~~~~~~~~⊰❂ Unicode Version ❂⊱~~~~~~~~

ခရိုင်ရဲတပ်ဖွဲ့မှူး ဒုရဲမှူးကြီးပေါ်ထွန်း၊ မြို့နယ်ရဲတပ်ဖွဲ့မှူးတို့ အနီးကပ်ကြီးကြပ်မှုဖြင့် ရဲတပ်ဖွဲ့ဝင်များ ပါဝင်သည့် ပူးပေါင်းအဖွဲ့သည် ဆန်ဆိုင်း(ခ)ရပ်ကွက်၊ မြို့ပတ်လမ်းဆုံတွင် စစ်ဆေးမှုများ ပြုလုပ်စဉ် စိုင်းအိုက်လူမောင်းနှင်လာသည့် မော်တော်ယာဉ်အား တားမြစ် စစ်ဆေးရာ ပစ္စတိုသေနတ် (၅)လက်၊ ကျည်မျိုးစုံ (၉၄)တောင့်၊ စိတ်ကြွဆေးပြား (၁၉,ဝဝဝ)ပြား၊ အိုက်စ် အဖြူရောင် (၁၂၅)ဂရမ်၊ အိုက်စ် အညိုရောင် (၈၅)ဂရမ်၊ ဘိန်းဖြူ (၃၀၀)ဂရမ်၊ ဘိန်းညို (၃၀)ဂရမ်ခန့်၊ မြန်မာငွေ (၃,၇၅၀)၊ ထိုင်းဘတ်ငွေ(၂၀)၊ တရုတ်ယွမ်ငွေ (၆၂)ယွမ်၊ မလေးရှားရင်းဂစ် (၁)ရင်းဂစ်၊ ဘရူနိုင်းဒေါ်လာ (၁)ဒေါ်လာ၊ ဒစ်ဂျစ်တယ် ချိန်ခွင်(၂)ခု၊ မူးယစ်ဆေးထုပ်ပိုးရာတွင် အသုံးပြုသည့် အိတ်(၁၉၀)လုံးတို့ကို သိမ်းဆည်း ရမိကြောင်း သိရသည်။

ဆက်လက်ပြီး၎င်းနေထိုင်ရာ ဆန်ဆိုင်း(ခ)ရပ်ကွက်၊ စံပယ်လမ်းသွယ်ရှိ နေအိမ်အား ဝင်ရောက်ရှာဖွေရာ သေနတ်အိတ်(၂)ခု၊ ခါးချိတ်သေနတ်အိတ်(၃)ခု၊ အနက်ရောင်မှတ်ပြောင်း (၁)ခု၊ Police စာတမ်းပါ အနက်ရောင် ခါးပတ်(၁)ခု၊ အရွယ်အစားမျိုးစုံ ဓားဦးချွန်(၃)ချောင်း၊ ဖန်ပေါင်းအိုး (၁)လုံး၊ အအေးစုပ်ပိုက် (၁)ထုပ်၊ မှိုင်းခံစက္ကူ (၉၀)ရွက်၊နှင့် အစိမ်းရောင်တိပ်(၁)ထုပ်တို့ကို သိမ်းဆည်းရမိကြောင်း သိရသည်။

အဆိုပါ ဖမ်းဆီးမှုအား ခရိုင်ရဲတပ်ဖွဲ့မှူး ဒုရဲမှူးကြီး ပေါ်ထွန်း၊ မြို့နယ်ရဲတပ်ဖွဲ့မှူး ရဲမှူးလှဦး၊ မြို့မစခန်းမှူး ဒုရဲမှူးမျိုးခိုင်၊ ခမရ(၅၂၆)မှ ဗိုလ်ကြီးရန်လင်းအောင်၊ နယ်ထိန်းခေါင်းဆောင် ရဲအုပ်ကိုကိုဦးတို့ ဦးစီးသည့် နယ်ထိန်းတပ်ဖွဲ့ဝင်များ၊ ပြည်နယ်(မှု/ကူ)မှ ဒုရဲအုပ် ဝေလင်းထွန်း၊ ခရိုင်(မှု/နှိမ်)မှ ရဲအုပ် မြင့်နိုင်၊ သတင်းရဲတပ်ဖွဲ့မှ ရဲအုပ် မင်းကိုကို၊ ဒုရဲအုပ် ကျော်ဇေယျာဝင်း၊ သက်သေများ အဖြစ် ဝမ်ကောင်းရပ်ကွက် ပြည်သူ့စစ် ဦးစည်သူ၊ ဦးထွန်းထွန်းလေးတို့ ပါဝင်သည့် ပူးပေါင်းအဖွဲ့ဖြင့် ရှောင်တခင် ပိတ်ဆို့စစ်ဆေးရာမှ ဖမ်းဆီးရမိခဲ့ခြင်း ဖြစ်ကြောင်း သိရသည်။

လက်နက်ခဲယမ်း၊ မူးယစ်ဆေးများဖြင့် ဖမ်းဆီးရမိသည့် စိုင်းအိုက်လူအား တာချီလိတ်မြို့မရဲစခန်းတွင် မယ(ပ) ၂၀/၂၀၁၉၊ မူး/စိတ် ၁၉ (က)၊ ၂၀(က)၊ ၂၂(ခ) တို့ဖြင့် အမှုဖွင့်ထားရှိပြီး ဆက်လက်၍ စစ်ဆေးနေကြောင်း သိရှိရသည်။

Tachileik News Agency
ဓာတ်ပုံ - KHS