~~~~~~~~⊰❂ Unicode Version ❂⊱~~~~~~~~

တာချီလိတ်တွင် လိုင်စင်မဲ့မော်တော်ယာဉ်ဖြင့်ဖမ်းမိသည့် ထိုင်းနိုင်ငံသားနှစ်ဦးကို (၃)နှစ်ထက် မပိုသော ထောင်ဒဏ်ချမှတ်နိုင်သည့် ပုဒ်မဖြင့် အရေးယူ
**********
ရှမ်းပြည်နယ်အရှေ့ပိုင်း၊ တာချီလိတ်မြို့တွင် လိုင်စင်မဲ့မော်တော်ယာဉ်မောင်းနှင်လာသည့် ထိုင်းနိုင်ငံသား အမျိုးသားတစ်ဦးနှင့် အမျိုးသမီးတစ်ဦးတို့ကို စစ်ဆေးတွေ့ရှိရသဖြင့် သုံးနှစ်ထက်မပိုသော ထောင်ဒဏ်ချမှတ်နိုင်သည့် ပို့ကုန်သွင်းကုန်ဥပဒေ ပုဒ်မဖြင့် အရေးယူထားကြောင်း သိရသည်။

ဝန်းကျောက်ရပ်ကွက်၊ ကားလေးကွင်းရှေ့တွင် ရဲတပ်ဖွဲ့က ၂၀၁၉ ခုနှစ် ဖေဖေါ်ဝါရီလ (၂၅)ရက်နေ့ ည(၉)နာရီ (၄၅)မိနစ်အချိန်တွင် ပိတ်ဆို့စစ်ဆေးနေစဉ် ထိုင်းနိုင်ငံသား Kitsanakon Bongkaew နှင့် ထိုင်းနိုင်ငံသူ Boon Chit Jamrunsiri တို့ စီးနင်းလာသည့် SHN နံပါတ်ပြားတပ်ထားသည့်ယာဉ်အား စစ်ဆေးရာ လိုင်စင်မဲ့မော်တော်ယာဉ်ဖြစ်ကြောင်း စစ်ဆေးတွေ့ရှိရသည်ဟု သိရသည်။

အဆိုပါ လိုင်စင်မဲ့မော်တော်ယာဉ်အား သိမ်းဆည်းလိုက်ပြီး Kitsanakon Bongkaew နှင့်  Boon Chit Jamrunsiri တို့နှစ်ဦးကို တာချီလိတ်မြို့မရဲစခန်းတွင် (ပ)၁၀၂/၂၀၁၉၊ ၂၀၁၂ ခုနှစ် ပို့ကုန်/သွင်းကုန် ဥပဒေပုဒ်မ ၈ဖြင့် အမှုဖွင့်စစ်ဆေးနေခြင်းဖြစ်ကြောင်း သိရသည်။

၂၀၁၂ ခုနှစ် ပို့ကုန်သွင်းကုန်ဥပဒေအရ ကန့်သတ်တားမြစ်ပိတ်ပင်ထားသော ကုန်ပစ္စည်းများကိုလည်းကောင်း ခွင့်ပြုချက်ရယူရန်သတ်မှတ်ထားသော ကုန်ပစ္စည်းများကို ခွင့်ပြုချက်ရယူခြင်းမရှိဘဲ တင်ပို့ခြင်း သို့မဟုတ် တင်သွင်းခြင်းမပြုလုပ်ရဟု တားမြစ်ထားပြီး အဆိုပါ တားမြစ်ချက်ကို ဖေါက်ဖျက်ပါက သုံးနှစ်ထက်မပိုသော ထောင်ဒဏ်ဖြစ်စေ၊ ငွေဒဏ်ဖြစ်စေ၊ ဒဏ်နှစ်ရပ်လုံးဖြစ်စေ ချမှတ်ခံရမည်ဖြစ်ကြောင်း ပြဌာန်းထားသည်။

Tachileik News Agency
ဓါတ်ပုံ - ရဲတပ်ဖွဲ့