~~~~~~~~⊰❂ unicode ❂⊱~~~~~~~~

မြန်မာ - ထိုင်းနယ်စပ်ဒေသ တာချီလိတ်မြို့တွင် မှုခင်းကြိုတင်ကာကွယ်ရေး အတွက် နို်င်ငံခြားသား ခရီးသွား ဧည့်သည်များအား ဟိုတယ်မှ လွဲ၍ အခြားနေရာများတွင် တည်းခိုး ညအိပ်ခွင့်မပြုရန် တာချီလိတ်မြို့နယ် ရဲတပ်ဖွဲ့ နှင့် တာချီလိတ်မြို့နယ်လဝကတို့မှ တာချီလိတ်မြို့ပေါ် အိမ်ရှင်၊ အိမ်ငှါးများအား ခေါ်ယူတွေ့ဆုံ၍ အသိပညာပေး ဟောပြောသည်။

တာချီလိတ်မြို့နယ်ဓမ္မာရုံတွင် ဇန်နဝါရီလ(၂၄)ရက်နေ့ နေ့လယ်(၁)နာရီအချိန်က တာချီလိတ်မြို့ပေါ် ရပ်ကွက်အုပ်ချုပ်ရေးမှူးများ နှင့် အိမ်ခန်းငှါးအိမ်ရှင်များကို ဖိတ်ကြားကာ တာချီလိတ်မြို့နယ်ရဲတပ်ဖွဲ့မှူး ရဲမှူးသန်းနု၊ တာချီလိတ်မြို့မရဲစခန်းမှ စခန်းမှူး ဒုရဲမှူး ထိန်လင်း နှင့် တာချီလိတ်မြို့နယ်လဝက ဦးစီးမှူး ဦးစိုင်းဆိုင်တစ်တို့က အသိပေးပညာပေး ဟောပြောခြင်း ဖြစ်သည်။

“နိုင်ငံခြားသားတွေကို တည်းခိုခန်း အဆင့်တောင် ညအိပ်ခွင့် မရှိပါဘူး။ နေအိမ်တွေဆိုရင် ပိုဆိုး။ မိမိရပ်ကွက်မှာ တကယ်လို့ နိုင်ငံခြားသား ညအိပ် လက်ခံတာတွေ့ရင် သက်ဆိုင်ရာ ရပ်ကွက်အုပ်ချုပ်ရေးမှူးတွေ၊ မြို့မရဲစခန်းတွေမှာ လာရောက်အကြောင်းကြားဖို့ လိုအပ်ပါတယ်။ တကယ်လို့ မှုခင်းဖြစ်ပွားခဲ့မယ်ဆိုရင် လက်ခံတဲ့ အိမ်ရှင်ပါ တာဝန်ရှိပါတယ်။”ဟု တာချီလိတ်မြို့မရဲစခန်းမှ စခန်းမှူး ဒုရဲမှူး ထိန်လင်းက ပြောသည်။

အဆိုပါ အသိပညာပေးဟောပြောပွဲတွင် တက်ရောက်လာသည့် အခန်းငှါး အိမ်ရှင်များနှင့် အချို့မှ သိရှိလိုသည်များကို ပြန်လည်ဆွေးနွေးမေးမြန်းခဲ့ကြကြောင်း သိရသည်။

တာချီလိတ်မြို့တွင် မှုခင်းကြိုတင်ကာကွယ်ရေးနှင့် မှုခင်းလျော့ပါးရေးအတွက် အသိပညာပေးမှုများ ပြုလုပ်နေလျှက်ရှိပြီး နိုင်ငံခြားသား ခရီးသွားဧည့်သည်များအား နေအိမ်၊ တည်းခိုခန်း နှင့် အိမ်ခန်းငှါးများတွင် ညအိမ်ခွင့်မရှိကြောင်း နှင့် ဟိုတယ်တစ်ခုတည်းတွင်သာ ညအိပ်ခွင့်ရှိမှာ ဖြစ်ကြောင်း သိရသည်။

၂၀၁၆ ခုနှစ်အတွင်း တာချီလိတ်မြို့တွင် နိုင်ငံခြားသားခရီးသွား ဧည့်သည်နှင့်ပတ်သတ်၍ ဖြစ်ပွားခဲ့သည့် မှုခင်းများမှာ (၅)ခုရှိခဲ့ကြောင်း တာချီလိတ်မြို့မရဲစခန်းမှ သိရသည်။

သတင်း/ဓာတ်ပုံ - ဇောင်းညီ