~~~~~~~~⊰❂Unicode Version ❂⊱~~~~~~~~

တာချီလိတ်မြို့တွင် မူးယစ်ဆေးသတင်းအရ ဝင်ရောက်ရှာဖွေရာမှ လက်နက်ခဲယမ်းသယ်ဆောင်လာသူကို ဖမ်းမိ
**************
ရှမ်းပြည်နယ်အရှေ့ပိုင်း၊ တာချီလိတ်မြို့တွင် မူးယစ်ဆေးရောင်းချသည်ဟု သတင်းရသည့် ရာဘာခြံအတွင်း ရဲတပ်ဖွဲ့က ၂၀၁၉ ခုနှစ်၊ ဇန်နဝါရီလ (၄)ရက်နေ့ နေ့လယ် (၂)နာရီအချိန်က ဝင်ရောက်ဖမ်းဆီးရာ တရားမဝင် လက်နက်ခဲယမ်းများအား လက်ဝယ်ကိုင်ဆောင်အသုံးပြုသူအား ဖမ်းဆီးရမိလိုက်ကြောင်း သိရသည်။

မူးယစ်ဆေးဖမ်းဆီးရမိမှုမှ ကွင်းဆက်ဖေါ်ထုတ်ချက်အရ မူးယစ်ဆေးရောင်းချသည်ဟု သတင်းရသည့် တာချီလိတ်မြို့၊ လွယ်တော်ခမ်းကျေးရွာအုပ်စု၊ တာချီလိတ် - မိုင်းဆတ်ကားလမ်းဘေး၊ စန်းလုရွာအနီးရှိ ရော်ဘာခြံအတွင်း ရဲတပ်ဖွဲ့က ဝင်ရောက်ရှာဖွေရာ ရော်ဘာခြံဘက်မှ ကားလမ်းမဘက်သို့ ဆိုင်ကယ် မောင်းနှင်လာသည့် အမျိုးသားတစ်ဦးက ဆိုင်ကယ်ကိုရပ်တန့်ပြီး ထွက်ပြေးရန် ကြိုးစားခဲ့ခြင်းဖြစ်ကြောင်း သိရသည်။

ရဲတပ်ဖွဲ့ဝင်များအား ထွက်ပြေးရန်ကြိုးစားသည့် အိုက်န(ခ)အားနအား တားဆီးနိုင်ခဲ့ပြီး ၎င်း၏ဆိုင်ကယ်ထိုင်ခုံအောက်မှ (.45) ကျည် (၇)တောင့်ထည့်ထားသည့် ပစ္စတိုသေနတ်တစ်လက်ကို ဖမ်းဆီးရမိခြင်းဖြစ်ကြောင်း သိရသည်။

လက်နက်ခဲယမ်းများနှင့်အတူ ဖမ်းမိသည့် အိုက်န (ခ) အားနအား တာချီလိတ်မြို့မရဲစခန်းတွင် (ပ) ၆/၂၀၁၉၊ ၁၉၂၄ ခုနှစ်၊ ရှမ်းပြည်နယ်လက်နက်အမိန့်အပိုဒ် ၁၂ (က)ဖြင့် အမှုဖွင့်စစ်ဆေးနေကြောင်း သိရသည်။

Tachileik News Agency
ဓါတ်ပုံ - ရဲတပ်ဖွဲ့