~~~~~~~~⊰❂ Unicode Version ❂⊱~~~~~~~~

ဘတ်ငွေ (၇)သန်းကျော်ကို ဓါးပြတိုက်သွားသည့်လူငယ်နှစ်ဦးအနက် တစ်ဦးကို အသေပစ်ခတ်ဖမ်းဆီးရမိ
**********
ထိုင်းနိုင်ငံ၊ ဘန်ကောက်တွင် ဘတ်ငွေ (၇.၂)သန်းကို ဓါးမြတိုက်သွားသူနှစ်ဦးအနက် အသက်(၂၇)နှစ်အရွယ် အမျိုးသားတစ်ဦးကို ရဲတပ်ဖွဲ့က မတ်လ (၄)ရက်နေ့ နံနက်ပိုင်းတွင် အသေပစ်ခတ်ဖမ်းဆီးလိုက်ကြောင်း The Nation သတင်းဖေါ်ပြချက်အရ သိရသည်။

ယခုပစ်ခတ်ဖမ်းဆီးခဲ့ရသူမှာ ဖေဖေါ်ဝါရီလ (၂၃)ရက်နေ့က ဘန်ကောက်ရှိ Bic C Extra ဈေးဝယ်စင်တာရှေ့တွင် ဘတ်ငွေ (၇)သန်းကျော်သယ်လာသည့် ငွေသယ်ယာဉ်အား ဓါးပြတိုက်သွားသူနှစ်ဦးအနက် တစ်ဦးဖြစ်ပြီး အသက် (၁၉)နှစ်အရွယ် အမျိုးသားကိုမူ ဖေဖေါ်ဝါရီလ (၂၇)ရက်နေ့တွင် ဖမ်းဆီးရမိထားခြင်း ဖြစ်ကြောင်း သိရသည်။

ရဲတပ်ဖွဲ့က အဆိုပါငွေသယ်ကားအား ဓါးပြတိုက်သွားသူများ ပုန်းအောင်းနေသည်ဟု သံသယရှိသည့်နေရာများအနီးတဝိုက်တွင် စုံစမ်းပြီးနောက် ဓါးပြတိုက်သွားသူ ပုန်းအောင်းနေသည်ဟု ယူဆရသည့် စနူကာကစားခန်းမသို့ ဝင်ရောက်ဖမ်းဆီးရာ ဆိုင်ကယ်ဖြင့်ထွက်ပြေးသွားခြင်းဖြစ်ကြောင်း သိရသည်။
ရဲတပ်ဖွဲ့က ထွက်ပြေးသွားသည့်ဆိုင်ကယ်နောက်သို့လိုက်၍ ဖမ်းဆီးရန်ကြိုးစားစဉ် မြက်ရှည်တောထဲတွင် ဝင်ရောက်သွားပြီး အဖမ်းဆီးမခံဘဲ ခုခံသဖြင့် ရဲတပ်ဖွဲ့က အသေပစ်ခတ်ဖမ်းဆီးလိုက်ခြင်းဖြစ်ကြောင်း သိရသည်။

အဆိုပါအမျိုးသားစီးလာသည့် ဆိုင်ကယ်ထိုင်ခုံအောက်တွင် ထည့်သွင်းလာသည့် ဘတ်ငွေ (၃)သိန်းကိုတွေ့ရှိရပြီး အလောင်းကို စစ်ဆေးနိုင်ရန် ဆေးရုံသို့ ပို့ဆောင်ထားကြောင်း သိရသည်။

အဆိုပါအမျိုးသား(၂)ဦးသည် ငွေသယ်သည့်ကားမှ ငွေများအား ဆိုင်ကယ်သို့ပြောင်းသယ်ချိန် (၁၀)စက္ကန့်ဝန်းကျင်သာ ကြာသဖြင့် ကြိုတင်ပြင်ဆင်မှုကောင်းစွာပြုလုပ်ထားကြသည်ဟု ရဲတပ်ဖွဲ့က ယူဆထားသည်။

Siam Commercial Bank မှ ငွေသယ်လာသည့်ကားအနီးသို့ ဓါးပြတိုက်သူနှစ်ဦးက ဆိုင်ကယ်ဖြင့်ရောက်လာကြပြီး ကားပေါ်မှငွေများကို အိတ်နှစ်အိတ်အတွင်းသို့ စက္ကန့်ပိုင်းတွင် ပြောင်းထည့်ကာ သယ်ဆောင်သွားခဲ့ကြခြင်းဖြစ်ပြီး အနီးရှိအလုပ်သမားများ ထွက်ပြေးစေရန် ခြောက်လှန့်ပစ်ခတ်မှုလုပ်ခဲ့ကြောင်း သိရသည်။

Tachileik News Agency
Ref: The Nation