~~~~~~~~⊰❂ Unicode Version ❂⊱~~~~~~~~

ရှမ်းပြည်နယ်အရှေ့ပိုင်း၊ တာချီလိတ်မြို့တွင် နေ့ခင်းအချိန်ပျောက်သွားသည့် ဆိုင်ကယ်တစ်စီးကို တစ်ရက်အကြာတွင် ဆိုင်ကယ်ခိုးယူသွားသူအား ဆိုင်ကယ်နှင့်အတူ ပြန်လည်ဖမ်းဆီးရမိကြောင်း သိရသည်။

တာချီလိတ်မြို့ ပုန်းထွန်ရပ်ကွက် (၅)လမ်းရှိ နေအိမ်တစ်လုံးရှေ့တွင် ၂၀၁၉ခုနှစ် ဇန်နဝါရီလ(၂၀)ရက်နေ့ နံနက်(၁၁)နာရီ ဝန်းကျင်အချိန် ဆိုင်ကယ်ရပ်ထားခဲ့ပြီး နေ့လယ်(၂)နာရီ ဝန်းကျင်တွင်ပြန်ထွက်လာရာ ဆိုင်ကယ်မှာ ပျောက်ဆုံးနေသည်ကို တွေ့ရသဖြင့် ရဲစခန်းတွင် အမှုဖွင့်တိုင်ကြားခဲ့ခြင်းဖြစ်ကြောင်း သိရသည်။

အဆိုပါ ဆိုင်ကယ်ပျောက်ဆုံးမှုအား ရဲတပ်ဖွဲ့က စုံစမ်းဖော်ထုတ်ရာ ဇန်နဝါရီလ (၂၁)ရက်နေ့ ညနေ (၆)နာရီ (၄၅)မိနစ်အချိန်တွင် တာချီလိတ်မြို့မရဲစခန်းမှ နယ်ထိန်းခေါင်းဆောင် ရဲအုပ်ကိုကိုဦး နှင့် တပ်ဖွဲ့ဝင်များ နှင့် သက်ဆိုင်ရာ ပူးပေါင်းအဖွဲ့တို့မှ ပုန်းထွန်ရပ်ကွက်၊ ငွေစေတီလမ်းနှင့် စိန်ပန်းလမ်းဆုံတွင် အောင်အောင် (ခ) ရာဂျားဆိုသူအား ခိုးယူသွားသည့် ဆိုင်ကယ်နှင့်အတူ ဖမ်းဆီးရမိခြင်းဖြစ်ကြောင်း သိရသည်။

အဆိုပါ ဖြစ်စဉ်နှင့် ပတ်သက်၍ တာချီလိတ်မြို့မရဲစခန်းတွင် (ပ)၃၃/၂၀၁၉၊ ရာဇသတ်ကြီး ဥပဒေပုဒ်မ ၃၇၉(ဆိုင်ကယ်)ဖြင့် အမှုဖွင့်ထားခြင်းဖြစ်ကြောင်း သိရသည်။

Tachileik News Agency