~~~~~~~~⊰❂ unicode ❂⊱~~~~~~~~

နှစ်(၇၀)မြောက် ပြည်ထောင်စုနေ့ အထိမ်းအမှတ် အခမ်းအနားအား မိုင်းဆတ်မြို့ရှိ အောင်ဇေယျဘက်စုံ အားကစားကွင်းတွင် ကျင်းပပြုလုပ်ရာ ပြည်ထောင်စုနေ့ အထိမ်းအမှတ် စာစီစာကုံးပြိုင်ပွဲများတွင် ဆုရရှိသည့် ကျောင်းသား၊ ကျောင်းသူများအား ဆုများပေးအပ်ချီးမြှင့်သည့် အစီအစဉ်အား ထည့်သွင်းကျင်းပကြောင်း သိရသည်။

နှစ်(၇၀)မြောက် ပြည်ထောင်စုနေ့ အခမ်းအနားအား ယနေ့ ဖေဖော်ဝါရီလ(၁၂)ရက်နေ့ နံနက်(၇)နာရီခွဲအချိန်က ကျင်းပပြုလုပ်ရာတွင် ပြည်ထောင်စု သမ္မတ မြန်မာနိုင်ငံတော် အလံနှင့် ကျဆုံးလပြေီးသော အာဇာနည်ပုဂ္ဂိုလ်များအား အလေးပြုခဲ့ကြပြီး နှစ်(၇၀)နှစ်မြောက် ပြည်ထောင်စုနေ့ အခမ်းအနားသို့ ပြည်ထောင်စု သမ္မတ မြန်မာနိုင်ငံတော်၊ နိုင်ငံတော်သမ္မတ ဦးထင်ကျော် ထံမှ ပေးပို့သည့် သဝဏ်လွှာအား မိုင်းဆတ်ခရိုင်အုပ်ချုပ်ရေးမှူး ဦးနေမျိုးအောင်က ဖတ်ကြားသည်။

ဆက်လက်၍ ပြည်ထောင်စုနေ့အထိမ်းအမှတ် စာစီစာကုံးပြိုင်ပွဲတွင် အထက်တန်းအဆင့် ဆုရရှိသူများကို မိုင်းဆတ်ခရိုင်အုပ်ချုပ်ရေးမှူး ဦးနေမျိုးအောင်က လည်းကောင်း၊ အလယ်တန်းအဆင့်ဆုရရှိသူများကို မိုင်းဆတ်မြို့နယ်အုပ်ချုပ်ရေးမှူး ဦးအောင်သူလှိုင်က လည်းကောင်း၊ မူလတန်းအဆင့်ဆုရရှိသူများကို မြို့မိမြို့ဖ ဦးစိုင်းချစ်သောင်းက လည်းကောင်း အသီးသီးဂုဏ်ပြုဆုများ ပေးအပ်ချီးမြှင့်သည်။

အဆိုပါ အခမ်းအနားတွင် ခရိုင်ပြန်ကြားရေးနှင့်ပြည်သူ့ဆက်ဆံရေးဦးစီးဌာနက ပြည်ထောင်စုနေ့ အထိမ်းအမှတ် ဓာတ်ပုံနှင့် နံရံကပ်စာစောင်များ ပြသထားပြီး “သတင်းစကား”လက်ကမ်းစာစောင်များ ဖြနေ့်ဝခဲ့ကြောင်း သိရသည်။

အခမ်းအနားသို့ မိုင်းဆတ်ခရိုင်အုပ်ချုပ်ရေးမှူး ဦးနေမျိုးအောင်နှင့် ခရိုင်အဆင့် ဌာနဆိုင်ရာများ၊ မိုင်းဆတ်မြို့နယ်အုပ်ချုပ်ရေးမှူး ဦးအောင်သူလှိုင်နှင့် မြို့နယ်အဆင့်ဌာနဆိုင်ရာများ၊ နိုင်ငံရေးပါတီများ၊ လူမှုရေးအသင်းအဖွဲ့များ၊ တိုင်းရင်းသားယဉ်ကျေးမှုအဖွဲ့အစည်းများ တက်ရောက်လာကြောင်း သိရှိရသည်။

သတင်း/ဓာတ်ပုံ - #သန်းဇော်ဦး