~~~~~~~~⊰❂ Unicode Version ❂⊱~~~~~~~~

ရဲတပ်ဖွဲ့က ဆေခမ်းရပ်ကွက်၊ ဟောင်လိတ်မီးပွိုင့်လမ်းဆုံတွင် ပိတ်ဆို့စစ်ဆေးနေစဉ် ည(၁၀)နာရီ (၃၀)မိနစ်က စိုင်းဝန်းကျောက်ဆိုသူ မောင်းနှင်လာသည့် Toyota Mark-X ယာဉ်အား စစ်ဆေးရာ စိုင်းဝန်းကျောက် လွယ်ထားသည့် အနက်ရောင်သားရေအိတ်အတွင်းမှ GLOCK အမျိုးအစား ပစ္စတိုသေနတ်တစ်လက်နှင့် ကျည် (၁၀) တောင့်ကို ကျည်အိမ်တပ်လျှက်၊ ပွိုင့် ၂၂ ကျည် (၁၉) ကို ရှာဖွေဖမ်းဆီးရရှိခဲ့ကြောင်း၊ ဆက်လက်၍ ည (၁၀) နာရီ (၅၀) မိနစ်က ယာဉ်မောင်း အိုက်နွန်းမောင်းနှင်လာသည့် Toyota Revo ယာဉ်အား စစ်ဆေးရာ မော်တော်ယာဉ်၏ တူးဘောက် အတွင်း GLOCK အမျိုးအစား ပစ္စတိုသေနတ်တစ်လက်နှင့် ကျည် (၁၃)တောင့်ကို ကျည်အိမ်တပ်လျှက်ဖြင့် ဖမ်းဆီးရမိခြင်းဖြစ်ကြောင်း သိရသည်။

မြို့နယ်ရဲတပ်ဖွဲ့မှူး ရဲမှူး လှဦး၊ ဟောင်လိတ်ရဲကင်းစခန်းမှူး ရဲအုပ်ချမ်းမြေ့အောင်ဦးစီးသည့် တပ်ဖွဲ့ဝင်များ၊ ခမရ(၅၂၆)မှ ဗိုလ်ကြီးဖြိုးဇော်ဦး ဦးစီးအဖွဲ့၊ ပြည်နယ်မှု/ကူမှ တပ်ကြပ်ထွန်းဝင်းဇော်၊ အမှတ်(၁၁၉) ယာဉ်ထိန်း ရဲတပ်ဖွဲ့စု (တာချီလိတ်ခရိုင်)မှ တပ်ကြပ်ကြီး ဝင်းကို၊ ပြည်သူ့စစ်အဖွဲ့ဝင်များ ပါဝင်သည့် ပူးပေါင်းအဖွဲ့က ဖမ်းဆီးရမိခြင်းဖြစ်ကြောင်း သိရသည်။

လက်နက်များနှင့်အတူ ဖမ်းဆီးရမိသည့် စိုင်းရှန်နွန်းကို တာချီလိတ်မြို့မရဲစခန်းတွင် (ပ)၇၃/၁၉၊ ရှမ်းပြည်နယ်လက်နက် အမိန့်အပိုဒ် ၁၂၉(က)ဖြင့် လည်းကောင်း၊ အိုက်နွန်းကို တာချီလိတ်မြို့မရဲစခန်းတွင် (ပ)၇၄/၁၉၊ ရှမ်းပြည်နယ်လက်နက်အမိန့်အပိုဒ် ၁၂၉(က)ဖြင့် အသီးသီး အမှုဖွင့်စစ်ဆေးနေကြောင်း သိရသည်။

တာချီလိတ်မြို့တွင် ဇန်နဝါရီလကုန်ပိုင်းနှင့် ဖေဖော်ဝါရီလဆန်းပိုင်းအတွင်း သေနတ်ပစ်ခတ်မှု (၃)ကြိမ်ဖြစ်ပွားခဲ့ကာ တာချီလိတ်မြို့မှ လုပ်ငန်းရှင်တစ်ဦးနှင့် ထိုင်းနိုင်ငံသားတစ်ဦးတို့ သေဆုံးခဲ့ပြီး ကျူးလွန်သူများ လွတ်မြောက်နေဆဲဖြစ်သဖြင့် ရဲတပ်ဖွဲ့က ပုံမှန်စစ်ဆေးမှုများအပြင် ပိတ်ဆို့နှင့် ရှောင်တခင်စစ်ဆေးမှုများအား တိုးမြှင့်လုပ်ဆောင်နေရာ ယခုဖမ်းဆီးရမိမှုမှာ ဖေဖော်ဝါရီလအတွင်း လက်နက်၊ခဲယမ်းများဖြင့် (၃)ကြိမ်မြောက် ဖမ်းဆီးရရှိမှုဖြစ်သည်။

သတင်း/ဓာတ်ပုံ - ဟန်စိုးထိုက်(Tachileik News Agency)