~~~~~~~~⊰❂ unicode ❂⊱~~~~~~~~

ရှမ်းပြည်နယ်(တောင်ပိုင်း) နမ့်စန်မြို့နယ်တွင် အားကစားရုံနှင့် ကြက်ခြေနီရုံးတည်ဆောက်ရန် မြေလွတ်မြေလပ် မရှိသဖြင့် မြို့နယ်အတွင်း မြေယာအများဆုံး ပိုင်ဆိုင်ထားသည့် ဝန်ကြီးဌာနဖြစ်သည့် လယ်ယာစိုက်ပျိုးရေးနှင့် ဆည်မြောင်းဝန်ကြီးဌာနထံမှ ဝန်ကြီးဌာနချင်း ထပ်မံ ညှိနှိုင်းတောင်းခံပေးမည် ဖြစ်ကြောင်း သိရသည်။

“ဒီတစ်ရက်၊ နှစ်ရက်အတွင်းမှာပဲ ကျွန်တော် လယ်ယာစိုက်ပျိုးရေးနှင့် ဆည်မြောင်းဝန်ကြီးဌာန ပြည်ထောင်စုဝန်ကြီးနဲ့ ညှိနှိုင်းပါမယ်။ တစ်လက်စထဲမှာ ကျွန်တော်တို့ ဝန်ကြီးဌာနမှာလည်း မြေနေရာ ရှိ/မရှိ ပြန်လည်စစ်ဆေးပြီး ရှိတယ်ဆို ပေးပါမယ်”ဟု ကျန်းမာရေးနှင့်အားကစားဝန်ကြီး ပြည်ထောင်စုဝန်ကြီး ဒေါက်တာမြင့်ထွေးက မတ်လ (၇)ရက်နေ့ ပြည်သူ့လွှတ်တော်အစည်းအဝေးတွင် ပြောကြားသည်။

နမ့်စန်မြို့နယ် ဘောလုံးကွင်းအနီးတွင် အားကစားရုံ တည်ဆောက်ရန်နှင့် ကြက်ခြေနီရုံး တည်ဆောက်ရန် မြေနေရာအတွက် ဝန်ကြီးဌာနအချင်းချင်း ပြန်လည်ညှိနှိုင်းပေးပါရန် နမ့်စန်မဲဆန္ဒနယ်မှ ပြည်သူ့လွှတ်တော် ကိုယ်စားလှယ် ဦးဌေးလွင်(ခ)ဦးဒီလုံးက မေးမြန်းမှုအား ပြည်ထောင်စုဝန်ကြီး ဒေါက်တာမြင့်ထွေးက ယင်းကဲ့သို့ ပြန်လည်ဖြကြေားခြင်းဖြစ်သည်။

“တစ်မြို့နယ်လုံးနီးပါး လယ်ယာနဲ့ဆည်မြောင်းဦးစီးဌာနက မြေအားလုံးနီးနီးကို ပိုင်တာပါ။ ရုံးဌာနတွေကိုလည်း သူတို့ပဲ ခေတ်အဆက်ဆက် စွန့်လွှတ်ပေးခဲ့တာပါ။ အခုဝန်ကြီးဖြေသွားတာထဲလည်း ပါ ပါတယ်။ အရင်က ဆေးရုံလည်း ဖွင့်လှစ်ခဲ့တယ်။ နောက်ပြီးတော့ လဝကရုံးဖွင့်တယ်။ ဒီနောက်မှာ လဝကရုံးကို နေရာ သပ်သပ်ပေးပြီးတဲ့အခါမှာ အခုက သူ့ဝန်ထမ်းတွေချည်းပဲ နေထိုင်နေတာပါ။ ကျွန်တော်တို့ ဆီမှာ ဝန်ထမ်းအိမ်ရာတွေလည်း အများကြီးရှိပါတယ်။ တလောကပဲ ဆည်မြောင်း ဝန်ကြီးဌာနနဲ့ ဟိန်းထက်စံကုမ္ပဏီတို့ အကျိုးတူဖက်စပ် ဈေးဆောက်တဲ့ အခါမှာလည်း အစားထိုး အိမ်လေးလုံးဆိုပြီး ဆောက်လုပ်ပေးထားတာလည်း ရှိပါတယ်။ ဒီဝန်ထမ်းတွေကို အဲဒီကိုရွှေ့ပေးရင်လည်း အဆင်ပြေနိုင်ပါတယ်။ ကျွန်တော်တို့မြို့ အနေနဲ့ မြေရှာဖို့ဆိုတာ မြေလွတ်မြေလပ်ကတော့ မရှိတော့ပါဘူး။ ခေတ်အဆက်ဆက်ကလည်း ဒီလယ်/ဆည်ဝန်ကြီးဌာနကပဲ အမြဲစွန့်လွှတ်ပေးခဲ့တာပါ။ ဒီနေရာက ဘောလုံးကွင်းနဲ့လည်း နီးပါတယ်။ အားကစားရုံအတွက်လည်း အဆင်ပြေတဲ့အတွက် ဝန်ကြီးအနေနဲ့ လယ်/ဆည်ဝန်ကြီးနဲ့ ပြန်လည်ညှိနှိုင်းမှုရှိ/မရှိကို ထပ်မံမေးမြန်းလိုပါတယ်”ဟု နမ့်စန်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးဌေးလွင်(ခ)ဦးဒီလုံးက မေးမြန်းခဲ့ခြင်းဖြစ်သည်။

