~~~~~~~~⊰❂ unicode ❂⊱~~~~~~~~

တာချီလိတ်မြို့ရှောင်လမ်းတွင် တရားမဝင် သစ် (၁၉)တန်ကျော် သယ်လာသူအား ဖမ်းဆီးရမိ
***************
ရှမ်းပြည်နယ်(အရှေ့ပိုင်း)  တာချီလိတ် - မိုင်းဆတ်သွားလမ်းနှင့် (၁)မိုင်ခန့်အကွာရှိ မြို့ရှောင်လမ်း၌ တရားမဝင် သစ်(၁၉)တန်ကျော်သယ်လာသည့် မော်တော်ယာဉ်(၂)စီးနှင့်အတူ သယ်ဆောင်လာသူ တစ်ဦးအား ဖမ်းဆီးရမိသဖြင့် ၂၀၁၈ ခုနှစ်၊ နိုဝင်ဘာလ(၇)ရက်နေ့တွင် အမှုဖွင့်ထားကြောင်း သိရသည်။

တာချီလိတ်ခရိုင်နှင့် မြို့နယ်သစ်တောဦးစီးဌာနတို့မှ တာဝန်ရှိသူများပါဝင်သည့် ပူးပေါင်းအဖွဲ့သည် တရားမဝင် သစ်တောထွက်ပစ္စည်းများ ရှာဖွေဖမ်းဆီးဖေါ်ထုတ်ရေး ၂၀၁၈ ခုနှစ်၊ နိုဝင်ဘာလ(၆)ရက်နေ့က လှည့်လည်စစ်ဆေးရာ တာချီလိတ်မြို့ မြို့ရှောင်လမ်းပေါ် တာချီလိတ် - မိုင်းဆတ်လမ်းမကြီးမှ တစ်မိုင်ခန့်အကွာတွင် ရပ်ထားသည့် (၁၀)ဘီးယာဉ် နှစ်စီးကို တွေ့ရခြင်းဖြစ်ကြောင်း သိရသည်။

အဆိုပါမော်တော်ယာဉ်များအား စစ်ဆေးရာ မော်တော်ယာဉ်တစ်စီးတွင် အင်ကြင်းသစ်မာခွဲသား (ဝ.၉၅၀၈)တန်နှင့် အင်သစ်မာခွဲသား (၈.၅၉၀၆)တန်ကိုလည်းကောင်း အခြားမော်တော်ယာဉ်တစ်စီးတွင် အင်ကြင်းသစ်မာခွဲသား (၁၀.၁၂၅)တန်ကိုလည်းကောင်း စုစုပေါင်း သစ်တန်ချိန်(၁၉.၆၆၆၄)တန်ကို စစ်ဆေးတွေ့ရှိရခြင်းဖြစ်ပြီး အဆိုပါသစ်များအား သယ်လာသည့် စိုင်းကြံအောင်မြင့်ကို တွေ့ရှိရခြင်းဖြစ်ကြောင်း သိရသည်။

တရားမဝင် သယ်ဆောင်လာသည့်သစ်များနှင့်အတူ တွေ့ရသည့် စိုင်းကြံအောင်မြင့်အား တာချီလိတ်မြို့မရဲစခန်းတွင် (ပ) ၃၉၁/၂၀၁၈၊ သစ်တောဥပဒေပုဒ်မ ၄၂(က)ဖြင့် အမှုဖွင့်ထားကြောင်း သိရသည်။

Tachileik News Agency