တာချီလိတ်ခရိုင်အတွင်းရှိ မြို့နယ်များမှ ၂၀၁၂-၂၀၁၃ခုနှစ် ပညာသင်တွင် တက္ကသိုလ်ဝင် စာမေးပွဲအောင်မြင်ပြီး ၂၀၁၃-၂၀၁၄ပညာသင်နှစ် ဆေးတက္ကသိုလ်၊ သွားဖက်ဆိုင်ရာ ဆေးတက္ကသိုလ်၊ စိုက်ပျိုးရေးတက္ကသိုလ်၊ ပညာရေးတက္ကသိုလ်၊ နည်းပညာတက္ကသိုလ်နှင့် ကွန်ပျူတာတက္ကသိုလ် တစ်ခုခုတို့တွင် ပညာသင်ကြားခွင့်ရရှိသူများအား တက္ကသိုလ်ပညာ သင်ကြားနိုင်ရေးအတွက် ဦးတင်မောင်ပညာသင်ဆု ချီးမြှင့်ပေးမည်ဖြစ်ကြောင်း သိရသည်။
'ဦးတင်မောင် ပညာသင်ဆု' အစီအစဉ်အား (၂၀၀၅)ခုနှစ်ကတည်းက စတင်၍ ပညာသင်ဆုများ ချီးမြှင့်ပေးခဲ့တာဖြစ်ပြီး ပညာသင်ဆုလျှောက်ထားမည့်သူသည် တက္ကသိုလ်ဝင်တန်း စာမေးပွဲတွင် ထူးချွန်စွာ အောင်ခဲ့သူ၊ စီးပွားရေး ချို့တဲ့ပြီး မိဘနှစ်ပါး စလုံး မရှိသောသူ၊ သို့မဟုတ် မိဘတစ်ပါးပါး မရှိသူ၊ မိဘနှစ်ပါးရှိသော်လည်း စီးပွားရေးချို့တဲ့သူ၊ ၀န်ထမ်းသားသမီး ဖြစ်ပါက လစာနည်း ၀န်ထမ်းသားသမီး ဖြစ်ရမည်ဟု သတ်မှတ်ထားကြောင်း၊ ပညာသင်ကြားစဉ်အတွင်း ကျောင်း စည်းကမ်း မလိုက်နာခြင်း၊ ကျောင်းမှ ထုတ်ပယ်ခံရခြင်း၊ စာမေးပွဲ ကျရှုံးခြင်းဖြစ်ပါက ပညာသင်ဆု ရပ်ဆိုင်းမည်ဟု စည်းကမ်းချက် ထုတ်ပြန်ထားကြောင်း နှင့် လျှောက်ထားသူသည် နိုင်ငံသား စိစစ်ရေးကတ်ပြားမိတ္တူ၊ လျှောက်ထား သူ၏ ကာလာဓာတ်ပုံလေးပုံ၊ တက္ကသိုလ် ၀င်တန်းအောင် အမှတ်စာရင်း မိတ္တူ၊ သက်ဆိုင်ရာ တက္ကသိုလ်တွင် တက်ရောက်သင်ကြားနေကြောင်း ထောက်ခံစာ မူရင်းတို့ လိုအပ်မည် ဖြစ်ကြောင်း မြန်မာတိုင်း(မ်)၏ ဖော်ပြထားချက်အရသိရသည်။
တာချီလိတ်မြို့နယ်မှ ပညာသင်ဆု လျှောက်ထားလိုသူများအနေဖြင့် တာချီလိတ်မြို့ ပညာရေးမှူးရုံးသို့ သွားရောက် စုံစမ်းမေးမြန်းနိုင်ကြောင်း သိရှိရသည်။
