~~~~~~~~⊰❂ Unicode Version ❂⊱~~~~~~~~

တာချီလိတ်မြို့တွင် မော်တော်ယာဉ်မောင်းနှင်လာသူနှစ်ဦးထံမှ လက်နက်ခဲယမ်း၊ စိတ်ကြွဆေးများ ဖမ်းဆီးရမိ
**************
ရှမ်းပြည်နယ်အရှေ့ပိုင်း၊ တာချီလိတ်မြို့တွင် သေနတ်ခါးကြားထိုးပြီး မော်တော်ယာဉ်မောင်းနှင်လာသည့် အမျိုးသား(၂)ဦးကို စိတ်ကြွဆေးပြားများနှင့်အတူ ၂၀၁၉ ခုနှစ်၊ ဇန်နဝါရီလ (၂၄)ရက်နေ့ ညပိုင်းက ပိတ်ဆို့ရှာဖွေမှုအတွင်း ဖမ်းဆီးရမိလိုက်ကြောင်း သိရသည်။

ဝိန်းကျောက်ရပ်ကွက်၊ ကားလေးကွင်းရှေ့လမ်းဆုံတွင် တာချီလိတ်မြို့မရဲတပ်ဖွဲ့ဝင်များသည် သက်သေများပါဝင်သည့်အဖွဲ့များဖြင့် ပိတ်ဆို့စစ်ဆေးနေစဉ် ည (၁၀)နာရီ (၅၀)မိနစ်အချိန်က ဟောင်လိတ်ဘက်မှ တာချီလိတ်မြို့တွင်းသို့ ကျော်ကျော်ဝင်း မောင်းနှင်လာသည့် Vigo အနက်ရောင် မော်တော်ယာဉ်အား စစ်ဆေးရာ သေနတ်(၂)လက်၊ ကျည်(၁၂)တောင့်နှင့် စိတ်ကြွဆေးပြား (၁၇)ပြားတို့ကို ဖမ်းဆီးရမိခြင်းဖြစ်ကြောင်း သိရသည်။

အဆိုပါမော်တော်ယာဉ်မောင်းနှင်လာသည့် စိုင်းလုံသန်းထံမှ စိတ်ကြွဆေးပြား (၁၇)ပြားနှင့် ၎င်း၏ခါးကြားမှ Gas သေနတ်တစ်လက်၊ ဘေးတွင်လိုက်ပါလာသည့် ကျော်ကျော်ဝင်း၏ ခါးကြားတွင် ထိုးထားသည့် Glock Ges.m.b.H စာတမ်းပါ သြစတြေးလျနိုင်ငံထုတ် ပစ္စတိုသေနတ်တစ်လက်နှင့် (၉)မမကျည် (၁၂)တောင့်တို့ကို ဖမ်းဆီးရမိခြင်းဖြစ်ကြောင်း သိရသည်။

မူးယစ်ဆေး၊ လက်နက်ခဲယမ်းများနှင့်အတူ ဖမ်းမိသည့် ကျော်ကျော်ဝင်းနှင့် စိုင်းလုံသန်းတို့အား တာချီလိတ်မြို့မရဲစခန်းတွင် မယ(ပ) ၁၁/၂၀၁၉၊ မူး/စိတ်ပုဒ်မ ၁၆(၈)/၂၂(ခ)/၂၁ ဖြင့် အမှုဖွင့်စစ်ဆေးနေကြောင်း သိရသည်။

Tachileik News Agency
ဓါတ်ပုံ - ရဲတပ်ဖွဲ့