~~~~~~~~⊰❂ unicode ❂⊱~~~~~~~~

ရန်ကုန် အရှေ့ပိုင်းခရိုင်တရားရုံးက အောင်ရဲထွေးသေဆုံးမှုနှင့် ပတ်သက်၍ အမှုရုပ်သိမ်းခွင့်ပြုလိုက်ခြင်း၏ နောက်ခံအကြောင်းရင်းများ၊ အခြားဆက်နွယ်ပတ်သက်မှုများကို ဥပဒေနှင့်အညီ မှန်မှန်ကန်ကန် ဆောင်ရွက်ရေးအတွက် ပြည်ထောင်စုတရားသူကြီးချုပ်၊ ပြည်ထောင်စု ရှေ့နေချုပ်နှင့် အဂတိလိုက်စားမှု တိုက်ဖျက်ရေးကော်မရှင် ဥက္ကဌတို့အား ၂၀၁၈ ခုနှစ်၊ ဇူလိုင်လ(၃၁)ရက်နေ့တွင် နိုင်ငံတော်သမ္မတက သမ္မတအိမ်တော်၌ လမ်းညွှန်မှာကြားကြောင်း သိရသည်။

လူမှုကွန်ရက်တွင် ဟာသဗီဒီယိုများဖြင့် လူသိများသူ သရုပ်ဆောင် အောင်ရဲထွေး သေဆုံးမှုနှင့် ပတ်သက်ပြီး ရာဇဝတ်ကျင့်ထုံးဥပဒေ ၄၉၄(က)အရအမှုကို ရုပ်သိမ်းခွင့်ပြုလိုက်သည့် ရန်ကုန်အရှေ့ပိုင်း ခရိုင်တရားရုံး၏ ၂၀၁၈ ခုနှစ်၊ ဇူလိုင်လ (၂၅) ရက်နေ့က အမိန့်ချမှတ်မှုကြောင့် တရားစီရင်ရေးနှင့် ရုပ်သိမ်းလွှာ တင်သွင်းသူများကို ဝေဖန်ပြစ်တင်မှုများ ထွက်ပေါ်နခြေင်းဖြစ်သည်။

အဆိုပါ ကိစ္စနှင့် ပတ်သက်၍ နိုင်ငံတော်သမ္မတနှင့် နိုင်ငံတော်၏ အတိုင်ပင်ခံပုဂ္ဂိုလ်တို့က စိစစ် မေးမြန်းမှုများ ဆောင်ရွက်ခဲ့ပြီးနောက် အမှုကို ဆက်လက်စစ်ဆေးရန်အတွက် တိုင်းဒေသကြီး တရားလွှတ်တော်သို့ တင်ပြရန် ပြည်ထောင်စုရှေ့နေချုပ်ရုံးက တိုင်းဒေသကြီးဥပဒေချုပ်ထံ ဇူလိုင်လ(၃၀)ရက်နေ့က ညွှန်ကြားထားကြောင်း သိရသည်။

ယင်းအမှုအား ဆက်လက်စစ်ဆေးပါက တရားလိုပြ သက်သေ (၂၂) ဦးအနက် ထွက်ဆိုချက်ပေးရန် ကျန်နေသည့် သက်သေ(၈)ဦးကို ဆက်လက် စစ်ဆေးရမည်ဖြစ်ပြီး အဆိုပါ အမှုနှင့်ပတ်သက်၍ ဖမ်းဆီးထားသူ (၃)ဦးမှာ တရားရုံးက လွှတ်ပေးလိုက်ပြီးနောက် ပြည်ပသို့ ထွက်ခွာသွားပြီဖြစ်သဖြင့် နိုင်ငံတကာရဲတပ်ဖွဲ့နှင့် ချိတ်ဆက်ဖမ်းဆီးရေး ဆောင်ရွက်မည်ဖြစ်ကြောင်း သိရသည်။

အဆိုပါ အမှုအား ရုပ်သိမ်းရန် ရုပ်သိမ်းလွှာကို သေဆုံးသူအောင်ရဲထွေး၏ မိသားစုက တင်ပြလာပြီး တရားလိုပြ သက်သေ (၁၄) ဦး၏ ထွက်ဆိုချက်များတွင် ခိုင်လုံသည့် သက်သေ ထွက်ဆိုချက် ပေါ်ပေါက်ခြင်း မရှိသည့် အတွက် တိုင်းဒေသကြီး ဥပဒေချုပ်က အမှုကို ရုပ်သိမ်းရန် ရုပ်သိမ်းလွှာ တင်သွင်းခဲ့ခြင်းဖြစ်ကြောင်း သိရသည်။

အောင်ရဲထွေးသည် ၂၀၁၈ ခုနှစ် နှစ်သစ်ကူးညတွင် ရန်ကုန်မြို့ရှိ The One Entertainment တွင် လူတစ်စုက ထိုးကြိတ်ကန်ကြောက်မှုကြောင့် ရန်ကုန်ပြည်သူ့ဆေးရုံကြီးတွင် ဇန်နဝါရီလ(၂)ရက်နေ့၌ သေဆုံးသွားခဲ့သဖြင့် အဆိုပါ အမှုနှင့်ပတ်သက်၍ သန်းထွဋ်အောင်(ခ)သားကြီး၊ ပြည့်ဖြိုးအောင်(ခ)အောင်လေးနှင့် ကျော်ဇော(ခ)ကျော်ဇော်ဟန်တို့အား တရားစွဲဆိုစစ်ဆေးနေရာမှ ဇူလိုင်လ(၂၅)ရက်နေ့တွင် အမှုကို ရုပ်သိမ်းခွင့်ပြုလိုက်ခြင်းဖြစ်သည်။

Tachileik News Agency