~~~~~~~~⊰❂ unicode ❂⊱~~~~~~~~

ရှမ်းပြည်နယ်တောင်ပိုင်း တောင်ကြီးမြို့တွင် ရောက်ရှိနေသည့် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် ဖေဖော်ဝါရီလ (၁၃) ရက်က တောင်ကြီးမြို့ရှိ မြို့တော်ခန်းမတွင် မိဘမဲ့ ကလေးများအား အာဟာရကျွေးမွေးပြီး မိဘမဲ့စောင့်ရှောက်ရေးကျောင်းများသို့ စားနပ်ရိက္ခါ ပံ့ပိုးခြင်းတို့ကို လုပ်ဆောင်နေသည်။

“ဒီနေ့က ဖေဖေ့မွေးနေ့လည်းဟုတ်တယ်။ ကလေးများနေ့လည်း ဟုတ်တယ်။ များများစား။ ကုန်အောင်စားနော်။ အာဟာရရှိမှ ကျန်းမာမှာ”ဟု ဒေါ်အောင်ဆန်းစုကြည်က ကလေးများအား ပြောကြားခဲ့သည်။

ရှမ်းပြည်နယ်တောင်ပိုင်း ပင်လုံမြို့တွင် ဖေဖော်ဝါရီလ (၁၂) ရက်နေ့က ကျင်းပသည့် ပြည်ထောင်စုနေ့ အခမ်းအနားနှင့် ငြိမ်းချမ်းရေးစကားဝိုင်းသို့ တက်ရောက်သည့် နို်င်ငံတော်အတိုင်ပင်ခံသည် တောင်ကြီးမြို့ရှိ မိဘမဲ့ကလေးစောင့်ရှောက်ရေးကျောင်း (၁၁)ခုမှ မိဘမဲ့ကလေးငယ် (၂၄၀)အား ဖေဖော်ဝါရီလ (၁၃) ရက် နံနက် (၁၀)နာရီခွဲခန့်တွင် ဗိုလ်ချုပ်အောင်ဆန်းမွေးနေ့အထိမ်းအမှတ်နှင့် ကလေးများနေ့အထိမ်းအမှတ်အဖြစ် အာဟာရကျွေးမွေးခဲ့ခြင်းဖြစ်သည်။

“အစိုးရအနေနဲ့ အခုလို ဂရုတစိုက်လုပ်ပေးတာကြောင့် အားတက်မိပါတယ်။ မိဘမဲ့ကျောင်းလေးတွေ၊ ဆင်းရဲနွမ်းပါးကျောင်းလေးတွေ၊ ဘကကျောင်းလေးတွေကို အခုလို နိုင်ငံတော်အဆင့်က ပံ့ပိုးပေးတာ အသိအမှတ်ပြုပေးဖို့ မျှော်လင့်မိပါတယ်။ တောင်းလည်း တောင်းဆိုပါတယ်။ အခုလည်း ပံ့ပိုးမှုတွေ ရှိပါတယ်။ ဒီထက်ပိုပြီး အသိအမှတ်ပြုပေးစေလိုတာပါ”ဟု တစ်နိုင်ငံလုံး မိဘမဲ့ကလေးများ စောင့်ရှောက်ရေးကျောင်း (၁၄)ကျောင်း ဖွင့်လှစ်ထားသည့် အဝါရောင်မျိုးဆက်သစ် လူငယ်ပရဟိတအသင်းမှ ဆရာတော် ဦးသုနန္ဒက မိန့်ကြားသည်။

အဆိုပါပွဲသို့ မိဘမဲ့ကျောင်း (၁၁)ကျောင်းမှ ကလေးငယ်များ တက်ရောက်ကြပြီး နိုင်ငံတော်၏ အတိုင်ပင်ခံ က မိဘမဲ့ကျောင်း(၁၁)ကျောင်းသို့ တစ်ကျောင်းစီအတွက် ဆန်(၁၀)အိတ်၊ဆီ (၅)ပုံး၊ ဆားနှင့် ကျောင်းသုံး ပစ္စည်းများကို ထောက်ပံ့ပေးခဲ့သည်။

“ကလေးတွေက မနေ့ကတည်းက ပျော်နကြေတာလေ။ သူတို့တွေက အမေစုကို တွေ့လည်းတွေ့ချင်ကြ တယ်လေ။ အခုလိုမျိုး နိုင်ငံတော်အဆင့်က အသိအမှတ်ပြုပေးတော့ ကျွန်မတို့တွေ လုပ်ရတာလည်း အားတက်မိပါတယ်။ အခုလည်း လူမှုဝန်ထမ်းဦးစီးဌာနကနေ ပံ့ပိုးမှုတွေရှိပါတယ်။ ကလေးတွေကို စောင့်ရှောက်ပေးနေတာက နိုင်ငံတော်ကို ကူညီပေးခြင်းလည်းဖြစ်ပါတယ်”ဟု Holy Infant Jesus Convent မှ စစ္စတာ နာတာလီနာက တာချီလိတ်သတင်းအေဂျင်စီကို ပြောသည်။

နိုင်ငံတော်၏ အတိုင်ပင်ခံပုဂ္ဂိုလ်သည် နံနက်(၉)နာရီခွဲခန့်တွင် တောင်ကြီးမြို့မှ ရွှေဘုန်းပွင့်စေတီတော်နှင့် စူဠာမဏိစေတီတော်များသို့ ဖေဖော်ဝါရီလ (၁၃) ရက် နံနက်ပိုင်းက သွားရောက်ဖူးမြော်ရာ ဒေသခံများက ကြိုဆိုကြသည်ကို တွေ့ရသည်။

သတင်း/ဓာတ်ပုံ - Tachileik News Agency Team