~~~~~~~~⊰❂ unicode ❂⊱~~~~~~~~

ရှမ်းပြည်နယ်(အရှေ့ပိုင်း) တာချီလိတ်မြို့တွင် အထောက်အထားမဲ့ ဝင်လာသည့် ထိုင်းနိုင်ငံသား(၂)ဦးကို ၂၀၁၈ ခုနှစ်၊ စက်တင်ဘာလ(၇)ရက်နေ့ ညနေ(၆)နာရီခွဲက ဖမ်းဆီးရမိသဖြင့် ပြည်နှင်ဒဏ်အမိန့် တောင်းခံထားကြောင်း သိရသည်။

အဆိုပါ ထိုင်းနိုင်ငံသား အမျိုးသား(၁)ဦးနှင့် အမျိုးသမီး(၁)ဦးကို မိုင်းဆတ်မြို့ဘက်မှ တာချီလိတ်မြို့ဘက်သို့ လမ်းလျှောက်လာသည်ကို ပူးပေါင်း စစ်ဆေးရေးအဖွဲ့က စစ်ဆေး တွေ့ရှိရခြင်းဖြစ်ပြီး၎င်းတို့(၂)ဦးသည် ထိုင်းနိုင်ငံ၊ မယ်ဖလုံမြို့၊ တစ်ထိုင်းရွာတွင် နေထိုင်သည့် Sula Phong နှင့် Buder Mo Pu Ku တို့ဖြစ်ကြောင်း သိရသည်။

၎င်းတို့(၂)ဦးသည် တာချီလိတ်မြို့၊ မိုင်းဖုန်း(ခ)ကျေးရွာရှိ ဖခင်ဖြစ်သူထံ လည်ပတ်ရန် လာရောက်ခြင်း ဖြစ်ကြောင်းသိရပြီး နယ်စပ်မှ တရားမဝင်ဖြတ်သန်း ဝင်ရောက်ကာ လွယ်တော်ခမ်းရွာမှတစ်ဆင့် ဝင်ရောက်လာသဖြင့် လဝကအက်ဥပဒေပုဒ်မ ၃(၁)ကို ကျူးလွန်ကြောင်း စစ်ဆေးတွေ့ရှိရသော်လည်း အခြား ရာဇဝတ်မှုများ ကျူးလွန်ထားကြောင်း မတွေ့ရသဖြင့် ပြည်နှင်ဒဏ်ပေးနိုင်ရန် ပြည်နှင်မိန့် တောင်းခံထားခြင်းဖြစ်ကြောင်း သိရသည်။

ပြည်နှင်မိန့် တောင်းခံထားသည့် ကာလအတွင်း စက်တင်ဘာလ (၂၂)ရက်နေ့အထိ တာချီလိတ်မြို့မရဲစခန်းတွင် ထိန်းသိမ်းထားမည်ဖြစ်ကြောင်း သိရသည်။

Tachileik News Agency