စက်တင်ဘာလ ၅ ရက်နေ့ ညက မိုးရွာသွန်းမှုကြောင့် စက်တင်ဘာလ ၆ ရက်၊ နေ့လည်ပိုင်းမှစ၍ ညနေထိ တာချီလိတ်မြို့နယ်၊ မိုင်းကိုးကျေးရွာအုပ်စုရှိ ဆီလီငေါ့ နှင့် အနီးအနားရှိ ကျေးရွာများအတွင်း ရေလွှမ်းမိုးမှုများဖြစ်ပေါ်ခဲ့ရာ အချို့နေရာများတွင် အမြင့် ၅ ပေခန့်ရှိပြီး အချို့နေရာများတွင် အမြင့် ၃ပေခန့် ရှိကြောင်း သိရသည်။

ရေလွှမ်းမိုးမှုဖြစ်ပွားရာ ကျေးရွာများသို့ တာချီလိတ်ခရိုင်အုပ်ချုပ်ရေးမှူး ဦးသောင်းတင်ထွေး၊ ခရိုင်ရဲတပ်ဖွဲ့မှူး ဒုတိယရဲမှူးကြီး နေမျိုးထွဋ် ၊ ခရိုင်လ၀က ဒုတိယညွှန်ကြားရေးမှူး ဦးကျော်စွာလွင် နှင့် မြို့နယ်အုပ်ချုပ်ရေးမှူး ဦးရဲထူးတို့ ဦးဆောင်သော သက်ဆိုင်ရာ ဌာနဆိုင်ရာများ၊ တပ်မတော်သားများ၊ ရဲတပ်ဖွဲ့ဝင်များ၊ နိုင်ငံရေးပါတီများ၊ တာချီလိတ်မြို့နယ် မီးသတ်တပ်ဖွဲ့ဝင်များ၊ ကြက်ခြေနီတပ်ဖွဲ့ဝင်များ အပါအ၀င် လူမှုကူညီရေးအသင်းအဖွဲ့များ စသည့်အဖွဲ့များမှ သွားရောက်ပြီး ရေသန့်ဗူးများ နှင့် ခေါက်ဆွဲခြောက်များ၊ ကြက်ဥများ ပေးဝေခဲ့ကြပြီး လိုအပ်သည့် ကယ်ဆယ်မှုများကိုလည်း ဆောင်ရွက်ခဲ့ကြသည်။

ရေဘေးသင့် ကျေးရွာသား/သူများအား သောက်ရေသန့်များ ပေးဝေငှနိုင်ရန်အတွက် တာချီလိတ်မြို့ သောက်ရေသန့်လုပ်ငန်းရှင်များအသင်းမှ သောက်ရေသန့် ၂၅၀ ကဒ် နှင့် အဆွေတော်မီနီမတ်မှ ခေါက်ဆွဲခြောက်များကို တဆင့် ပေးအပ်လှူဒါန်းကြပြီး နိုင်ငံရေးပါတီများ နှင့် လူမှုကူညီရေး အသင်းများမှလည်း အစားအစာများ ပေးအပ်ကာ ကူညီမှုများ ဆောင်ရွက်ပေးနေကြသည်ကိုလည်း တွေ့ရှိရသည်။

"နှစ်စဉ်လိုလို ရေကြီးခဲ့ပေမဲ့ အခုလို ဆိုးဆိုးရွာရွားကြီးတော့ မကြီးဖူးဘူး၊ ဒီတခါ ရေကြီးတာ တော်တော်များတယ်၊ တစ်ချို့နေရာတွေဆိုရင် ရေမြုပ်တာ လည်ပင်းထိရှိတယ်"ဟု ဆီလီငေါ့ရွာသားတစ်ဦးမှ တာချီလိတ်အွန်လိုင်းသို့ ပြောလာသည်။

မိုင်းကိုးကျေးရွာအုပ်စုတွင် နှစ်စဉ်ရေကြီးသော်လည်း ယခုလို ဆိုးဆိုးရွားရွား မဟုတ်ပဲ အနည်းငယ်သာကြီးကြောင်းနှင့် ယခုလို ရေကြီးမှုသည် မိုင်းကိုးကျေးရွာအုပ်စု၏ ဒုတိယအကြိမ်မြောက် ရေလွှမ်းမိုးမှု ဖြစ်ကြောင်း သိရသည်။

ယခုလို ရေလွှမ်းမိုးမှုကြောင့် လူနေအိမ်များနှင့် အိမ်မွေးတိရစ္ဆာန်များ ပျက်စီး၊ ပျောက်ဆုံး၊ သေဆုံးခြင်း မရှိကြောင်းလည်း သိရှိရသည်။

ပုံများကိုကြည့်ရန်
မိုင်းကိုးကျေးရွာအုပ်စု၌ ရေလွှမ်းမိုးမှုဖြစ်ပေါ် (၂)

ဒုတိယအကြိမ်အဖြစ် မိုင်းကိုးကျေးရွာအုပ်စု၌ ရေလွှမ်းမိုးမှုဖြစ်ပေါ်