မိုင်းဖုန်းဆရာတော် ဘဒ္ဒန္တဥာဏသံဝရသည် (၃)နှစ် ကာလတိုင်တိုင် ဂူပိတ် တရားကျင့်ကြံပြီး ယခုအခါမှာ တရားဟောရန်အတွက် ဇူလိုင်လ(၁၉)ရက်နေ့က ခေတ္တဂူထွက်လာကြောင်း သိရသည်။

ဆရာတော်သည်   ဂူပိတ် တရားကျင့်ကြံနေသည်ဖြစ်တာကြောင့် ဆံတော်များနှင့် မုတ်ဆိတ်၊ နှုတ်ခမ်းမွှေးများ ရှည်လျားနေလျှက်ရှိသည်ကို တွေ့ရပြီး ဂူကထွက်လာအပြီးမှာတော့ ဆံတော်များ ရိတ်ပယ်ထားသည်ကို တွေ့ရှိရသည်။

ဆရာတော်သည် ဂူပိတ်တရားကျင့်နေစဉ်အတွင်း သစ်သီးဆွမ်းသာ ဘုန်းပေးကြောင်း နှင့် ဇူလိုင်(၂၂)ရက်နေ့မှာ ၀ါဆိုကာ ဂူပိတ်တရားပြန်လည်ကျင့်ကြံမှာ ဖြစ်ကြောင်း သိရသည်။

"ဆရာတော်က ၀ါဆိုပြီးရင် ဂူပိတ်တရားပြန်ကျင့်မှာပါ၊ ဆရာတော်ရဲ့ မွေးနေ့ဖြစ်တဲ့ သက်တော်(၅၀)ပြည့် ၂၀၁၄ခုနှစ် ၁လပိုင်း ၅ရက်နေ့လောက်မှာ ဂူပြန်ထွက်မယ်လို့ သိရပါတယ်"ဟု ထိုင်းနိုင်ငံ မယ်ဆိုင်မြို့ရှိ ဆရာတော်အား သွားရောက်ဖူးမျှော်သူမှ ပြောကြားလာသည်။

ဆရာတော်အား ဖူးမျှော်ရန်နှင့် တရားနာယူနိုင်ရန်အတွက် မြန်မာနိုင်ငံ ရှမ်းပြည်နယ်အတွင်းရှိ တိုင်းရင်းသားများ၊ တာချီလိတ်မြို့နယ်မှ တိုင်းရင်းသားများ အပါအ၀င် ထိုင်းနိုင်ငံ ဘက်မှ ဆရာတော်အား ကြည်ညိုကြသူများသည် ဆရာတော်ရှိရာ သွားရောက် ဖူးမျှော်ကြသည်မှာ လူဦးရေ ထောင် သောင်းမက ရှိကြောင်း သိရသည်။

ဆရာတော်အား မူလ သီတင်းသုံးရာ ကျောင်းဖြစ်သော ရှမ်းပြည်နယ် အရှေ့ပိုင်း တာချီလိတ်ခရိုင် မိုင်းဖုန်းဒေသသို့  နိုင်ငံတော်မှ ပြန်လည် ပင့်ဆောင်ခွင့်ပြုချက်အရ ပြန်လည် ပင့်ဆောင် နိုင်ရန်အတွက် ဖေဖော်ဝါရီလ(၂၇)ရက်နေ့က ကျောင်းဂေါပကများ နှင့် ရှမ်းတိုင်းရင်းသားများက
ဆွေးနွေးတိုင်ပင်ခဲ့ကြသည်။

"ဆရာတော် ဂူထဲမှာ တရားကျင့်နေချိန် မိုင်းဖုန်းပြန်ကြွဖို့ လျှောက်တိုင်း လျှောက်တိုင်း ဆရာတော်က ပြန်ကြွမယ်၊ ပြန်မကြွဘူးလို့လည်း မဟုတ်ဘူး၊ သာဓု.. သာဓု.. သာဓု လို့ပဲ မိန့်ပါတယ်။ ဒါပေမဲ့လည်း ကျွန်တော်တို့ကတော့ မိုင်းဖုန်းကို ပြန်ကြွမယ်လို့ မျှော်လင့်နေလျှက်ပါ"ဟု ဆရာတော်အား အနီးကပ် ဆည်းကပ်ကိုးကွယ်ခဲ့သူ ရှမ်းတိုင်းရင်းသား တစ်ဦးမှ ပြောကြားလာသည်။

မိုင်းဖုန်းဆရာတော်သည် ငယ်စဉ်ကတည်းက တရားဓမ္မ ကျင့်ကြံ ပွားများအားထုတ်ခြင်း၊ အကျင့်သီလ မြဲမြံမှုရှိခြင်း၊ စေတီပုထိုးများစွာ တည်ထား၍ သာသနာပြုခြင်း တို့ကြောင့် မြန်မာပြည်မှ တိုင်းရင်းသားများ ရှမ်းတိုင်းရင်းသားများအပြင် ထိုင်းနိုင်ငံမှလည်း ကြည်ညိုကိုးကွယ်သူများ များပြားကြောင်း သိရှိရသည်။