နမ့်စန်မြို့နယ် ဘောလုံးကွင်း အနီးတွင် အားကစားရုံ တည်ဆောက်ရန်နှင့် ကြက်ခြေနီရုံး တည်ဆောက်ရန် မြေနေရာမရှိသည့်အတွက် လက်ရှိဘောလုံးကွင်း အနီးရှိ လယ်ယာစိုက်ပျိုးရေးနှင့် ဆည်မြောင်း ဝန်ကြီးဌာန လက်အောက်မှ စက်မှုသီးနှံဖွံ့ဖြိုးတိုးတက်ရေးဦးစီးဌာနပိုင်မြေမှ အားကစားရုံအတွက် မြေ (ဝ.၉၈) ဧကနှင့် ကြက်ခြေနီရုံးအတွက် (ဝ.၂၁၇) ဧကတို့ကို လယ်ယာစိုက်ပျိုးရေးနှင့် ဆည်မြောင်း ဝန်ကြီးဌာနနှင့် ကျန်းမာရေးနှင့်အားကစားဝန်ကြီးဌာနတို့ချင်းညှိနှိုင်း၍ လွှဲပြောင်း၍သော်လည်းကောင်း၊ ရောင်းချ၍သော်လည်းကောင်း ဆောင်ရွက်ပေးနိုင်ခြင်း ရှိ/မရှိကို လွှတ်တော်တွင် မေးမြန်းခဲ့ခြင်းဖြစ်သည်။

“ဘောလုံးကွင်း တစ်ခုထဲသာရှိပြီး အားကစားရုံ မရှိသေးတဲ့အတွက် ပြည်နယ်လူမှုရေးဝန်ကြီး၊ ပြည်နယ် အား/ကာမှူးတို့နဲ့ ညှိနှိုင်းတဲ့အခါမှာ အားကစားရုံနဲ့ ကြက်ခြေနီရုံးအတွက် ဘတ်ဂျက်မှာ ထည့်သွင်း ရေးဆွဲမှာဖြစ်ပြီးတော့ မြေနေရာရှာဖွေရေးလုပ်ဆောင်ရန်လို့ ညှိနှိုင်းခဲ့ပါတယ်။ ဒီအတွက် မြို့နယ်ထွေ/အုပ်ရုံးမှာ လွှတ်တော်ကိုယ်စားလှယ်တွေ၊ စီမံခန့်ခွဲရေးကော်မတီတွေ၊ ဌာနဆိုင်ရာ၊ မြို့မိမြို့ဖတို့နဲ့ အစည်းအဝေး ပြုလုပ်ပြီး မြေနေရာရရှိရေး ညှိနှိုင်းခဲ့ပါတယ်။ အဲဒီလို ညှိနှိုင်းတဲ့အခါမှာ နမ့်စန်မြို့မှာ မြေလွတ်မြေလပ်မရှိဘဲ ဝန်ကြီးဌာနပိုင်မြေများသာ ရှိနေတဲ့အတွက် လူထုတောင်းဆိုချက်အရ ဒီဝန်ကြီးဌာန အချင်းချင်း ညှိနှိုင်းဆောင်ရွက်ပေးဖို့ တင်ပြရခြင်းဖြစ်ပါတယ်”ဟု နမ့်စန်မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးဌေးလွင်(ခ)ဦးဒီလုံးက မေးမြန်းခဲ့ခြင်းဖြစ်သည်။

ကျန်းမာရေးနှင့် အားကစားဝန်ကြီး ပြည်ထောင်စုဝန်ကြီးဌာန အနဖြေင့် နမ့်စန်မြို့နယ်တွင် လိုအပ်နေသည့် အားကစားရုံနှင့် ကြက်ခြေနီရုံးတို့အတွက် မြေနေရာရှာဖွေရရှိသည်နှင့် ဘတ်ဂျက် ချထားပေးသွားမည်ဖြစ်ကြောင်း ကျန်းမာရေးနှင့်အားကစားဝန်ကြီး ပြည်ထောင်စုဝန်ကြီးဌာန ပြည်ထောင်စုဝန်ကြီးက ဖြကြေားသည်။

