ရှမ်းပြည်နယ်အရှေ့ပိုင်း တာချီလိတ်ခရိုင် မိုင်းဖြတ်မြို့နယ် ၀မ်ယန်းကျေးရွာရှိ နမ့်ပန်ချောင်းကမ်းပါး ရေတိုက်စားမှုမှ ကာကွယ်ရန်အတွက် ၂၀၁၆ -၂၀၁၇ ဘဏ္ဍာရေးနှစ် ပြည်နယ်ခွင့်ပြုရန်ပုံငွေမှ ကျပ်(၁၃၅.၂၇)သန်း သုံးစွဲပြီး ကျောက်ရိုးစီ မြေထိန်းနံရံတည်ဆောက်နေကြောင်း သိရသည်။
“ကျွန်တော်တို့ ကျေးရွာအတွက် ဒီနမ့်ပန်ချောင်းက ကမ်းပါးကို ရေတဖြည်းဖြည်း တိုက်စားလာတာ ကြာနေပါပြီ။ နောင်ဆိုရင် ကျွန်တော်တို့ရွာ ပြောင်းရွှေ့ရမယ့် အခြေအနေရှိပါတယ်။ ခုလိုမျိုး ရေထိန်းနံရံ ပြုလုပ်ပေးတာ အများကြီးကျေးဇူးတင်ပါတယ်”ဟု ၀မ်ယန်းကျေးရွာ ရွာသူကြီး ဦးအိုက်အင်က ပြောသည်။
အဆိုပါ ကျောက်ရိုးစီမြေထိန်းနံရံအား မိုင်းဖြတ်မြို့နယ် ဆည်မြောင်းဦးစီးဌာနမှ တာဝန်ယူ ဆောက်လုပ်ခြင်းဖြစ်ပြီး အရှည် (၁၂၁၀)ပေ၊ အောက်ခြေအကျယ်(၃)ပေခွဲ၊ ထိပ်ဝအကျယ် (၂)ပေ၊ အမြင့် (၉)ပေ ရှိကြောင်းသိရသည်။
“ကျွန်တော့်အနေနဲ့ကတော့ စေတနာထားပြီး အကောင်းဆုံးဖြစ်အောင်လုပ်ပေးမှာပါ။ အလုပ်သမားတွေကိုလည်း မှာထားပါတယ်။ သတ်မှတ်ထားတဲ့ အချိုးအစားအတိုင်း ဘိလပ်မြေ၊ သဲ၊ ကျောင်တို့ကို ရောစပ်ပေးဖို့ပါ။ ကျွန်တော်ကိုယ်တိုင်ကြီးကြပ်ပြီး အကောင်းဆုံးဆောက်လုပ်သွားမှာပါ”ဟု ဆည်မြောင်းဦးစီးဌာန မှ မြို့နယ်ဦးစီးမှူး ဦးမောင်မောင်အေးက ပြောသည်။
အဆိုပါ ကျောက်ရိုးစီမြေထိန်းနံရံဆောက်လုပ်နေမှုအား ပြည်နယ်လွှတ်တော် ကိုယ်စားလှယ် ဦးစိုင်းကျောက်နှင့် တာဝန်ရှိသူများက ဖေဖေါ်ဝါရီလ(၆)ရက်နေ့ နေ့လည်(၁၁)နာရီအချိန်တွင် သွားရောက်ကြည့်ရှု စစ်ဆေးကြောင်း သိရသည်။
