ရှမ်းပြည်နယ်(မြောက်ပိုင်း) ပြည်ထောင်စုလမ်းမကြီး ကွတ်ခိုင်နှင့် မူဆယ်ကြားတွင် လက်နက်ကိုင် တပ်ဖွဲ့များက နှစ်ရက်ကြာ ဆက်ကြေးကောက်ခံမှုများကြောင့် မူဆယ်ကုန်သွယ်ရေးဇုန်သို့ ကုန်တင်ယာဉ် ဝင်ရောက်မှု အနည်းငယ်လျော့ကျသွားကြောင်း မူဆယ်ကုန်စည်ဒိုင်လုပ်ငန်းများမှ သိရသည်။

“လမ်းတစ်လျှောက်မှာ ပစ်ခတ်တာတွေ၊ ဆက်ကြေးကောက်တာတွေက ဆက်တိုက်လို ဖြစ်နေတာဆိုတော့ ကုန်ဝယ်ယူမယ့် ဝယ်လက်တွေက မလာရဲတော့တာတွေရှိတယ်။ ကုန်အဝင်လည်း လျော့သွားတယ်။ ဝင်တော့ ဝင်တာပေါ့။ ပုံမှန်ထက် နောက်ကျသွားတယ်ဆိုတော့ ရောင်းရဝယ်ရတာက အခက်အခဲ တချို့ဖြစ်လာတယ် “ဟု မူဆယ်ကုန်စည်ဒိုင်မှ မနန်းခရွန်ဆာက ပြောသည်။

မူဆယ်ကုန်သွယ်ရေးလမ်းကြောင်း ပြည်ထောင်စုလမ်းမကြီး ကွတ်ခိုင်မြို့နယ်အတွင်းတွင် မတ်လ (၁၄)နှင့် (၁၅) ရက်နေ့များတွင် မြောက်ပိုင်းမဟာမိတ် တပ်ဖွဲ့ဝင်များက ကုန်တင်ယာဉ်များနှင့် ခရီးသည်တင် ယာဉ်များအား တားဆီးကာ ဆက်ကြေးကောက်ခံခြင်း၊ ကုန်တင်ကားများအား သော့ဖြုတ်သိမ်းခြင်း၊ ကားဘီးများအား သေနတ်ဖြင့်ပစ်ခြင်းတို့ဖြင့် ယာဉ်ကြောပိတ်ဆို့ရန် လုပ်ဆောင်မှုများ ပြုလုပ်ခဲ့ကြခြင်းဖြစ်သည်။

“ပွဲရုံကိုတော့ ကားတွေက အစီးရေအရဆိုရင်တော့ ပုံမှန်လောက်ပဲ ဝင်နေပါတယ်။ အချိန် နောက်ကျသွားတာပဲ ရှိတာပေါ့။ ကုန်ဝင်ကုန်ထွက်လည်း ပုံမှန်လောက်ပါပဲ။ လမ်းမှာ ပိတ်မိနေတယ်ဆိုလည်း ခဏနေစစ်တပ်က လာရှင်းပေးလိုက်တော့ ပြန်ပွင့်ပြီး သွားနိုင် လာနိုင် ဖြစ်သွားတယ်ဆိုတော့ အဝင်အထွက် သိသိသာသာတော့ မလျော့သွားသေးဘူး”ဟု ခွာညိုသစ်သီးပွဲရုံမှ ဦးစိုင်းခင်မောင်က ပြောသည်။

ဆက်ကြေးကောက်သည့်နေ့များတွင် ယာဉ်ကြောပိတ်ဆို့ရန် လုပ်ဆောင်သည့်အတွက် ကုန်တင်ကားများ မူဆယ်ကုန်သွယ်ရေးဇုန်သို့ အဝင်နောက်ကျသော်လည်း ကုန်သည်များက ပုံမှန်တင်ပို့မှုများ လုပ်ဆောင်နေဆဲ ဖြစ်ကြောင်း သိရသည်။

