~~~~~~~~⊰❂ Unicode Version ❂⊱~~~~~~~~

တာချီလိတ်တွင် သေနတ်ဖြင့်ပစ်ခတ်ခံရသည့် ထိုင်းနိုင်ငံသားမှာ ငွေလာယူရန် ဖုန်းဆက်ခေါ်သဖြင့် သွားရာမှ အသတ်ခံခဲ့ရ
************
ရှမ်းပြည်နယ်အရှေ့ပိုင်း၊ တာချီလိတ်မြို့တွင် ၂၀၁၉ ခုနှစ်၊ ဖေဖေါ်ဝါရီလ (၈)ရက်နေ့ ည (၉)နာရီကျော်က သေနတ်ဖြင့် ပစ်သတ်ခံရသည့် ထိုင်းနိုင်ငံသား လေး(ခ) Mr.Wuttichai Gobua သည် ငွေလာယူရန် ဖုန်းဆက်ခေါ်သဖြင့် သွားရာမှ အသတ်ခံရခြင်းဖြစ်ကြောင်း သိရသည်။

 လေး(ခ) Mr.Wuttichai Gobua သည် နေအိမ်တွင်ရှိနေစဉ် ပိုက်ဆံလာယူရန် ဖုန်းဆက်ခေါ်သဖြင့် ည(၉)နာရီဝန်းကျင်၌ နေအိမ်မှ ကားဖြင့်ထွက်သွားခဲ့ပြီးနောက် ဖုန်းအဆက်အသွယ်မရတော့ခြင်းဖြစ်ကြောင်း ၎င်း၏ဇနီးဖြစ်သူက ပြောကြားထားသည်ဟု သိရသည်။

ခင်ပွန်းဖြစ်သူထွက်သွားပြီး မကြာမီ ဖုန်းဆက်ကြည့်ရာ ဖုန်းမကိုင်တော့သဖြင့် ဇနီးဖြစ်သူက လိုက်သွားရာ 1 G 1 ဟိုတယ်ရှေ့လမ်းမပေါ်တွင် ခင်ပွန်းဖြစ်သူ၏ကားကိုတွေ့ရပြီး ကားနံဘေးတွင် ခင်ပွန်းဖြစ်သူမှာ ပက်လက်အနေအထားဖြင့် သေဆုံးနေသည်ကို တွေ့ခဲ့ရခြင်းဖြစ်ကြောင်း သိရသည်။

ရဲတပ်ဖွဲ့က အခင်းဖြစ်နေရာအား စစ်ဆေးရာ ကျည်ခွံ (၃)ခု၊ အမျိုးသမီးစီးဖိနပ်တစ်ရံနှင့် ဖုန်းတစ်လုံးတို့ကို သိမ်းဆည်းရမိထားပြီး အမှုအားဆက်လက်စစ်ဆေးနေကြောင်း သိရသည်။

အဆိုပါပစ်ခတ်မှုနှင့်ပတ်သက်၍ တာချီလိတ်မြို့မရဲစခန်းတွင် (ပ) ၆၂/၂၀၁၉၊ ရာဇသတ်ကြီးပုဒ်မ ၃၀၂ ဖြင့်အမှုဖွင့် စုံစမ်းနေကြောင်း သိရသည်။

တာချီလိတ်မြို့တွင် (၁၈)ရက်အတွင်း သေနတ်ပစ်ခတ်မှု(၃)ခုဖြစ်ပွားခဲ့ရာ လူ (၂)ဦးသေဆုံးပြီး တစ်ဦး အပြင်းအထန်ဒဏ်ရာရသွားခဲ့ကာ ပစ်ခတ်မှုများမှ ကျူးလွန်သူများမှာ လွတ်မြောက်နေဆဲဖြစ်သည်။

Tachileik News Agency
ဓါတ်ပုံ - နာရေးကူညီမှုအသင်း