~~~~~~~~⊰❂ Unicode Version ❂⊱~~~~~~~~

တာချီလိတ်ခရို်င်တွင်း စိုက်ခင်းများတွင် ဖျက်အားပြင်း ငမြှောင်တောင်ပိုးကျနေပြီး တာချီလိတ်မြို့နယ်တွင် အများဆုံးတွေ့ရှိ
*************
ရှမ်းပြည်နယ်အရှေ့ပိုင်း၊ တာချီလိတ်ခရိုင်အတွင်း စိုက်ခင်းများတွင် ဖျက်အားပြင်းငမြှောင်တောင်ကျရောက်နေပြီး တာချီလိတ်မြို့နယ်တွင် အများဆုံးကျရောက်နေကြောင်း ခရိုင်စိုက်ပျိုးရေးဦးစီးဌာနထံမှ သိရသည်။

“အခုက မြို့နယ်တိုင်းလိုလိုမှာကို ကျနေပါတယ်။ အနည်းနဲ့အများပဲ ကွာတာပါ။ တာချီလိတ်မြို့နယ်ကတော့ အဆိုးဆုံးလို့ ပြောရမယ်။ ငမြှောင်တောင်ပိုးကျတယ်ဆိုရင် ဌာနကနည်းပညာပေးပြီး လိုအပ်တဲ့ အကူအညီများဆောင်ရွက်ပေးနေပါတယ်”ဟု တာချီလိတ်ခရိုင် စိုက်ပျိုးရေးဦးစီးဌာနမှ လက်ထောက်ညွှန်ကြားရေးမှုး ဦးလှဝင်းက တာချီလိတ်သတင်းအေဂျင်စီသို့ ပြောသည်။

ဒေသတွင်းတောင်သူပညာပေးနှင့် ပိုးကျသည့်စိုက်ခင်းများသို့ ကွင်းဆင်းနှိမ်နှင်းခြင်းများကို ဆောင်ရွက်ပေးထားပြီး ငမြှောင်တောင်ပိုးကျသည်ဟု သံသယရှိပါက နီးစပ်ရာစိုက်ပျိုးရေးဦးစီးဌာနသို့ အမြန်ဆုံးဆက်သွယ်အကြောင်းကြားရန် တိုက်တွန်းထားရာ ရှမ်းပြည်နယ်အရှေ့ပိုင်း၊ မိုင်းကိုးကျေးရွာအုပ်စု၊ ဝမ်မုံကျေးရွာတွင် ဖျက်အားပြင်းငမြှောင်တောင်ပိုးကျနေကြောင်း ဆက်သွယ်အကြောင်းကြားသဖြင့် ၂၀၁၉ ခုနှစ်၊ ဇွန်လ (၂၁) ရက်နေ့ ညနေပိုင်းတွင် စိုက်ပျိုးရေးဦးစီးဌာန၏ ကျွမ်းကျင်ဝန်ထမ်းများဖြင့် သွားရောက်နှိမ်နှင်းပေးထားကြောင်း သိရသည်။

"ဒီပိုးက အခါတိုင်းကျတဲ့ငမြှောင်တောင်နဲ့မတူဘူး။ သူကဖျက်စီးမှုနှုန်းမြှင့်တယ်။ အသိပညာပေးမှုတွေက ကျေးရွာတွေအလိုက် သင်္ကြန်မတိုင်ခင်ကတည်းကဆောင်ရွက်ထားတာ။ ဒါကြောင့် ရွာတွေက ကျနေပြီ။ ဒီပိုးနဲ့တူတယ်ဆိုပြီး လှမ်းသတင်းပို့ကြတာ"ဟု တာချီလိတ်မြို့နယ် စိုက်ပျိုးရေးဦးစီးဌာန ဦးစီးမှူး ဦးစိုင်းခင်ဇော်လတ်က တာချီလိတ်သတင်းအေဂျင်စီသို့ ပြောသည်။
ဒေသတွင်း စိုက်ခင်းများတွင် ငမြှောင်တောင်ကျရောက်မှုအား ခရိုင်ပိုးမွှားတာဝန်ခံ၊ မြို့နယ်စိုက်ပျိုးရေးဦးစီးဌာန ဝန်ထမ်းများက သွားရောက်နှိမ်နှင်းပေးရာတွင် ပိုးကျရောက်မှုအခြေအနေနှင့်ပတ်သက်၍ ကွင်းဆင်းလေ့လာသည့် ပြည်သူ့လွှတ်တော်ကိုယ်စားလှယ် ဦးဌေးဝင်း၊ တာချီလိတ်မြို့နယ်အထွေထွေအုပ်ချုပ်ရေးဦးစီးဌာနနှင့် ဌာနဆိုင်ရာဝန်ထမ်းများက တောင်သူများနှင့်အတူ စိုက်ခင်းတွင်းမှ ငမြှောင်တောင်ပိုး ဖယ်ရှားခြင်းအား ဝိုင်းဝန်းကူညီပေးကြသည်ကို တွေ့ရသည်။

ငမြှောင်တောင်ပိုးဖလံများသည်  တစ်ညလျှင် မိုင်(၆၀)ကျော်အထိ ပျံသန်းနိုင်ပြီး ဖလံအမတစ်ကောင်သည် (၁) ကြိမ်လျှင် ဥပေါင်း (၁၅၀)မှ (၂၀၀) ကျော်အထိ ဥချနိုင်ပြီး အစောဆုံး (၂)ရက်မှ (၃)ရက်အတွင်း အကောင်ပေါက်ကာ စိုက်ခင်းအား စတင်ဖျက်ဆီးပြီး လောက်ကောင်ဖြစ်လာပါက နှိမ်နှင်းရခက်ခဲကြောင်း သိရသည်။

ငမြှောင်တောင်ပိုး ကျရောက်သည့်လက္ခဏာများကို လက်ကမ်းစာစောင်များ၊ ဗီနိုင်းများဖြင့် ကျေးရွာများတွင် ဖြန့်ဝေပေးထားပြီး စိုက်ခင်းများတွင် ငမြှောင်တောင်ပိုးကျသည်ဟု သံသယရှိသည်နှင့် စိုက်ပျိုးရေးဦးစီးဌာနသို့ ဆက်သွယ်အကူအညီတောင်းပါက လာရောက်နှိမ်နှင်းပေးမည်ဖြစ်ကြောင်း သိရသည်။

သတင်း၊ဓါတ်ပုံ #ဟန်စိုးထိုက်