တာချီလိတ်မြို့ မီးဘေးသင့်ဒေသခံများအတွက် အရေးပေါ်စားသုံးရန် ဆန်အိတ်ပေါင်း(၁၂၀)ခန့် လိုအပ်လျှက်ရှိကြောင်း ခရိုင်စီမံခန့်ခွဲရေးကော်မတီမှ သိရသည်။
မီးလောင်ကျွမ်းခဲ့ခြင်းကြောင့် ပြန်လည်ထူထောင်ရေးကာလအတွင်း စားသုံးရန်အတွက် တစ်အိမ်ထောင်လျှင် (၄)အိတ်နှုန်းဖြင့် ခန့်မှန်းတွက်ချက်မှုအရ ဆန်အိတ်ပေါင်း(၁၂၀)အိတ်ခန့် လိုအပ်လျှက်ရှိကြောင်း သိရသည်။
"သူတို့မီးလောင်သွားလို့ အခုချိန်မှာ ဘာမှမကျန်တော့ဘူး အဓိက အခုချိန်မှာ စားဖို့အတွက် ဆန်လိုအပ်တာပါ၊ ဘာဆန်ဘဲလာလှူလှူ ရတယ်၊ မဟာမြတ်မုနိကျောင်းထဲ ယာယီကယ်ဆယ်ရေးစခန်း ဖွင့်ထားပါတယ်"ဟု တာချီလိတ်ခရိုင်စီမံခန့်ခွဲရေးကော်မတီ ဥက္ကဌ၊ ခရိုင်အုပ်ချုပ်ရေးမှူး ဦးတင်ဝင်းရွှေက ပြောသည်။
ယခုလက်ရှိတွင် တာချီလိတ်မြို့ပေါ်မှ စေတနာရှင် အလှူရှင်များနှင့် ထိုင်းနိုင်ငံမှ အလှူရှင်များ ပစ္စည်းအမျိုးအစားစုံလင်စွာ လာရောက်လှူဒါန်းလျှက်ရှိကြောင်းနှင့် တစ်အိမ်ထောင်ကို ဆန်(၄)အိတ်နှုန်း ဖြင့် (၁၁၆)အိတ်လိုလျှက်ရှိခြင်းဖြစ်ပြီး၊ ခန့်မှန်းခြေ စုစုပေါင်းလိုအပ်ချက်မှာ အိတ်ပေါင်း(၁၂၀)ကျော်ခန့် လိုအပ်လျှက်ရှိခြင်းဖြစ်ကြောင်း သိရသည်။
ဧပြီလ(၉)ရက်နေ့ ည(၇)နာရီဝန်းကျင်မှ စ၍ အချိန်(၂)နာရီကျော်အကြာ လောင်ကျွမ်းခဲ့သော အဆိုပါ မီးလောင်မှုကြောင့် ၀ါးထရံအိမ်(၉)လုံး၊ ပျဉ်ထောင်အိမ် (၁၅)လုံး နှင့် အုတ်ညှပ်အိမ် (၅)လုံး စုစုပေါင်း အိမ်ခြေ (၂၉)လုံး ပြာကျသွားခဲ့ရပြီး ကျား(၇၆)ဦး နှင့် မ (၈၉)ဦး စုစုပေါင်း (၁၆၅)ဦး အိုးမဲ့အိမ်မဲ့ဖြစ်ခဲ့ရကြောင်း သိရသည်။