 “နမ့်စန်မြို့နယ် ဘောလုံးကွင်းအနီးရှိ စက်မှုသီးနှံဖွံ့ဖြိုးတိုးတက်ရေးဦးစီးဌာနပိုင်မြေကွက်ကို စုံစမ်းလိုက်တဲ့ အခါ ၂၁.၁.၂၀၁၈ မှာ မြို့နယ် စီမံခန့်ခွဲရေးကော်မတီ လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာနတို့မှ တာဝန်ရှိသူများနဲ့ မြေနေရာကို သွားတိုင်းတာရာမှာ ဒီမြေဟာ နမ့်စန်မြို့နယ် စက်မှုသီးနှံဖွံ့ဖြိုး တိုးတက်ရေး ဦးစီးဌာနကနေ စိုက်ပျိုးရေး၊ မွေးမြူရေးနှင့် ဆည်မြောင်းဦးစီးဌာနကို မြေနေရာ စွန့်လွှတ်ပေးနိုင်ခြင်း ရှိ/မရှိကို မေးရာမှာ မစွန့်နိုင်ပါဘူးတဲ့။ ဒီနေရာကို သူတို့ကနေ လူဝင်မှုကြီးကြပ်ရေးနှင့် ပြည်သူ့အင်အားဦးစီးဌာနမှ ဝန်ထမ်းမိသားစုများအား လူနေထိုင်ခွင့် ပေးထားပါတယ်တဲ့။ ဒီလိုနေထိုင်ခွင့်ပေးတာကို ဘယ်သူက ပေးထားတာလဲဆိုတော့ မြို့နယ်အုပ်ချုပ်ရေးမှူး အပါအဝင် အဖွဲ့ဝင် (၇)ဦးဖြင့် ဖွဲ့စည်းထားသော အိမ်ရာကြီးကြပ်ရေးကော်မတီက အသိအမှတ်ပြု နေထိုင်ခွင့် တရားဝင်ပေးထားတယ်လို့ သိရပါတယ်။ အဲဒါကြောင့် ကျွန်တော်တို့ကို အကြောင်းပြန်တာကတော့ စိုက်ပျိုးရေး၊မွေးမြူရေးနှင့် ဆည်မြောင်းဦးစီးဌာနကနေ ဒီမြေကို လွှဲပြောင်းပေးခြင်း မပြုနိုင်ပါဘူးလို့ အကြောင်းပြန်ပါတယ်။ ဒီအားကစားရုံဆောက်ပေးဖို့ကို ကျွန်တော်တို့ ဌာန အနေနဲ့ကတော့ ဝန်မလေးပါဘူး။ ၂၀၁၈ - ၂၀၁၉ ဘဏ္ဍာနှစ်မှာ ဦးစားပေး အနေနဲ့ ပါဝင်အောင် ဆောက်ပါမယ်။ မြေရရှိရေးကတော့ ပြည်သူ့လွှတ်တော်ကိုယ်စားလှယ်ကြီးနဲ့ ပြည်နယ်အစိုးရတို့ နောက် ရှမ်းပြည်နယ်က ပြည်နယ်မှူး ညွှန်ကြားရေးမှူး အား/ကာတို့နဲ့ မြေရှာပါမယ်။ ရတာနဲ့ ချက်ချင်းပေးပါမယ်။ ကျွန်တော်တို့ ဝန်ကြီးဌာနရဲ့ ဆောင်ပုဒ်က လူများ ကိုယ်လက်လှုပ်ရှားခြင်းအားဖြင့် ရောဂါဘယကျအောင် လုပ်မယ့်အတွက် အားကစားရုံကို မဖြစ်မနေ ဆောက်ပါမယ်။ မြေရတာနဲ့ ပေးပါမယ်”ဟု ကျန်းမာရေးနှင့်အားကစားဝန်ကြီး ပြည်ထောင်စုဝန်ကြီး ဒေါက်တာမြင့်ထွေးက ဖြကြေားခြင်းဖြစ်သည်။

လယ်ယာစိုက်ပျိုးရေးနှင့် ဆည်မြောင်းဝန်ကြီးဌာနအနဖြေင့် အဆိုပါ မြေနေရာအား စွန့်လွှတ်ပေးရန် မဖြစ်နို်င်ကြောင်း နမ့်စန်မြို့နယ်အနဖြေင့် အခြား မြေလွတ်မြေလပ်ရှာဖွေရန် မဖြစ်နိုင်သဖြင့် ဝန်ကြီးဌာန အချင်းချင်း ထပ်မံညှိနှိုင်းပေးရန် ပြည်သူ့လွှတ်တော်ကိုယ်စားလှယ်က ထပ်မံမေးမြန်းခဲ့ခြင်းဖြစ်သည်။

သတင်း - ဇာနှင်း