~~~~~~~~⊰❂ unicode ❂⊱~~~~~~~~

ရန်ကုန်တွင် ကျည်တောင့် (၉၀၀၀)ကျော် ဖမ်းဆီးရမိမှုနှင့် ဆက်စပ်သူတစ်ဦးအား ကျည်တောင့် (၁၀၀)နှင့်အတူ ဖမ်းဆီးရမိ
*********
ရန်ကုန်မြို့ လှည်းကူးမြို့နယ်တွင် ကျည်(၉၅၀၄)တောင့် ဖမ်းဆီးရမိမှုနှင့် ဆက်စပ်သူအား စမ်းချောင်းမြို့နယ် ပြည်ဂါးဒင်းအိမ်ရာဝင်ပေါက်အနီးတွင် မာစီးဒီးယာဉ်နှင့်အတူ ထပ်မံဖမ်းဆီးရမိပြီး ၎င်း၏နေအိမ်မှ ကျည်တောင့်(၁၀၀) ထပ်မံသိမ်းဆည်းရမိကြောင်း သိရသည်။

လှည်းကူးမြို့နယ်၊ ဇရပ်ကွင်းကျေးရွာ ရဲတံခွန်အဝေးပြေးကားလက်မှတ်အရောင်းဆိုင်၌ ငြိမ်းချမ်းအောင်ဆိုသူ အပ်နှံထားသည့် တပ်ကြပ်ကြီး အောင်မြတ်သူ အမည်ပါ သံသေတ္တာ (၂) လုံးအတွင်းမှ (၅.၅၆) ကျည် (၉၅၀၄) တောင့်ကို ၂၀၁၈ ခုနှစ်၊ စက်တင်ဘာလ(၃၀)ရက်နေ့ နေ့လယ်(၁၁)နာရီခွဲဝန်းကျင်တွင် ဖမ်းဆီးရမိသဖြင့် အောက်တိုဘာလ (၁) ရက်နေ့ တွင် လှည်းကူးမြို့မရဲစခန်း၌ (ပ) ၁၀၂၇/ ၂၀၁၈၊ လက်နက်အက်ဥပဒေပုဒ်မ ၁၉(ဃ)/၁၉(စ)ဖြင့် အမှုဖွင့် စုံစမ်းခဲ့ခြင်းဖြစ်ကြောင်း သိရသည်။

၁၃၀၀ အချိန်တွင် လှိုင်သာယာ မြို့နယ်ရဲတပ်ဖွဲ့မှူး ယာယီရဲမှူး မိုးကျော်ကျော် ဦးစီးအဖွဲ့သည် အဆိုပါအမှုနှင့် ဆက်စပ်သူဟုယူဆရသည့်  ဇော်ဇော်ထက်လူအား စမ်းချောင်းမြို့နယ်၊ မြေနီကုန်း (မြောက်)ရပ်ကွက်၊ ပြည်ဂါးဒင်းအိမ်ရာဝင်ပေါက်အနီး၌ မာစီဒီးယာဉ်နှင့်အတူ အောက်တိုဘာလ(၁)ရက်နေ့ နေ့လယ်(၁)နာရီအချိန်တွင် ဖမ်းဆီးရမိပြီးနောက် လှိုင်သာယာမြို့နယ်ရှိ ၎င်း၏ နေအိမ်အိပ်ခန်းအတွင်းမှ S&B 7.65 Br 13 MM(.32 Auto)ကျည် (၁၀၀) တောင့်အား ဖမ်းဆီးရမိခြင်းဖြစ်ကြောင်း သိရသည်။

 ဇော်ဇော်ထက်လူအား လှိုင်သာယာမြို့မရဲစခန်းတွင် (ပ)၃၆၉၁/၂၀၁၈၊ လက်နက်ဥပဒေပုဒ်မ ၁၉(စ)ဖြင့် အမှုဖွင့်စစ်ဆေးနေကြောင်း သိရသည်။
Tachileik News Agency
ဓါတ်ပုံ -MOHA