“လမ်းပိတ်တယ်။ စစ်ဖြစ်တယ်။ ဆက်ကြေးကောက်တဲ့ အဲဒီသုံးရက်စလုံးမှာလည်း သစ်သီးကားတွေကတော့ တစ်ရက်ကို အစီးရေ (၃၀၀) ကနေ (၄၀၀) လောက်ပုံမှန်ဝင်နေတာပဲ။ အရင်ပုံမှန်ရက်တွေက အဝင်အတိုင်းပဲ အရေအတွက်ကတော့ သိသိသာသာလျော့ကျမသွားသေးဘူး။ သစ်သီးဈေးနှုန်းတွေလည်း အရင်လိုပုံမှန်ပဲ အပြောင်းအလဲမရှိပါဘူး။ မဝင်နိုင်တော့တာ မရှိသေးဘူး။ စောဝင်တာ နောက်ကျဝင်တာ ဒါပဲရှိတယ်။ ဒီမှာကတော့ အရောင်းအဝယ်ကပုံမှန်ပဲရှိသေးတယ် “ဟု ဦးစိုင်းခင်မောင်က ပြောသည်။

မူဆယ် - ကွတ်ခိုင်လမ်းပိုင်းတွင် မတ်လ (၁၄ )ရက်နေ့မှစ၍ မြောက်ပိုင်းမဟာမိတ်တပ်ဖွဲ့နှင့် တပ်မတော် တို့ ပစ်ခတ်တိုက်ခိုက်မှုဖြစ်ပွားခဲ့ပြီးနောက် အဆိုပါလမ်းပိုင်းတွင် လက်နက်ကိုင်အဖွဲ့က ကားကြီးတစ်စီးလျှင် ကျပ် ငါးသိန်းနှုန်းတောင်းခံခြင်း၊ ယာဉ်မောင်းများ၏ လက်ကိုင်ဖုန်းများအား သိမ်းဆည်းထားခြင်း၊ ကားကြီးများအား လမ်းလယ်တွင်ရပ်တန့်စေကာ ကားတာယာများ၊ လေအိတ်များအား သေနတ်ဖြင့်ပစ်ဖောက်သွားခြင်းတို့ကြောင့် ယာဉ်မောင်းများနှင့်ကုန်သည်များမှာ ဆုံးရှုံးနစ်နာမှုများရှိနေရကြောင်း သိရသည်။

“လမ်းအခြေအနေမကောင်းလို့ လုံခြုံမှုမရှိလို့သာ လုပ်ငန်းကိုရပ်ထားရရင် ငတ်ပြီးသေရုံပဲရှိမှာပေါ့။ ဒါပေမယ့်ကျွန်တော်တို့ကို ဒီလိုတရားမဝင်ငွေကြေးကောက်ခံ တာတွေ ကားဘီးတွေကိုပစ်ဖောက်ပီး ဒုက္ခပေးသွားတာတွေကျတော့ ဘယ်သူမှမကယ်ဘူး။ ကုန်စည်တွေ ပျက်စီးတယ်။ လူတွေဒုက္ခရောက်တယ်။ ဒီလိုဖြစ်ခဲ့ပေါင်းလည်း များလှပြီ။ ဒီဒုက္ခတွေက ဘယ်တော့မှ အဆုံးမသတ်ဘူး “ဟု လမ်းပိတ်ဆို့မှုအား ရင်ဆိုင်ခဲ့ရသည့် ယာဉ်မောင်းတစ်ဦး ကပြောသည်။

လက်နက်ကိုင်အဖွဲ့များက ဆက်ကြေးကောက်ခံမှုများမှာ ယခင်က တစ်နှစ်ပတ်လုံးတွင် တစ်ကြိမ် သို့မဟုတ် နှစ်ကြိမ်ကောက်ခံလေ့ရှိကြောင်း သိရသည်။

သတင်း - နဖြေိုးမြင့်

ဓာတ္ပံု - Maymyo Maung

⊰❂ #TachileikNewsAgency #TachileikOnlineNews www.tachileik.net  ❂⊱