~~~~~~~~⊰❂ unicode ❂⊱~~~~~~~~

ရှမ်းပြည်နယ်(အရှေ့ပိုင်း) ကျိုင်းတုံမြို့နယ်၊ ကတ်ဖကျေးရွာအုပ်စု၊ ကတ်ဖကျေးရွာနှင့် နောင်ငင်း ကျေးရွာကြား ကျိုင်းတုံ - မိုင်းလားကားလမ်းတွင် ၂၀၁၈ ခုနှစ်၊ စက်တင်ဘာလ (၂၃) ရက်နေ့ နံနက် (၃)နာရီခွဲဝန်းကျင်က ရှောင်တခင်ပိတ်ဆို့ ရှာဖွေစစ်ဆေးစဉ် ယာဉ်ပေါ်ပါသူများ ထွက်ပြေးပြီး ကျန်ရစ်သည့် မော်တော်ယာဉ်တွင်အိုက်စ် (၁၀၀) ကီလိုဂရမ်ကို စစ်ဆေးတွေ့ရှိရကြောင်း သိရသည်။

ကျိုင်းတုံမြို့မရဲစခန်းမှူး ဒုတိယရဲမှူးသန်းထွန်းအောင် ဦးစီး ရဲတပ်ဖွဲ့ဝင်များနှင့် မူးယစ်တပ်ဖွဲ့စု(၂၈) (ကျိုင်းတုံ)မှ ရဲတပ်ဖွဲ့ဝင်များ ပါဝင်သော ပူးပေါင်းအဖွဲ့သည် သက်သေများနှင့်အတူ ကျိုင်းတုံမြို့နယ်၊ ကတ်ဖအုပ်စု၊ ကတ်ဖကျေးရွာနှင့် နောင်ငင်းကျေးရွာကြား ကျိုင်းတုံ-မိုင်းလား သွားလမ်းမပေါ်တွင် ရှောင်တခင်ပိတ်ဆို့ ရှာဖွေ စစ်ဆေးမှုများ ပြုလုပ်နေစဉ် မိုင်းလားမြို့ဘက်မှ ကျိုင်းတုံမြို့တွင်းသို့ မောင်းနှင်လာသော Fortuner မော်တော်ယာဉ်အား စစ်ဆေးရန် ရပ်တန့်စေရာ မော်တော်ယာဉ်မှာ ရုတ်တရက်နောက်သို့ပြန်ဆုတ်ခဲ့ပြီး ယာဉ်မောင်းနှင့် ယာဉ်ပေါ်ပါ (၂) ဦး ကားပေါ်မှ ဆင်း၍ ထွက်ပြေးလွတ်မြောက်သွားကြောင်း သိရသည်။

ကျန်ခဲ့သည့် မော်တော်ယာဉ်အား စစ်ဆေးရာ ပီနံအိတ်အတွင်း လက်ဖက်ခြောက်အိတ်ဖြင့်ထုတ်ထားသည့် ICE (၁၀၀) ကီလိုဂရမ်ကို ဖမ်းဆီးရမိခြင်းဖြစ်ကြောင်း သိရသည်။

အဆိုပါ အမှုနှင့်စပ်လျဉ်း၍ ဥပဒေနှင့်အညီ အရေးယူဆောင်ရွက်ရန် ကျိုင်းတုံမြို့မရဲစခန်းတွင် မယ(ပ)၁၉၂/၂၀၁၈၊ မူးယစ်ဆေးဝါးနှင့်စိတ်ကိုပြောင်းလဲစေသော ဆေးဝါးများဆိုင်ရာဥပဒေပုဒ်မ ၁၉(က)/ ၂၀(က)/၂၁ ဖြင့် အမှုဖွင့်အရေးယူဆောင်ရွက်လျက်ရှိကြောင်း သိရသည်။

Tachileik News Agency
ဓာတ်ပုံ - ရဲတပ်ဖွဲ့