မန္တလေးတိုင်း၊ သပိတ်ကျင်းမြို့နယ်၊ တကောင်းတိုက်နယ်အတွင်း စစ်ကောင်စီတပ်၏ ယာဉ်တန်းအား ၂၀၂၃ခုနှစ်၊ ဧပြီလ (၁၂)ရက်နေ့၏ နံနက်ပိုင်းက နှစ်ကြိမ်မိုင်းခွဲတိုက်ခိုက်ခဲ့ရာ ကားတစ်စီးပျက်စီးပြီး စစ်ကောင်စီတပ်သားများ ထိခိုက်သေဆုံးသူရှိကြောင်း သိရသည်။

တကောင်းတိုက်နယ်အတွင်း (၄)မိုင်ရွာ နှင့် (၆)မိုင်ရွာကြားတွင် အင်းနက်မှ ထွက်လာသော စစ်ကောင်စီတပ်၏ ( ၁၂ )ဘီးကား(၂)စီးအား မိုင်း (၃)လုံးဖြင့် နံနက် ( ၅ )နာရီကျော်တွင် တစ်ကြိမ် ဖောက်ခွဲတိုက်ခိုက်ရာ ကားနောက်ပိုင်း ထိမှန်သွားသဖြင့် စစ်ကောင်စီတပ်သားများ ‌ကားပေါ်မှ လက်နက်ငယ်များဖြင့် ရမ်းသမ်းပစ်ခတ်ခဲ့သည်ဟု သိရသည်။

ထို့အပြင် ၎င်းကား( ၂ ) စီးအား နောင်လုံသံတံတားအနီးတွင် နံနက် ( ၅ ) နာရီကျော်တွင်ပင် မိုင်း ( ၃ )လုံးဖြင့် ထပ်မံဖောက်ခွဲတိုက်ခိုက်ရာ ရှေ့ဆုံးကားခေါင်းခြမ်းကားထိမှန်ပြီး မီးလောင်ပျက်စီးသွားကြောင်း သိရသည်။

တိုက်ခိုက်မှုနှစ်ကြိမ်တွင် စစ်ကောင်စီတပ်သားများ ထိခိုက်သေဆုံး သူရှိနိုင်ပြီး တကောင်းမြို့တွင်းမှ နာရေးကား ( ၃ )စီးဖြင့် လာရောက်‌ သယ်ဆောင်သွားသည်ဟု တကောင်း PDF က သတင်းထုတ်ပြန်ထားသည်။

တိုက်ခိုက်မှု ဖြစ်ပွားရာနေရာတလျှောက် ပြည်သူများအနေနှင့်မသွားကြရန်၊ ထုတ်ပြန်ချက် စည်းကမ်းချက်များအား လိုက်နာပေးရန်နှင့် တစ်စုံတစ်ရာ ဖြစ်ပွားခဲ့ပါက တကောင်း ပကဖ အနေနှင့် လုံးဝတာဝန်ယူမည်မဟုတ်ကြောင်း သတိပေးထုတ်ပြန်ထားသည်။