ရှမ်းပြည်နယ်မြောက်ပိုင်း ကျောက်မဲမြို့မှ နံနက်ခင်းဈေး(မင်္ဂလာဈေး) ပျံကျဈေးသည်များအား ကုန်စိမ်း ဈေးတန်းတွင် စနစ်တကျ ရောင်းချနိုင်ရေး စီစဉ်နေပြီး လက်ရှိတွင် ယခင်ဈေးသိမ်းချိန် နံနက်(၉)နာရီ အစား (၇)နာရီခွဲသို့ ပြောင်းလဲ သတ်မှတ်လိုက်ကြောင်း ပျံကျဈေးသည်များထံမှ သိရသည်။

ပျံကျဈေးသည်များမှာ ကားလမ်းမအထိ တိုးချဲ့ရောင်းချနေသဖြင့် ဖေဖေါ်ဝါရီလ (၂၂) ရက်နေ့မှစ၍ ဈေးသိမ်းချိန်အား ပြောင်းလဲသတ်မှတ်လိုက်ခြင်းဖြစ်ကြောင်း မြို့နယ်စည်ပင်သာယာရေးဦးစီးဌာနမှ သိရသည်။

“ပျံကျဈေးသည်တွေ ရောင်းချမှုက စည်းကမ်းမဲ့ ရောင်းချတာတွေရှိနေတယ်။ သူတို့တွေကို မူလတည်းက အဲဒီနေရာ တွေကို သတ်မှတ်ပေးထားတာမျိုး မရှိဘူး။ ဈေးသည်တွေက တဖြည်းဖြည်းချင်းနဲ့ မီးပွိုင့်ထောင့်နား (ဈေးဧရိယာနဲ့ နောက်ထပ် ဘလောက်တစ်ခု)အထိ တိုးပြီးတော့ ရောင်းချလာကြတယ်။ ဒါကြောင့် လမ်းပိတ်ဆို့မှုတွေ မဖြစ်ပေါ်စေဖို့ ပျံကျဈေးသည်တွေကို စည်းကမ်းတွေ စတင် သတ်မှတ်ရခြင်းဖြစ်ပါတယ်”ဟု ကျောက်မဲမြို့ မြို့နယ်စည်ပင် သာယာရေး ဦးစီးဌာနမှ လက်ထောက် ညွှန်ကြားရေးမှူး ဦးမြတ်ခန့်အေးက တာချီလိတ်သတင်းအေဂျင်စီသို့ ပြောသည်။

မင်္ဂလာဈေးအတွင်း ဆိုင်ခန်းများသတ်မှတ်ပေးထားသော်လည်း ဈေးအပြင်ရှိ ကားလမ်းမဘေးတွင် ရောင်းချသူ တဖြည်းဖြည်း များပြားလာခြင်း ဖြစ်ကြောင်း သိရသည်။

“နဂိုကဆိုရင် မနက်(၉)နာရီလောက်မှ ဖယ်ပေးတဲ့အတွက် ကျောင်းသူကျောင်းသားတွေ အသွားအလာခက်ခဲ တာတွေရှိတယ်။ ခုက ကလေးတွေစာမေးပွဲ ကာလလည်းဖြစ်တဲ့အတွက် အခုလိုအချိန်စောပြီး သတ်မှတ်ပေး ရခြင်းဖြစ်ပါတယ်”ဟု မြို့နယ်စည်ပင် အမှုဆောင်အရာရှိက ပြောသည်။

မြို့နယ် စည်ပင်သာယာရေး ဝန်ထမ်းများက နံနက် (၄) နာရီဈေးဖွင့်ချိန်မှစ၍ ဈေးသိမ်းချိန် နံနက် (၇)နာရီအထိ လိုက်လံစစ်ဆေးခြင်း၊ ယာဉ်ကြောပိတ်ဆို့မှုမဖြစ်စေရန် လမ်းနံဘေးပလက်ဖောင်း ဧရိယာ အတွင်းသာ ဈေးခင်းရောင်းချစေရန် ထိန်းသိမ်းဆောင်ရွက်ခြင်းများကို လုပ်ဆောင်ပေးနေကြောင်း သိရသည်။

ထို့ပြင် ဈေးသည်များ စည်းကမ်းတကျ ရောင်းချနိုင်စေရေး အတွက် မူလကုန်စိမ်းဈေးတန်း ဖြစ်သည့် မင်္ဂလာဈေး အတွင်းရှိ ဈေးဆိုင်ခန်းများ၊ လမ်းသွယ်ဆိုင်ခန်းများ၌ စနစ်တကျ ပြန်လည် ရောင်းချစေရန်အတွက် တာဝန်ရှိသူများက တိုင်ပင်ဆွေးနွေးကာ ဆက်လက် လုပ်ဆောင် သွားမည်ဖြစ်ကြောင်း သိရသည်။

သတင်း - နေဖြိုးမြင့်