"သူတို့ဖြစ်စဉ်က စားသောက်ဆိုင်ထဲမှာ လာစားသောက်ပြီးတော့ အပေါ့သွားတာ ထင်တယ်။ သွားတော့ တံခါးဝမှာ နည်းနည်း တိုက်မိသွားတယ် ထင်တယ်။ တစ်ယောက်နဲ့ တစ်ယောက်။ မကျေမနပ်ဖြစ်တော့ သေနတ်ရှိတဲ့သူက ယိုးဒယား(ထိုင်း)ပေါ့။ တစ်ယောက် နှစ်ယောက် ဝင်လာပြီးတော့ စကားများ ကြတယ်ပေါ့။ အဲဒီကုလားထိုင်ကို ဆွဲပြီးတော့ ရိုက်မလို့ဆိုရင် အဲဒီ ယိုးဒယား(ထိုင်း)လည်း သေနတ်နဲ့ ပစ်လိုက်တယ်။ တစ်ချက်ပဲထင်တယ်။ ဘာကြောင့်လည်းဆိုတော့ ကျည်တောင့် တစ်ခုပဲ တွေ့တာကိုး။ အခုဆေးရုံတင်ထားလိုက်တယ်။ ပစ်တဲ့အချိန်ကတော့ (၁)နာရီ ပတ်ဝန်းကျင်ကပေါ့။ ပစ်ခံရတဲ့ သူကတော့ အဲဒီ ပုံထဲမှာတွေ့တာတော့ မိန်းကလေး တစ်ယောက်ရယ်။ အမျိုးသား တစ်ယောက် ရယ်။ သေနတ် ကိုင်ပြီးတော့ ပစ်တဲ့သူကတော့ သူ့ရည်းစားလား မိန်းမလားမသိဘူး တစ်ယောက်တော့ အဲဒီ CCTV ထဲမှ မြင်ရတာ။ ရဲတွေတော့ စစ်သွားပြီ။ အခုလည်း ဆိုင်ရှင်ကို ခေါ်စစ်နေတယ် ရဲစခန်းမှာ"ဟု မယ်ခေါင်ရပ်ကွက် အုပ်ချုပ်ရေးမှူး ဦးစိုင်းအွတ် က တာချီလိတ်သတင်းအေဂျင်စီသို့ ဇန်နဝါရီလ(၂၁)ရက်နေ့ နေ့လယ်ပိုင်းက ပြောသည်။

အခင်းဖြစ်ပွားသည့် နေရာမှာ တာချီလိတ်မြို့ မယ်ခေါင်ရပ်ကွက်အတွင်းရှိ အကင်ဆိုင်တွင် ဖြစ်ပြီး အားခင် အပါအဝင် (၄)ဦးတို့သည် အရက်ထိုင်သောက်ကြပြီးနောက် အားခင်သည် ဆိုင်နောက်ဖေးသို့ အပေါ့သွားရာ အခြားဝိုင်း၌ ထိုင်ကာ အရက်သောက်နေသည့် အသက်(၂၀)ဝန်းကျင်ရှိ အမျိုးသား တစ်ဦးအား ဝင်ရောက်တိုက်မိခဲ့ကြောင်း သိရသည်။

အဆိုပါ ဖြစ်စဉ်ကြောင့် အမည်မသိ အသက်(၂၀)ဝန်းကျင်ရှိ လူငယ်သည် အသက်(၂၇)နှစ်ဝန်းကျင်ရှိ အားခင်အား သေနတ်ဖြင့် ပစ်လိုက်ရာမှ ယာဘက်နံရုံးအောက်တွင် စိုးရိမ်ရသည့် ကျည်ဖောက်ဝင် ဒဏ်ရာ(၁)ချက် ရရှိသွား၍ တာချီလိတ်နာရေးကူညီမှုအသင်းက မယ်ဆိုင်မြို့ရှိ လူမှုကယ်ဆယ်ရေး အဖွဲ့ဖြစ်သည့် ဘုံဗိဟန် နှင့် ချိန်ဆက်ကာ ထိုင်းနိုင်ငံ ဆေးရုံသို့ ပို့ဆောင်ပေးထားရကြောင်း သိရသည်။

သေနတ်ဖြင့် ပစ်ခတ်ခံရသူသည် ကျိုင်းတုံမြို့ မိုင်းဇင်းကျေးရွာအုပ်စုအတွင်း နေထိုင်သူဖြစ်ပြီး၎င်းအား သေနတ်ဖြင့် ပစ်ခတ်ကာ တိမ်းရှောင်သွားသူ အမည်မသိ အမျိုးသားကို ဖမ်းဆီးရမိရေးအတွက် ရဲတပ်ဖွဲ့မှ ဆောင်ရွက်နေလျက်ရှိပြီး တာချီလိတ်မြို့မရဲစခန်းတွင် (ပ)၃၁/၂၀၁၉၊ ရာဇသတ်ကြီး ဥပဒေ ပုဒ်မ ၃၀၇/၃၂၆ ဖြင့် အမှုဖွင့်အရေးယူ ဆောင်ရွက်ထားရှိကြောင်း သိရှိရသည်။

Tachileik News Agency