှဲအပ်ပေးနိုင်ရေး ပြန်လည်သုံးသပ် အကြံပြုတင်ပြနိုင်ရန်အတွက်  စက်တင်ဘာလ ၁၂ရက်နေ့ နံနက် ၁၀နာရီ မိနစ် ၂၀မှ ညနေ ၃နာရီ မိနစ် ၃၅မိနစ်အချိန်ထိ တြိဂံဒေသတိုင်း စစ်ဌာနချုပ်မှ တာဝန်ရှိသူများနှင့်  သက်ဆိုင်ရာ ဌာနများ အပါအ၀င် လွှတ်တော်ကိုယ်စားလှယ်များ နှင့် မြို့မိမြိုဖများ အပါအ၀င် တာဝန်ရှိသူများမှ သွားရောက်၍ တပ်မြေဧရိယာများအတွက် လိုက်လံကြည်ရှု့ စစ်ဆေးခဲ့ကြကြောင်း သိရသည်။

အဆိုပါကိစ္စနှင့် ပတ်သက်၍ တပ်မတော်ဘက်မှ ကိုယ်စားလှယ်အဖြစ်  တြိဂံဒေသတိုင်း စစ်ဌာနချုပ်မှ ဒုတိယ ဗိုလ်မှူးကြီးသက်အောင် နှင့် အဖွဲ့ဝင်များ၊ တာချီလိတ်မြို့နယ်အုပ်ချုပ်ရေးမှူး ဦးရဲထူး၊ မြို့နယ် မြေစာရင်းဦးစီးမှူး ဦးရဲရင့်ထွဋ်၊  မြို့နယ်စည်ပင်သာယာရေးအဖွဲ့ အမှုဆောင်အရာရှိ ဦးကိုကို နှင့် ပြည်သူ့လွှတ်တော်ကိုယ်စားလှယ် ဦးစိုင်းသိန်းအောင်၊ အမျိုးသားလွှတ်တော်ကိုယ်စားလှယ် ဦးဝီလ်ဆင်မိုး၊ ပြည်နယ်လွှတ်တော်ကိုယ်စားလှယ် ဒေါ်တင်မေထွန်း၊ မြို့မိမြို့ဖ ဦးကြည်မြင့် နှင့် ဦးကျော်ငြိမ်း၊ နိုင်ငံရေးပါတီအချို့မှ ကိုယ်စားလှယ်များ လိုက်ပါလာပြီး တပ်ပိုင်မြေအဖြစ် သိမ်းဆည်းခဲ့သည့် စိုက်ပျိုးမြေနေရာများနှင့် တပ်ပိုင်မြေအတွင်း ကျူးကျော်နေမှုများအား လိုက်လံကြည့်ရှုခဲ့ကြသည်။

ယခုကဲ့သို့ သွားရောက် ကြည့်ရှု့ခဲ့သော မြေဧရိယာများမှာ တာချီလိတ်မြို့နယ်အတွင်း အခြေချ စစ်ဗျူဟာ တပ်မြေဧရိယာ၊ ခမရ ၃၃၁ နှင့် ခမရ ၅၂၆ တပ်မြေဧရိယာများဖြစ်ပြီး တာလေမြို့နယ်ခွဲအတွင်း ဧရိယာမှာ ခမရ ၃၁၆ ၏ တပ်မြေဧရိယာတို့ဖြစ်ပြီး သက်ဆိုင်ရာ တပ်များမှ အသုံးပြုရန် မလိုအပ်သည့် မြေဧရိယာများအား မူလပိုင်ရှင်များ လက်ဝယ်သို့ လုပ်ထုံးလုပ်နည်းနှင့်အညီ စနစ်တကျ လွှဲအပ်ပေးနိုင်ရေးအတွက် သက်ဆိုင်ရာတာဝန်ရှိသူများမှ ဆက်လက်၍ အတည်ပြု လုပ်ဆောင်ပေးသွားမှာ ဖြစ်ကြောင်း သိရှိရသည်။

ပုံများကြည့်ရန်
အသုံးပြုရန် မလိုအပ်သည့် တပ်မြေဧရိယာများအား ပြန်လည်ပေးအပ်မည်