ပြည်သူ့ကာကွယ်ရေးတပ်ဖွဲ့(PDF)ဝင်များ နယ်စပ်များကနေ ပြည်တော်ပြန်များအဖြစ် အပြင် နှင့် စစ်ဘေးရှောင်ဒုက္ခသည်စခန်းများကနေ အတွင်းသို့ ဝင်ရောက်လာနိုင်သည်ဟုဆိုကာ အာဏာသိမ်းစစ်ကောင်စီက ၎င်း၏ လက်အောက်ခံ တပ်ဖွဲ့ဝင်များနှင့် ဌာနများကို သေချာ စိစစ်နိုင်ရန် လျှို့ဝှက်ညွှန်ကြားထားကြောင်း သိရသည်။

မြန်မာ - ထိုင်း နယ်စပ်ဒေသများရှိ တိုင်းရင်းသားလက်နက်ကိုင်ဒေသများတွင် စစ်သင်တန်းတက်ပြီး ပြန်လာသူများအား ထိုင်းဘက်သို့ အဝင် အဖမ်းခံပြပြီး ပြည်တော်ပြန်များအဖြစ် လွှဲလာသူများကို သေချာစိစစ်ရန် နှင့် နယ်စပ်ဝင်ပေါက်များအားလုံး ကြပ်မတ်ဆောင်ရွက်ရေး ၂၀၂၁ခုနှစ် နိုဝင်ဘာလ၏ ဒုတိယပတ်နောက်ဆုံးရက်က လျှို့ဝှက်ညွှန်ကြားထားကြောင်း Tachileik News Agency ၏ ခိုင်မာသည့် သတင်းရင်းမြစ်များထံက သိရသည်။

ပြည်သူ့ဘဏ္ဍာငွေများဖြင့် ဝယ်ယူဖြည့်တင်းထားသည့် လက်နက်များကို အားကိုးအသုံးချပြီး အာဏာသိမ်းထားသည့် စစ်တပ်သည် ၎င်းတို့အား တော်လှန်နေသည့် ပြည်သူ့ကာကွယ်ရေးတပ်ဖွဲ့(PDF)များနှင့် တော်လှန်ရေးလက်နက်ကိုင်အဖွဲ့အစည်းများကို အင်အားအများအပြားဖြည့် ထိုးစစ်ဆင်ခြင်းအပြင် PDF ဟု သတ်မှတ်ကာ ဖမ်းဆီးနေခြင်း ဖြစ်သည်။