ရှမ်းပြည်နယ်(မြောက်ပိုင်း)၊ မူဆယ်ခရိုင်၊ နမ့်ခမ်းမြို့နယ် ကောင်းကတ်ကျေးရွာ၌ မူးယစ်တပ်ဖွဲ့စု (၂၂)မူဆယ်၊ နမ့်ခမ်းလှုပ်ရှားမူးယစ်အဖွဲ့ နှင့် မူးယစ်တပ်ဖွဲ့စု(၁၀၁)နေပြည်တော် တို့ပါဝင်သည့် ပူးပေါင်းအဖွဲ့မှ ငွေကျပ် ၃၄၀၀၀၀ခန့် တန်ဖိုးရှိသည့် စိတ်ကြွဆေးပြား ၁၇၀ ပြားအား ၂၀၁၃ခုနှစ် နိုဝင်ဘာလ၁၉ရက် နံနက် ၉နာရီအချိန်က တရားခံနှင့်အတူ ဖမ်းဆီးသိမ်းဆည်းရမိကြောင်း သတင်းရရှိသည်။
ဖြစ်စဉ်မှာ မူးယစ်တပ်ဖွဲ့စု (၂၂)မူဆယ်ပါဝင်သည့် ပူးပေါင်းအဖွဲ့တို့သည် ကောင်းကတ်ကျေးရွာ၌ မူးယစ်ဆေးဝါးများ လက်လီရောင်းချနေကြောင်းကို သတင်းရရှိ၍ ဒေါ်ခမ်းxx နေထိုင်သည့်အိမ်အား နေအိမ်ရှာဖွေခွင့်ဝရမ်းဖြင့် ၀င်ရောက်ရှာဖွေရာ ၎င်းနေအိမ် အိပ်ခန်းအတွင်းကုတင်ပေါ်ရှိ အိပ်ယာခင်းအောက်မှ အပြာရောင် ပလပ်စတစ်ကတ်ခွာအိတ်ဖြင့် ထည့်လျှက် Wy နှင့် 1 စာတန်းတစ်ဖက်စီပါ ပန်းရောင် စိတ်ကြွဆေးပြား ၁၇၀ ပြားအား တွေ့ရှိရ၍ တရားခံနှင့်အတူ ဖမ်းဆီးသိမ်းဆည်းခဲ့ကြောင်း သိရသည်။
ဆက်လက်၍ မူးယစ်ဆေးဝါးများနှင့်အတူ လက်ဝယ်တွေ့ရှိရသူ အသက် ၄၇ နှစ်ရှိ ဒေါ်ခမ်းxxxအား နမ့်ခမ်းမြို့မရဲစခန်းမှ မူးယစ်(ပ)၈၉/၂၀၁၃၊ မူးယစ်ဆေးဝါးနှင့် စိတ်ကို ပြောင်းလဲစေသော ဆေးဝါးများဆိုင်ရာ ဥပဒေပုဒ်မ ၁၅/၁၉(က)အရ နိုဝင်ဘာလ ၁၉ရက် မွန်းလွှဲ ၁နာရီ၄၀မိနစ် အချိန်ခန့်က အမှုဖွင့် အရေးယူထားရှိကြောင်း သတင်းရရှိသည်။
ပြီးခဲ့သည့် နိုဝင်ဘာလ ၁၇ရက် နံနက် ၅နာရီအချိန်က အဆိုပါ ပူးပေါင်းအဖွဲ့မှပင် နမ့်ခမ်းမြို့နယ်၊ အမှတ်(၃)ရပ်ကွက်၊ အနော်ရထာလမ်းရှိ နေအိမ်အမှတ် (နခ/၁--) အား နေအိမ်ရှာဖွေခွင့်ဝရမ်း အမှတ် (၆၉/၂၀၁၃)ဖြင့် ၀င်ရောက်ရှာဖွေရာ အသက် ၃၁နှစ်ရှိ အိမ်ရှင်ဖြစ်သူ ကိုကျော်xx နှင့်အတူ စိတ်ကြွဆေးပြား ၁၂ပြားနှင့် ဘိန်းဖြူ ၀.၈ ဂရမ်ခန့်အား ရှာဖွေ့တွေ့ရှိရသည့်အတွက် နမ့်ခမ်းမြို့မရဲစခန်းမှ မူးယစ်(ပ) ၈၇/၂၀၁၃၊ မူးယစ်ဆေးဝါးနှင့် စိတ်ကို ပြောင်းလဲစေသော ဆေးဝါးများဆိုင်ရာ ဥပဒေပုဒ်မ ၁၅/၁၆(ဂ)အရ အရေးယူထားရှိကြောင်း သိရသည်။
ထို့အတူပင် နိုဝင်ဘာလ ၁၈ရက် နေ့လည် ၁၀နာရီ ၅၅မိနစ်အချိန်ခန့်က မူးယစ်တပ်ဖွဲ့စု(၂၂)မူဆယ် ပါဝင်သည့် ပူးပေါင်းအဖွဲ့မှပင် နမ့်ခမ်းမြို့နယ် ကုန်းဆာရွာအ၀င် ညောင်ပင်အနီး နမ့်ခမ်း-မူဆယ် သွားသည့် ကားလမ်းမပေါ်တွင် မူးယစ်ဆေးဝါးတားဆီးနှိမ်နင်းရေးအတွက် စစ်ဆေးမှုများ ပြုလုပ်နေစဉ် မသင်္ကာဖွယ်ရာ လူတစ်ဦးအား ရှာဖွေစစ်ဆေးရာမှ ဘိန်းဖြူ ၀.၂ ဂရမ်ခန့်အား ရှာဖွေတွေ့ရှိရ၍ တရားခံဖြစ်သူ အသက် ၄၅နှစ်အရွယ် ဦးအိုက်xx အား နမ့်ခမ်းမြို့မရဲစခန်းမှ မူးယစ်(ပ) ၈၈/၂၀၁၃၊ မူးယစ်ဆေးဝါးနှင့် စိတ်ကို ပြောင်းလဲစေသော ဆေးဝါးများဆိုင်ရာ ဥပဒေပုဒ်မ ၁၅/၁၆(ဂ)အရ အရေးယူထားရှိကြောင်း သိရသည်။
