~~~~~~~~⊰❂ Unicode Version ❂⊱~~~~~~~~

တာချီလိတ်သို့ တရားမဝင် ဝင်ရောက်လာပြီး ထိုင်းနိုင်ငံသို့ ဆက်လက်ထွက်ခွာရန်ကြိုးစားသည့် တရုတ်နိုင်ငံသား (၂)ဦးကို ဖမ်းဆီးရမိ
************
ရှမ်းပြည်နယ်အရှေ့ပိုင်း၊ တာချီလိတ်မြို့သို့ တရုတ်နိုင်ငံမှ တရားမဝင် ဝင်ရောက်လာပြီး ထိုင်းနိုင်ငံဘက်သို့ ဆက်လက်ထွက်ခွာရန်ကြိုးစားသည့် တရုတ်နိုင်ငံသား (၂)ဦးကို ၂၀၁၉ ခုနှစ်၊ ဇန်နဝါရီလ (၅)ရက်နေ့က စစ်ဆေးတွေ့ရှိရသဖြင့် လူဝင်မှုကြီးကြပ်ရေးဥပဒေဖြင့် အမှုဖွင့် စစ်ဆေးနေကြောင်း သိရသည်။

မြန်မာ - ထိုင်းချစ်ကြည်ရေးတံတား အမှတ် (၁)တွင် ဇန်နဝါရီလ (၅)ရက်နေ့ ည(၈)နာရီ (၁၅)မိနစ်က မြန်မာဘက်ခြမ်းမှ ထိုင်းဘက်သို့ လမ်းလျှောက်ထွက်ခွာမည့် ခြေလျင်သွားလမ်း၌ တရုတ်နိုင်ငံသား (၂)ဦးကို တာဝန်ကျ လူဝင်မှုကြီးကြပ်ရေးမှူးက စစ်ဆေးရာ တရားဝင်အထောက်အထား မတွေ့ရ၍ မြို့နယ်လူဝင်မှုကြီးကြပ်ရေးရုံးသို့ လွှဲပို့ပေးခဲ့ခြင်းဖြစ်ကြောင်း သိရသည်။

အဆိုပါ တရုတ်နိုင်ငံသားများဖြစ်သည့် Yan Ban (ခ)အိုက်ပန်းနှင့် Aik Kyauk Sheng (အိုက်ကျောက်ရှဲန်း)တို့ နှစ်ဦးသည် မိုင်းဖုန်းဆရာတော်အားဖူးရန် ဇန်နဝါရီလ (၄)ရက်နေ့ နံနက်(၅)နာရီက ၎င်းတို့နေထိုင်ရာ တရုတ်နိုင်ငံ၊ ကျင်းဟုန်ခရိုင်၊ မိုင်းလုံမြို့မှ မြန်မာနိုင်ငံ မိုင်းယောင်းမြို့သို့ ဆိုင်ကယ်ဖြင့် ထွက်ခွာလာကြခြင်းဖြစ်သည်ဟု ထွက်ဆိုကြောင်း သိရသည်။

ယင်းနောက် မိုင်းယောင်းမြို့မှ လိုင်းကားဖြင့် ဇန်နဝါရီလ (၅)ရက်နေ့တွင် တာချီလိတ်မြို့သို့ လိုက်ပါလာရာ ည(၈)နာရီအချိန်၌ရောက်ရှိခြင်းဖြစ်ပြီး ထိုင်းနိုင်ငံဘက်သို့ ဆက်လက်ထွက်ခွာရန် ကြိုးစားစဉ် ထိန်းသိမ်းခံရခြင်းဖြစ်ကြောင်း သိရသည်။

တရားမဝင် ဝင်ရောက်လာသည့် တရုတ်နိုင်ငံသား(၂)ဦးဖြစ်သည့် Yan Ban (ခ)အိုက်ပန်းနှင့် Aik Kyauk Sheng (အိုက်ကျောက်ရှဲန်း)တို့ကို  တာချီလိတ်မြို့မရဲစခန်းတွင် (ပ) ၈/၂၀၁၉၊ လဝကအက် ဥပဒေပုဒ်မ ၁၃(၁)ဖြင့် အမှုဖွင့်စစ်ဆေးနေကြောင်း သိရသည်။

Tachileik News Agency
ဓါတ်ပုံ - ရဲတပ်ဖွဲ့