တာချီလိတ်မြို့ "အမျိုးဘာသာ သာသနာ ကိုယ်သာစောင့်ရှောက်ရာ"အဖွဲ့ကြီးမှ "ဇီဝက"အခမဲ့ဒါန ဆေးကုသခန်းကို ယနေ့နံနက်(၉း၃၀)က ၀မ်ကောင်းရပ်ကွက်၊ ဘုရင့်နောင်ဈေးတိုက်တန်းရှိ တိုက်ခန်းမှာ ဖွင့်ပွဲအဖြစ်ပြုလုပ်ရာ ရွှေည၀ါဆရာတော်က ကြွရောက်ပြီး ဖွင့်လှစ်ပေးခဲ့ကြောင်း သိရပါတယ်။

ရွှေည၀ါဆရာတော်က ဆေးလှူဒါန်းရခြင်း အကျိုးကျေးဇူးကို ရှင်းလင်းဟောကြားပြီးနောက်မှာတော့ ဆရာတော်အား လှူဖွယ်ပစ္စည်းများ ဆက်ကပ်ခြင်းအပြင် မဇ္ဈိမ လူမှုကူညီရေးအသင်းမှ ဥက္ကဌ ဖြစ်သူ ဦးတင့်ဆွေ ကလည်း "ဇီဝက"အခမဲ့ဒါန ဆေးကုသခန်းအတွက် အလှူငွေ (၁၀၀၀၀)ဘတ်တိတိကို လှူဒါန်းခဲ့ကြပါတယ်။

ယခုဖွင့်လိုက်တဲ့ "ဇီဝက"အခမဲ့ဒါန ဆေးကုသခန်းကို တနင်္လာ၊ ဗုဒ္ဓဟူး နဲ့ စနေနေ့များမှာ ဖွင့်လှစ်မှာဖြစ်ပြီး ကုသချိန်ကိုတော့ နံနက်(၉)နာရီမှ နေ့လည်(၁၂)နာရီထိ သတ်မှတ်ထားတယ်လို့ သိရပါတယ်။ လောလောဆယ် အခမဲ့ဆေးကုသခန်းမှာ ကုတင်(၃)လုံးထားရှိထားပြီး ဆေးကုသပေးမဲ့ ဆရာဝန်များကလည်း ကုသိုလ်ယူကာ အခကြေးငွေမယူပဲ ကုသပေးမှာဖြစ်တယ်လို့ သိရပါတယ်။

အခမဲ့ဒါန ဆေးကုသခန်း ဖွင့်လှစ်လိုက်တာနဲ့ ပတ်သက်ပြီး "အခုလို အခမဲ့ဆေးကုသခန်း ဖွင့်ထားတယ်ဆိုတော့ မရှိနွမ်းပါး ပြည်သူတွေအတွက် ၀မ်းသာစရာပေါ့၊ တစ်ခုတော့ ရှိတာပေါ့နော်၊ ဇီဝက အခမဲ့ဒါန ဆေးခန်းကို သွားပြချင်တယ်ဆိုရင်တော့ သူတို့ ဖွင့်တဲ့နေ့နဲ့ ကုပေးတဲ့ အချိန်အတွင်းမှာ သွားမှ ရမှာပေါ့၊ ဘာပဲဖြစ်ဖြစ် အခုလို အခမဲ့ဆေးကုသခန်း ထွက်ပေါ်လာတာ အားလုံးအတွက် ၀မ်းသာစရာပါ"လို့ ၀မ်ကောင်းရပ်ကွက်အတွင်းမှာ နေထိုင်တဲ့ အမျိုးသမီးတစ်ဦးက ပြောပါတယ်။

"အမျိုးဘာသာ သာသနာ ကိုယ်သာစောင့်ရှောက်ရာ"အဖွဲ့ကြီးမှာ "တရားပွဲဖြစ်မြောက်ရေးအဖွဲ့"၊ "မေတ္တာရှင် သာရေး နာရေး ကူညီမှုအသင်း" နဲ့ ယခုဖွင့်လိုက်တဲ့ "ဇီဝက"အခမဲ့ဒါန ဆေးကုသခန်း ဆိုပြီး အဖွဲ့သုံးဖွဲ့ ခွဲ့ကာ လူမှုအကျိုးပြုလုပ်ငန်းများကို ဆောင်ရွက်ပေးနေတဲ့ အဖွဲ့ကြီးဖြစ်ကြောင်း သိရပါတယ်။

ပုံများကိုကြည့်ရန်
"ဇီဝက"အခမဲ့ဒါန ဆေးကုသခန်းဖွင့်ပွဲကို ရွှေညဝါဆရာတော်မှ ကြွရောက်ဖွင့်လှစ်